१ थेसलोनिकी 4 - ह्योल्मोकिन्ज्योला थु ङ्ये़एँगी मिहली 1 ता़ह ज्युक्स्योलला आदा-नो़ह दाङ आज्यी-नुहमुया़, चो़वो येशूगी छेनला ङ्यिह राहङ फ़ेबे-म़ेहमेया़ला थाल्मा च्याहर्ती दि उर्चु पेहको येह, ख्या फ़ेबे-म़ेहमेया़गी ङ्यिह लाहमले किन्ज्योला थु ङ्ये़एँगी डोलु-तेहलुया़ लोप नाङदी येह ओहले लोप्क्यो ल़ेहमुराङ ख्या फबे-मे़हमेया़गी नाहरे जे नाङगेराङ येह। ओ़ह ल़ेहमु डोलु-तेहलुया़ला ख्या फ़ेबे-म़ेहमेॱया जेन-जेन या़हबु पेहती फेप नाङदोङ। 2 च्यिबेमाना ङ्यिहगी चो़वो येशू लाहमले ज़्योरक्योगी का़हन्दी काया़ ख्या फ़ेबे-म़ेहमेया़ला तेर्पा ओ़हदी राहङ फ़ेबे-म़ेहमेया़ला थुयी़राङ येह। 3 ख्या फ़ेबे-म़ेहमेॱया नाम्पार-ताहक्पा ओहङ कोहकें म़ेदी किन्ज्योगी थुसेम जे नाङगे, ओ़ह सोङबे ख्या फ़ेबे-म़ेहमेॱया छ्येउ-छ्येंमु ङो़ले था़-रिहङबुराङ ज़्य़ू नाङदोङ। 4 ख्या फ़ेबे-म़ेहमेॱया नाम्पार-ताहक्पा पेहती ओहले लेहमेन मिहया़गी ख्या फ़ेबे-म़ेहमेया़ला ची़नाङ पेहकें छ्याप्स्यीगी राहङ फ़ेबे-म़ेहमेया़गी राहङगी ज़ुबु थिला ज़्या़ कोहएँ माएँ ताम ङोह स्ये़दोङ। 5 किन्ज्योला ङोह मे़हस्येएँ मिहया़गी ल़ेहमु छ्येउ-छ्येंमु पेहच्येला सेम ङ्येहम्बा माहच्याङ। 6 दिगी तेहन्दाला सुज्यीगीॱआङ राहङगी आदा-नो़हला गो़ कोर्ती खो लाहमले खेप्साङ माहतेन्ज्यु। दि ल़ेहमु तामला चो़वोगी ङ्य़ेहबा काल नाङज्ये येह। ङ्यिहगी ख्या फ़ेबे-म़ेहमेया़ला तोहङलेराङ दिगी तेहन्दाला छ्यिसाल-नाहङसाल पेहती ज्यी़-ङोर तेर सिहन्दी येहबा। 7 किन्ज्योगी ओहराङला मेहचाङा ज़ो नाङज्येगी तेहन्दाला क़े क्याहप नाङग्यो मिहम्बा यिहॱनाङ नाम्पार-ताहक्पा पेहती राहङगी मिहजी ताङज्येला क़े क्याहप नाङग्यो यिहम्बा। 8 ओ़ह सोङबे का़हन्दीगी दि लुहङला मी़हचीएँ ओ़हदीगी मिहला मिहम्बा, किन्ज्योलाॱराङ मी़हचीएँ, ओ़ह किन्ज्योगीॱराङ ख्या फ़ेबे-म़ेहमेया़ला नाम्पार-ताहक्पा थु नाङसीन। 9 यिहॱनाङ आदा-नो़ह दाङ आज्यी-नुहमुया़ला चेवाकी तेहन्दाला सुज्यीगीॱआङ यिहगी प्रुह कोहबा म़ेह, च्यिबेमाना च्यी़गी च्यी़ला चेवा पेहतोङ माएँ ताम ख्या फ़ेबे-म़ेहमेॱया राहङगीराङ किन्ज्यो लाहमले लुहङ ज्योर्ती येह। 10 थाम्ज्यी माकेडोनियाकी आदा-नो़ह दाङ आज्यी-नुहमुया़ला राहङ फ़ेबे-म़ेहमेया़गी तेहम्बाराङ चेवा जे नाङगे। यिहॱनाङ आदा-नो़ह दाङ आज्यी-नुहमुया़, जेन माहङबु ओ़ह ल़ेहमुराङ पेहती सोङ म़ेदी ङ्यिहगी ख्या फ़ेबे-म़ेहमेया़ला लोप्ताम क्याहप्को येह। 11 ङ्यिहगी ख्या फ़ेबे-म़ेहमेया़ला तोहङले माक्यो ल़ेहमुराङ सेम लो तेहमुगी मिहजी ताङज्येला सेम्बा पेहतोङ। ओहले राहङ-राहङगी ल़ेहया़ला सेम या़हबु ताङदोङ ओहले राहङ लाहक्पागीॱराङ ल़ेह पेहतोङ। 12 ओ़ह ल़ेहमु पेहसीमाना ख्या फ़ेबे-म़ेहमेया़ला फि-मिहया़गीॱआङ ची़नाङ पेहच्ये येह। ओहले ख्याला कोहपु डोएँमु लेहमेन मिहया़ थो़ला रे़ह कोहच्ये म़ेह। 13 आदा-नो़ह दाङ आज्यी-नुहमुया़, ता़ह किन्ज्योला यिह छ्य़ेदी स्यि सिहन्ग्योगी मिहया़गी तेहन्दाला ख्या फ़ेबे-म़ेहमेॱया च्यिॱआङ क्यी़ह म़ेहबाकी मिहया़ ल़ेहमु पेहती तेहच्यु माएँ ङ्यिहती सेम्बा म़ेह, च्यिबेमाना रेहवा म़ेहबाकी मिहया़गी ल़ेहमु तुहङाल पेह माहकोहज्यु। 14 च्यिबेमाना येशू टोङदीॱआङ येहपाराङ सोम्बो ज़्याङ नाङसीन माएँ तामला ङ्यिहगी यिह छ्य़ेक्यो येह। ओ़ह ल़ेहमुराङ पेहती किन्ज्योला यिह छ्य़ेदी स्यि सिहन्ग्योया़ला मिहरोगी येशू ङ्याम्बुराङ नोम फेप नाङज्ये येह म़ेदी ङ्यिहगी यिह छ्य़ेगे। 15 चो़वो राहङदीराङ सुङ लाहमले ङ्यिहगी ख्या फ़ेबे-म़ेहमेया़ला दि ल़ेहमु माउ येह। चो़वो फेप नाङगे ङ्यिहमा थु ओहराङ थार्ती तेहकेया़गी किन्ज्योला यिह छ्य़ेदी स्यि सिहन्ग्योया़ला च्यि पेहतीॱआङ गोम्दी तोहङले डो ख़ूज्ये म़ेह। 16 च्यिबेमाना चो़वो राहङदीराङ कागी सुङ-क़े छ्यिम्बुच्यी तेन्दी, स्यिहङगामकी गो-छ्येवा स्याहप्च्यीकी सुङ-क़े दाङ किन्ज्योगी रोहवा-लीङकी सुङ-क़े ङ्याम्बु स्यिहङगामले माहर फेप नाङज्ये येह, ओहले येशू मास्यीकाला यिह छ्य़ेदी स्यिक्योया़ थाम्ज्यी म़ेदी तोहङले सोम्बो लाहङज्ये येह। 17 ओ़ह ङ्यिहमा थु ओहराङ थार्ती तेहक्योया़ दाङ क्युर ज़्या़क्योया़ चो़वोला थुज्येला खुङ ङ्याम्बुराङ मुक्पाला क्या़दी नोम फेप नाङज्ये येह, ओहले ओ़ह ल़ेहमु पेहती ओहराङ नाहम माॱनाङ चो़वो ङ्याम्बुराङ ओहङज्ये येह। 18 ओ़ह सोङबे दि तामया़गी च्यी़गी च्यी़ला स्युक क्ये च्य़ूदोङ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.