१ पत्रुस 5 - ह्योल्मोएल्डरया़ दाङ स्यारा-स्यार्माया़ला लुहङ 1 ङाहॱआङ छेन्छोककी एल्डर यिहन्गे सोङबे ङाह ख्या एल्डरया़ला ओहर-छ्य़े स्युहउ येहबा च्यिबेमाना मास्यीकागी तुहक्पु खुर नाङग्यो ङाहगी थोङदी येह ओहले मास्यीकाकी राहङगी ज़िज्यिद तेन नाङगे ङ्यिहमाला ङाहॱआङ मिहरो ङ्याम्बु ओहङज्ये येह। 2 ल़ूह ताहक्पुगी राहङगी ल़ूह बा़लया़ला चारा पेहकें ल़ेहमुराङ ख्यागी पाहरक्यीला येहकेन्गी किन्ज्योगी छो़बाया़ला चारा पेहतोङ। कारगी मिहम्बा यिहॱनाङ राहङ सेम तिहङ यिहन्ज्युराङ, क्युहगी ह्अम्बागी पेहती मिहम्बा यिहॱनाङ क़ेहनाङ पेहती, 3 ख्यागी जिम्माला येहकेनया़ थो़ला ओङ छ्य़ेगे मिहम्बा यिहॱनाङ ल़ेह या़हबु पेहती खुङया़गी दिनला पे या़हबु तेन्दोङ। 4 ओहले ल़ूहकी ताहक्पु ङोहदोराङ थेन फेप्केमु ख्याया़गी नाहमॱआङ याहल्दी मेहन्डोएँगी ज़िज्यिदकी पेस्यो ज्योर्च्ये येह। 5 ओ़ह ल़ेहमुराङ पेहती स्यारा स्यार्माया़, राहङ म़ेदी छ्यिम्बु मिहया़गी ओङ चो़ला तेहतोङ। ख्या मिह थाम्ज्यी ङ्याम्बु स्यिहवा पेहती च्यी़गी च्यी़ला रो़हराम पेहतोङ। च्यिबेमाना छ्य़ेला दि ल़ेहमु सुङ नाङदी येह, “किन्ज्योगी छ्य़ेन्दो तेन्गे मिहया़ला टाह जे नाङगे, यिहॱनाङ स्यिहवा पेहकें मिहया़ला काटीन नाङगे।” 6 ओ़ह सोङबे किन्ज्योगी ओङज्या छ्यिम्बु छ्या़ चो़ला राहङला स्यिहवा पेहसीनमाना किन्ज्योगी राहङगी ती़हजीला ख्याया़ला याहर याहर क्या़ नाङज्ये येह। 7 ख्यागी थाम्ज्यी तुहङालया़ किन्ज्योला चि क्याहप्तोङ, च्यिबेमाना किन्ज्योगी ख्याया़ला चारा जे नाङगे। 8 जेम्बु पेह, ओहले ङ्यि छेत्ती तेहतोङ, ख्याया़गी टाह दियाबलस सुला च्य़ेह सिहन्वा ओहले दाकराङ ताङज्ये म़ेदी ङाहर्केंन्गी सिङग्यी कार्मु ल़ेहमु छोल्दी डोएँ। 9 यिह-छ्य़ेला सान्दी तेहती खोला टाह पेहतोङ, च्यिबेमाना ख्यागी ल़ेहमुराङ छ्यो़ ज़्यिला किन्ज्योला यिह-छ्य़े पेहक्यो लेहमेन ख्यागी आदा-नो़ह दाङ आज्यी-नुहमुया़गीॱआङ तुहक्पु खुर्ती येह माएँ ताम ख्याया़ला क्यी़हराङ येह। 10 थाम्ज्यी काटीनकी किन्ज्योगी मास्यीकाला यिह-छ्य़े नाङदी राहङदी नाहमॱआङ मिहसीहन्गेन्गी ज़िज्यिद नाङज्येला ख्याया़ला क़े क्याहप नाङदी येह। ख्यागी ङ्यिहमा तोबाज्यी तुहक्पु खुर फान्ज्यो मिहरोगीॱराङ ख्याया़ला येहपाराङ साम्बा ज़ो नाङज्ये येह, ओहले ख्यागी सेम थिक-चिला ज़्या़दी ओङज्या छ्यिम्बु ज़ो नाङज्ये येह ओहले ब्राम सान्दी तिङग्यो ग्या़ला ज़्या़ नाङज्ये येह। 11 नाहम्स्यी किन्दु ओङज्या छ्यिम्बु मिहरोदीॱराङ ओहङज्यु। आमेन। 12 यिह-छ्य़ेबुकी नो़ह सिलासकी रो़हराम लाहमले ङाहगी ख्याया़ला दि यिहगी प्रुहएँॱराङ येहबा। ङाहगी दि थाम्ज्यी किन्ज्योगी तेहन्दामकी काटीनकी पाङबु तेर्च्येला ओहले स्युक तेर्च्येला प्रुहक्यो यिहम्बा। दि केच्याला ख्या सेम थिक-चि पेहती तेहतोङ। 13 ख्याया़ ङ्याम्बु-ङ्याम्बुराङ किन्ज्योगी दाम नाङग्यो बेबिलोनकी छेन्छोक दाङ ङाहगी पुह मर्कूसगीॱआङ ख्याया़ला टास्यी-देले ताङदी येहबा। 14 मास्यीकाकी चेवागी च्युक पेहती च्यी़गी च्यी़ला टास्यी-देले म़े तेर। मास्यीकाला यिह-छ्य़े पेहक्यो ख्या फे़बे-मे़हमे थाम्ज्यीला स्य़िहदे ओहङज्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.