१ थेसलोनिकी 3 - ह्योल्मोतिमोथीला थेसलोनिकाला ताङ चाहङग्यो 1 ज्युक्स्योलला ङ्यिहगी ना़ॱराङ मा़हखुबा सोङबे ङ्यिहया़ च्यी़राङ एथेन्स क्याहसाला तेहकें म़ेदी आप्ता च्येसीन। 2 ख्या फ़ेबे-म़ेहमेया़ला स्युक क्ये च्य़ूदी यिह-छ्य़ेला सान्दी ज़ोज्येला किन्ज्योला मास्यीकाकी लेहङगु या़हबुकी स्याहप्तो स्युहएँ ओहराङकी नो़ह तिमोथीला ङ्यिहगी ताङसीन। 3 च्यिबेमाना दि तुहक्पुया़गी पेहती ख्या फ़ेबे-म़ेहमेॱया सुज्यीॱआङ चो़वो ङो़ले तेहपा मा़हलोहज्यु। दिगी तेहन्दालाराङ ङ्यिहला चो़वोगी दाम नाङग्यो यिहम्बा म़ेदी राहङ फ़ेबे-म़ेहमेया़ला थुयी़राङ येह। 4 च्यिबेमाना ङ्यिहगी ख्या फ़ेबे-म़ेहमेॱया ङ्याम्बु तेहकेमु ओहराङगी तुहक्पु खुर कोहच्ये येह म़ेदी ङ्यिहगी तोहङलेराङ माक्यो येहकें। दि केच्या तेहम्बाराङ तेहन्दाॱआङ डुप्सीन, ओ़ह ख्या फ़ेबे-म़ेहमेया़ला थुयी़राङ येह। 5 ओ़ह सोङबे ङाहगी ना़ॱराङ मा़हखुबा सोङबे ङ्याहम्छेला छ्यि च्य़ूगेया़गी ख्या फे़बे-मे़हमेया़लाॱआङ ङ्याहम्छेला छ्यि च्य़ूबा नि म़ेदी ओहले ङ्यिहगी कादुप च्येक्योदी स्यिती काम्बुला थोरो डोएँ ज्यी़सुगी ख्या फ़ेबे-म़ेहमेया़गी यिह-छ्य़े क्यी़ह ज्योर्च्येला ङाहगी तिमोथीला ताङग्यो यिहम्बा। 6 यिहॱनाङ ताहन्दा तिमोथी ख्या फ़ेबे-म़ेहमेॱया साले पेहती ङ्यिहसाला लो़ह लेप्सीन। ओहले तिमोथीगी ख्या फ़ेबे-म़ेहमेया़गी चेवा दाङ तेहपागी तेहन्दाला ज्यिबुराङ या़हबु लेहङगु नोम फेप्सीन। ङ्यिहगी ल़ेहमुराङ ख्या फ़ेबे-म़ेहमेया़गीॱआङ ङ्यिहला टेहम्बा साल्दी थुज्येला ज्यिबुराङ सेम्बा जे नाङग्यो दुबा। 7 आदा-नो़ह दाङ आज्यी-नुहमुया़, ङ्यिहगी तुहक्पु दाङ सेम मा-फाम्बु डोएँगी ती़हजीलाॱआङ राहङ फ़ेबे-म़ेहमेया़गी यिह-छ्य़ेगी लेहङगु थे़दी ङ्यिहला स्युक ज्योर्ती येह। 8 च्यिबेमाना ख्या फ़ेबे-म़ेहमेॱया चो़वो येशूला यिह-छ्य़े पेहलुला सान्दी पेहती ज़्य़ू नाङगु दु माएँ ताम थे़गेमु ङ्यिहगी सेम तेहमु काहल्दी येह। 9 राहङ फ़ेबे-म़ेहमेया़गी पेहतीराङ ङ्यिहगी किन्ज्योगी दिनला सेम काहसो पेह ख़ूएँ। दिगी तेहन्दाला किन्ज्योला ङ्यिहगी काहजे थुज्यी-छ्ये़ फुलॱनाङ ङ्युहङाॱराङ डोएँ। 10 ङ्यिह ख्या फ़ेबे-म़ेहमेया़ला थू़दी ख्या फ़ेबे-म़ेहमेया़गी यिह छ्य़ेलुला कोहपु काहल्ग्यो से़हया़ छाङबु पेहच्येला ङ्यिहगी ङ्यिहन-नुहपराङ सेम तिहङ यिहन्ज्यु किन्ज्यो ङ्याम्बु सोल्वाङ ताप्को येह। 11 ता़ह ओहराङगी किन्ज्यो याहप राहङगीराङ ओहले चो़वो येशूगी ख्या फ़ेबे-म़ेहमेॱया साला ओहङज्येला ङ्यिहती लाहम साल नाङज्यु। 12 ङ्यिहगी ख्या फ़ेबे-म़ेहमेया़ला चेवा पेहक्यो ल़ेहमुराङ चो़वो येशूगी ख्या फे़बे-मे़हमेया़लाॱआङ च्यी़गी च्यी़ला ओहले मिह थाम्ज्यीला जेन-जेन माहङबु चेवा पेहकेन्गी सेमया़ नाङज्यु। 13 दिगी पेहती मिहरोकी थाम्ज्यी नाम्पार-ताहक्पा मिहया़ ङ्याम्बु ओहराङगी चो़वो येशू मास्यीका फेप नाङगेमु चो़वो येशूगी ओहराङगी किन्ज्यो याहपकी दिनला ख्या फ़ेबे-म़ेहमेया़गी सेम नाम्पार-ताहक्पा दाङ च्यिॱआङ क्येन म़ेहबा पेहती थिक-चि पेहती ज़्या़ नाङज्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.