१ थेसलोनिकी 5 - ह्योल्मोचो़वो फेप नाङगेन्गी ङ्यिहमा क़ूहदी तेह 1 आदा-नो़ह दाङ आज्यी-नुहमुया़, दि केच्याया़ काहजेला ओहङगे यिहम्बा ओहले नाहम ओहङगे यिहम्बा म़ेदी ङ्यिहगी ख्या फ़ेबे-म़ेहमेया़ला यिहगी प्रुह मेहकोहएँ। 2 च्यिबेमाना चो़वो फेप नाङगेन्गी ङ्यिहमा नि नुहङमु कुमेन ओहङग्यो ल़ेहमुराङ पेहती ओहङज्ये येह म़ेदी ख्या फ़ेबे-म़ेहमेया़ला या़हबु पेहती थुयी़राङ येह। 3 ओहले मिहया़गी “थाम्ज्यी ग्या़या़ला स्य़िहदे येह, ओहले ओहराङला च्यि से़हदीॱआङ ज्यिक्पा म़ेह” म़ेदी म़े तेहकेमु ओ़ह ती़हजीलाराङ याहङमे-याहङला पी़हमी-पेहजाला पेहजा क्येएँमु नाहजा क्याहप्क्यो ल़ेहमुराङ खुङया़ थो़ला तुहक्पु बाप ओहङज्ये येह ओहले खुङया़ सुॱआङ थार ख़ूज्ये म़ेह। 4 यिहॱनाङ आदा-नो़ह दाङ आज्यी-नुहमुया़, ख्या फ़ेबे-म़ेहमेॱया ना़-जुबेला म़ेह। ओ़ह सोङबे ओ़ह ङ्यिहमागी ख्या फ़ेबे-म़ेहमेया़ला कुमेनगी ल़ेहमुराङ ह्अ ल़ेह च्य़ूज्ये म़ेह। 5 च्यिबेमाना ख्या फे़बे-मे़हमे थाम्ज्यी ङ्यिहमा दाङ क्या-साङेकी छार्क्यीनया़ यिहम्बा। ओहराङ नुहप दाङ ना़-जुबेगी छार्क्यीनया़ मिहम्बा। 6 ओ़ह सोङबे ओहराङ लेहमेन मिहया़ ल़ेहमु पेहती ङ्याहल्दी तेहच्ये मेहयोहङगे, यिहॱनाङ जेम्बु पेहती ङ्यि छेती तेह कोहकें। 7 च्यिबेमाना ङ्याहल्गेया़ नुहङमुॱराङ ङ्याहल्गे ओहले ज़िगे मिहया़ॱआङ नुहङमुॱराङ ज़िगे। 8 यिहॱनाङ ओहराङदी ङ्यिहमागी छार्क्यीन यिहन्गे सोङबे ओहराङ जेम्बु पेह कोहकें। ओहराङगी तेहपा दाङ चेवाकी कू़हगे स़ेह प्राहङगोला केहन कोहकें ओहले स्याहमु ल़ेहमु पेहती थार्पाकी रेहवाला केहन कोहकें। 9 च्यिबेमाना किन्ज्योगी ओहराङ थो़ला राहङगी थुयाल पुङ नाङज्येला दाम नाङग्यो मिहम्बा यिहॱनाङ चो़वो येशू मास्यीका लाहमले थार्पा नाङज्येला तोहङलेराङ दाम नाङग्यो यिहम्बा। 10 चो़वो येशू फेप नाङगेमु ओहराङ स्यिदी काहल्ग्यो यिहॱनाङ, सोम्बो लिहक्यो यिहॱनाङ ओहराङ मिहरो लाहमलेॱराङ थार ख़ूज्यु म़ेदीराङ मास्यीका ओहराङगी तेहन्दाला टोहङ नाङसीन। 11 ओ़ह सोङबे नाहरे ख्या फ़ेबे-म़ेहमेया़गी जे नाङग्यो ल़ेहमुराङ च्यी़गी च्यी़ला स्युक क्ये च्य़ूदोङ ओहले च्यी़गी च्यी़ला सान्दी ज़ोएँगी ल़ेहया़ जे नाङदोङ। ज्युक्स्योलगी लोप्ताम दाङ टास्यी-देले 12 आदा-नो़ह दाङ आज्यी-नुहमुया़, ङ्यिह ख्या फ़ेबे-म़ेहमेया़ला थाल्मा च्याहर्ती ओहर-छ्य़े स्युहउ येह! ख्या फ़ेबे-म़ेहमेया़गी पाहरक्यीला कादुप च्येती ल़ेह पेहकें दाङ चो़वोकी छेनला लोप्ताम क्याप नाङगेया़ला ची़नाङ पेहतोङ। 13 ओहले खुङ फे़बेया़गी जे नाङग्योकी छ्या़लेकी तेहन्दाला चेवा पेहती खुङ फे़बेया़ला चा़ छ्यिम्बु पेहती ची़नाङ पेहतोङ। ओहले ख्या फ़ेबे-म़ेहमेॱया राहङ नाहङदुङ थिङबु-जामु पेहती तेहतोङ। 14 आदा-नो़ह दाङ आज्यी-नुहमुया़ ङ्यिह ख्या फ़ेबे-म़ेहमेया़ला दि लोप्ताम क्याहप्को येह ख्या फ़ेबे-म़ेहमेया़गी ल़ेहमी-लाहम पेहकेनया़ला लोप्ताम क्याहप नाङदोङ। ओहले सेम मा-फाम्बु पेहकेनया़ला स्युक क्ये च्य़ू नाङदोङ ओहले ला़ म़ेह खाएँया़ला रो़हराम जे नाङदोङ। ओहले खुङ थाम्ज्यी ङ्याम्बु ना़स्यीङ छ्यिम्बु जे नाङदोङ। 15 दि ताम टेहम्बा ज़्यो़, का़हलेॱआङ ख्याया़ला सुज्यीगीॱआङ चोक्पा पेहसीन म़ेदी खोलाॱआङ चोक्पा माहबे यिहॱनाङ च्यी़गी च्यी़ला ओहले मिह थाम्ज्यी ङ्याम्बु या़हबु पेहकेन्गी सेम ज़्या़दोङ। 16 ओहले नाहम माॱनाङ काहसो पेहतोङ। 17 नाहम पेहॱनाङ सोल्वाङ ताप्तोङ। 18 काह-ठि क्यिदु-तुहक्पु ओहङॱनाङ नाहम-माना थुज्यी-छ्ये़ फुल्दोङ, च्यिबेमाना मास्यीका येशूला ख्या फे़बेया़गी तेहन्दाला किन्ज्योगी थु-सेम जे नाङगेन्दीॱआङ दिराङ यिहम्बा। 19 नाम्पार-ताहक्पा थुला मा़हसेह। 20 लुहङदेनला ङ्येन्ज्येन माहबे। 21 ताम थाम्ज्यी या़हबु पेहती ङ्याहम च्येतोङ, ओहले का़हन्दी ताम या़हबु येहबा ओ़ह ताम या़हबु पेहती ची़दोङ। 22 ओहले ना थाम्ज्यी चोक्पा तामया़ ङो़ले था़-रिहङबुराङ तेहतोङ। 23 स्य़िहदेकी किन्ज्यो राहङगीराङ ख्या फ़ेबे-म़ेहमेया़ला सेम तिहङ यिहन्ज्युराङ चाङमा ज़ो नाङज्यु, ओहले ख्या फे़बे मे़हमेया़की थाम्ज्यी सेम, सो दाङ ली़ह ओहराङकी चो़वो येशू मास्यीका फेप नाङगे ङ्यिहमा थु च्यिॱआङ क्येन म़ेहबा पेहती ज़्या़ नाङज्यु। 24 ख्या फ़ेबे-म़ेहमेया़ला क़े क्याहप नाङगेन्दी यिह-छ्य़ेबु येहबा, मिहरोगी दि थाम्ज्यी जे नाङज्ये येहबा। 25 आदा-नो़ह दाङ आज्यी-नुहमुया़, ङ्यिहगी तेहन्दाला सोल्वाङ ताप नाङदोङ। 26 ओ़हला येहकेन्गी थाम्ज्यी आदा-नो़ह दाङ आज्यी-नुहमुया़ला नाम्पार-ताहक्पा सेमगी च्युक पेहती टास्यी-देले सुङ नाङदोङ। 27 ङाह ख्या फ़ेबे-म़ेहमेया़ला चो़वोगी छेनला थाल्मा च्याहर्ती माएँ– दि यिहगी थाम्ज्यी आदा-नो़ह दाङ आज्यी-नुहमुया़गी तेहन्दाला टा़हदी ङ्यिहन च्य़ूदोङ। 28 ओहराङगी चो़वो येशू मास्यीकाकी काटीन ख्या फे़बे-मे़हमे थाम्ज्यी ङ्याम्बु नाहम्माॱनाङ ज़्य़ू नाङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.