१ थेसलोनिकी 2 - ह्योल्मोथेसलोनिकाला पावलगी पेहक्योगी ल़ेह 1 ए आदा-नो़हया़ दाङ आज्यी-नुहमुया़, ङ्यिह ख्या फ़ेबे-म़ेहमेया़ला थ़ू ओहङग्योदी आहन्डाराङ थोरो माहकाहल, दिनी ख्या फे़बे-मे़हमेया़लाॱआङ थुयी़राङ येह। 2 ख्या फ़ेबे-म़ेहमेॱया साला ओहङगे म़ेदी तोहङले फिलिप्पीकी मिहया़गी ङ्यिहला आब्रु तेन्दी ज्यिबुराङ तुहक्पु तेर्सीन। दि केच्याॱआङ ख्या फ़ेबे-म़ेहमेया़ला थुयी़राङ येह। मिहया़गी ङ्यिहला ज्यिबुराङ टाह पेहॱनाङ किन्ज्योगी लेहङगु या़हबु ख्या फ़ेबे-म़ेहमेया़ला स्येच्येला ङ्यिहला किन्ज्योगीॱराङ स्युक क्ये च्य़ू नाङसीन। 3 ख्या फ़ेबे-म़ेहमेया़ला स्ये़क्योकी लुहङया़ ङ्यिहगी जोल्दी ङ्यिहगी मेहचाङा सेम ङो़ले थेन्ग्यो मिहन। ओहले ङ्यिहगी सुज्यीलाॱआङ गो़ कोर च्य़ूज्ये छोल्दी म़ेह। 4 यिहॱनाङ लेहङगु या़हबु चि क्याहप्च्येला किन्ज्योगी ओहराङला यिह-छ्य़ेबु ज़ी़ नाङसीन। ओ़ह सोङबे मिहया़ला क़ेहनाङ लाहङ च्य़ूज्येला मिहम्बा, यिहॱनाङ ओहराङगी सेम ज़ी़ नाङगेन किन्ज्योकी थु काहसो ज़ोज्येला ङ्यिह किन्ज्योला थु-ङ्ये़हएँकी तामया़ माउ येह। 5 राहङ फ़ेबे-म़ेहमेया़ला या़हबु पेहती थुयी़राङ येह, ङ्यिहगी ख्या फ़ेबे-म़ेहमेॱया ङ्याम्बु ज्याप्ला तेन्दी ताम मा़हमे ओहले ङ्यिहगी राहङ फ़ेबे-म़ेहमेॱया ङो़ले च्यिरा ज्योर्केनी म़ेदी ह्अम्बा पेहती दि ल़ेहमु पेहक्यो मिहन। किन्ज्योॱराङ दिगी पाङबु ज़्य़ू नाङदी येह। 6 मास्यीकाकी ल़ेह-पेन यिहन्गे सोङबे ङ्यिहगी ख्या फ़ेबे-म़ेहमेॱया थो़ला ओङ छ्य़े ख़ूज्ये येहकें। यिहॱनाङ ङ्यिहला मिहया़गी ची़नाङ पेहच्यु म़ेदी ङ्यिहगी माहछोल, ख्या लाहमलेॱआङ छोल्दी म़ेह ओहले लेहमेन मिह लाहमलेॱआङ छोल्दी म़ेह। 7 यिहॱनाङ येशू मास्यीकागी ङ्यिहला दाम्दी ल़ेह-पेन ज़ो नाङग्यो सोङगोराङ राहङगी पेहजाया़ला चारा पेहकें आमा ल़ेहमुराङ ङ्यिह ख्या फ़ेबे-म़ेहमेया़गी पाहरक्यीला ङ्येम्बु काहल्सीन। 8 तेहम्बाराङ ङ्यिहगी ख्या फ़ेबे-म़ेहमेया़ला निङज्यी पेहती येह, राहङ फेबे-मे़हमेया़दी ङ्यिहला ज्यिबुराङ निङ च्येहएँ, माज्येराङ माना किन्ज्योकी लेहङगु या़हबु च्यी़राङ मिहम्बा ङ्यिहगी मिहली थाम्ज्यीराङ ख्या फ़ेबे-म़ेहमेया़गी तेहन्दाला तेर्च्येलाॱआङ ठाबे काहल्दी येहकें। 9 ए आदा-नो़ह दाङ आज्यी-नुहमुया़, ङ्यिहगी तुहक्पु दाङ कादुप च्येक्यो राहङ फ़ेबे-म़ेहमेया़ला टेहम्बा येहॱराङ येह। ख्या फ़ेबे-म़ेहमेॱया सुज्यीलाॱआङ तुहक्पु माहयोहङज्यु म़ेदी ङ्यिहगी ङ्यिहन-नुहप ल़ेह पेहती किन्ज्योगी लेहङगु या़हबु ख्या फ़ेबे-म़ेहमेया़ला स्य़ेसीन। 10 ख्या किन्ज्योला यिह-छ्य़ेक्योया़ ङ्याम्बु तेहकेमु ङ्यिहगी नाम्पार-ताहक्पा पेहती, टाहङबु पेहती ओहले च्यिॱआङ क्येन म़ेहबा पेहती तेहसीन। दिगी पाङबुनी किन्ज्यो दाङ ख्या फे़बे-मे़हमेया़ॱराङ ज़्य़ू नाङदी येह। 11 ओहले आबागी राहङगी पुह पोहमोया़ला काह-ठि पेहती चारा जे नाङगे, ओ़हठीॱराङ पेहती ङ्यिहगी ख्या फ़ेबे-म़ेहमेॱया ऱेह-ऱेहला चारा पेहक्योदी ख्या फ़ेबे-म़ेहमेया़गी ज़ी़ नाङदी येह। 12 ख्यागी डोलु-तेहलुया़ किन्ज्योला सी़ह ख़ूएँगी मिहजी ओहङ ख़ूज्यु म़ेदी ङ्यिहगी ख्या फ़ेबे-म़ेहमेया़ला स्युक क्ये च्य़ूएँराङ सेम ज़ुङ च्य़ूदी थाल्मा च्याहरको येह। च्यिबेमाना किन्ज्योगी ख्या फ़ेबे-म़ेहमेया़ला मिहरोगी राहङदीराङ क्याहल्सी दाङ ज़िज्यिदला क़े क्याहप नाङदी येह। 13 ओ़ह सोङबे दिगी तेहन्दाला ङ्यिहगीॱआङ किन्ज्योला नाहम माॱनाङ थुज्यी-छ्ये़ फुल्गे, च्यिबेमाना ङ्यिहगी ख्या फ़ेबे-म़ेहमेया़ला किन्ज्योगी लुहङ स्येकेमु ख्या फ़ेबे-म़ेहमेया़गी दि लुहङ ङ्यिहती मिहम्बा यिहॱनाङ दि लुहङ किन्ज्योदीॱराङ यिहम्बा म़ेदी ची़सीन। यिहन्ज्येॱआङ दि तेहम्बाराङ किन्ज्योदीॱराङ लुहङ यिहन्गे। ता़ह यिह छ्य़ेगे ख्या फ़ेबे-म़ेहमेया़गी पाहरक्यीला दि लुहङगी छ्या़ले जे नाङगेराङ येहबा। 14 ङाहगी आदा-नो़ह दाङ आज्यी-नुहमुया़, ख्या फ़ेबे-म़ेहमेया़गीॱआङ मास्यीका येशूला यिह छ्य़ेक्यो यहूदीया लुहङबाला येहकेन्गी किन्ज्योकी छेन्छोकया़की पे ताएँ काहल्सीन, च्यिबेमाना यहूदीया़की छेन्छोकगी इस्राएली लाहमले काह-ठि पेहती तुहक्पु खुर्पा, ओ़ह ल़ेहमुराङ पेहती ख्या फ़ेबे-म़ेहमेया़गीॱआङ राहङदीराङ क्यिहपाकी मिहया़ ङो़ले तुहक्पु खुर नाङसीन। 15 ओ़ह यहूदीया़गीॱराङ चो़वो येशूला सेसीन ओहले लुहङतेम्बाया़लाॱआङ सेसीन, ओहले ङ्यिहया़ला ङेती ताङसीन। खुङया़गी किन्ज्योला थु माहङ्य़ेहबागी ल़ेहया़ पेहसीन ओहले मिह थाम्ज्यीला टाह पेहसीन। 16 लेहमेन क्यिहपाकी मिहया़ला थार्पा तेर्केन्की या़हबु लेहङगु ङ्यिहला स्ये मा़हच्यु। दि ल़ेहमु पेहती किन्ज्योगी ज़ी़नाङला खुङया़गी गो़ तिहक्पागी काहङदी काहल्सीन। यिहॱनाङ ता़ह ज्युक्स्योलला किन्ज्योगी थुयाल खुङ थो़ला बाप्ती येह। 17 आदा-नो़ह दाङ आज्यी-नुहमुया़, ङ्यिह याहम्बीज्यीगी तेहन्दाला ख्या फ़ेबे-म़ेहमेॱया ङ्याम्बु ज़ुबुले खा फ़ेदी काहल्ग्यो यिहॱनाङ ङ्यिहगी सेमनी ख्या फ़ेबे-म़ेहमेॱया ङ्याम्बुराङ येह। ख्या फ़ेबे-म़ेहमेॱया ङ्याम्बु येहपाराङ थ़ू ओहङज्ये ङ्यिहती ज्यिबुराङ सेम्बा येहकें सोङबे ख्या फ़ेबे-म़ेहमेॱया साला लोह ओहङज्येला ङ्यिहगी ला़ खाजेबा स्युक पेहती येह। 18 ङ्यिह ख्या फ़ेबे-म़ेहमेॱया साला ओहङज्ये छोल्सीन। ङाह पावलदी लेहमा माहङबुराङ ओहङज्ये म़ेदी ला़ खाजेबा स्युक पेहसीन यिहॱनाङ ती़ह गो-छ्येवागी ङ्यिहला ओहङॱराङ मा़हच्यु। 19 ता़ह ओहराङगी चो़वो येशू फेप नाङगेन्गी ती़हजीला ङ्यिहगी रेहवा, काहसो, चा़ जेती नाङगेन्गी पेस्यो च्यि माॱनाङ ख्या फे़बे-मे़हमेया़ॱराङ यिहन मिहम्बा ले? 20 तेहम्बाराङ ङ्यिहगी ज़िज्यिद दाङ काहसो ख्या फे़बे-मे़हमेया़ॱराङ यिहन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.