१ थेसलोनिकी 1 - ह्योल्मोटास्यी-देले 1 पावल, सिलास दाङ तिमोथी लाहमले किन्ज्यो याहप दाङ चो़वो येशू मास्यीकाकी थेसलोनिकीया़गी छेन्छोकला काटीन दाङ स्य़िहदे ओहङज्यु। थेसलोनिकीया़गी डोलु-तेहलु दाङ यिह-छ्य़े 2 ङ्यिहगी सोल्वाङ ताप्कें टाहङमाराङ ख्या फे़बे-मे़हमे थाम्ज्यीला टेहम्बा साल्दी नाहम माॱनाङ किन्ज्योला थुज्यी-छ्ये़ फुल्गो येह। 3 च्यिबेमाना ओहराङगी किन्ज्यो दाङ याहपकी दिनला ख्या फे़बे मे़हमेया़की तेहपाकी ल़ेह दाङ चेवा लाहमले पेहक्योकी कादुप ओहले ओहराङ चो़वो येशू मास्यीका थो़ला ज़्या़क्योकी रेहवाला ख्या फ़ेबे-म़ेहमेया़गी क़ूह तेहती येहबा म़ेदी ङ्यिहगी नाहम माॱनाङ टेहम्बा साल्दीॱराङ येह। 4 किन्ज्योगी चेवा जे नाङग्योकी आदा-नो़ह दाङ आज्यी-नुहमुया़, ख्या फ़ेबे-म़ेहमेया़ला किन्ज्योगीॱराङ दाम नाङग्यो यिहन म़ेदी ङ्यिहला क्यी़ह येह। 5 च्यिबेमाना ङ्यिहगी ख्या फ़ेबे-म़ेहमेया़गी पाहरक्यीला लेहङगु या़हबु ख्योङगेमु तामला च्यी़राङ मिहम्बा, यिहॱनाङ नाम्पार-ताहक्पा थु दाङ ओङ लाहमले ख्या फ़ेबे-म़ेहमेया़गी तेहन्दामकी लेहङगु या़हबुया़ यिह छ्य़े ख़ूएँ पेहती ख्योङदी ओहङसीन। ङ्यिह ख्या फ़ेबे-म़ेहमेॱया ङ्याम्बु तेहकेमु ङ्यिहगी ख्या फ़ेबे-म़ेहमेया़गी तेहन्दाला ङ्यिहगी मिहजी काहन्डुमु पेहती ताङबा, ओ़ह राहङया़ला थुयी़राङ येह। 6 ख्या फ़ेबे-म़ेहमेया़गी ङ्यिह दाङ चो़वोला पे तासीन, च्यिबेमाना नाम्पार-ताहक्पा थुगी नाङग्योकी सुङ ख्या फ़ेबे-म़ेहमेया़गी ज्यिबुराङ तुहक्पुगी ती़हजीॱलाङ सेम काहसो पेहती ल़ेहन नाङसीन। 7 दि ल़ेहमु पेहती ख्या फ़ेबे-म़ेहमेॱया माकेडोनिया दाङ अखैया लुहङबाला येहकेन्गी किन्ज्योला यिह छ्य़ेक्यो मिह थाम्ज्यीगी पाहरक्यीला राहङगी पे तेन ख़ूएँ काहल्सीन। 8 च्यिबेमाना ख्या फ़ेबे-म़ेहमेॱया लाहमले चो़वोकी लेहङगु या़हबु माकेडोनिया दाङ अखैया लुहङबाला च्यी़राङ माहस्ये, यिहॱनाङ चो़वोला ख्या फ़ेबे-म़ेहमेया़गी तेहपा पेहक्योकी ताम थाम्ज्यी ग्या़या़ला फेल्दी येह। दिगी तेहन्दाला खुङया़ला लेहमेन च्यि तामॱआङ मा कोहबा म़ेह। 9 च्यिबेमाना ङ्यिह ख्या फ़ेबे-म़ेहमेॱया साला ओङगेमु राहङ फ़ेबे-म़ेहमेया़गी ङ्यिहला या़हबु पेहती फेप स्युह नाङसीन ओहले सोम्बो दाङ तेहन्दामकी किन्ज्योला स्याहप्तो स्य़ूहज्येला ख्या फ़ेबे-म़ेहमेया़गी कुया़ला छ्येपा फुल्गेन्गी ल़ेहया़ला क्युर ज़्या़दी किन्ज्यो ङो़ले लो़ह फेप्सीन। दि केच्याया़नी ओ़ह मिह थाम्ज्यीगीॱराङ स्येके। 10 ओहले स्यिहङगामले माहर फेप नाङज्ये येह म़ेदी लाहम क़ूह तेहकेन किन्ज्योगी स़ेबुला किन्ज्योगीॱराङ टोङग्यो ग्या़लेगी सोम्बो ज़्याङ च्य़ू नाङसीन। ओ़ह स़ेबुराङ येशू यिहम्बा, ओहले ताहन्दा राहङया़गी क़ूह तेहक्योदीॱआङ मिह-रो़हलाॱराङ यिहम्बा। ओहले ओहराङ थो़ला ओहङज्ये पेहक्योगी किन्ज्योकी थुयाल ङो़ले थार च्य़ू नाङगेन्दीॱआङ मिह-रो़हराङ यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.