१ पत्रुस 4 - ह्योल्मोकिन्ज्योगी तेहन्दाला थार कोहएँ 1 काह-ठि जेती मास्यीकागी राहङगी कुसोला तुहक्पु खुर नाङबा, ओ़ह ल़ेहमुराङ पेहती ख्याया़गीॱआङ ओ़ह ल़ेहमुराङ छ्याप्स्यीगी सेम्बाया़ थो़दोङ, च्यिबेमाना का़हन्दीगी ज़ुबुला तुहक्पु खुर्के, खोगी तिहक्पा पेहच्ये क्युर सिहन्ग्यो ओहङगे। 2 दि ल़ेहमु पेहती खोगी राहङगी मिहलीकी ओहङगेन ती़हजीया़ला येहपाराङ मिहगी सेमला ने़जेबाकी चोक्पा लाहमया़ला खो स्य़ूहदी डोज्ये म़ेह, यिहॱनाङ खोगी किन्ज्योगी थु ङ्ये़बाकी मिहजी ताङज्ये येह। 3 काहल्ग्यो ङ्यिहमाया़ला लेहमेन क्यिहपागी मिहया़गी ल़ेहमु पेहती ख्याया़गी छ्येउ-छ्येंमु पेहको येहकें, ज़ुबुकी तेहन्दाला चोक्पा-चोक्पा सेमया़ थोउ येहकें, छ्याङसीवा येहकें, खाम्साङ-ङ्याहम्साङ पेहको येहकें, कुहन्डुमकी-निङगु थुङगेन्गी डेनया़ ज़्या़गो येहकें, ओहले नाम्दो लाहङज्ये ल़ेहमु कुया़ला छ्येपा फुल्दी तेहको येहकें। 4 ख्या खुङ ङ्याम्बु ओ़ह ल़ेहमु ल़ेह चोक्पागी लाहमला मा़हस्युहबा थोङदी खुङ ह्अ ल़ेहगे, ओहले खुङगी ख्याया़गी ताम च्येहके। 5 यिहॱनाङ सोम्बो मिह दाङ स्यिक्यो मिहया़ला ठिम ताङ नाङगेन किन्ज्योगी दिनला दिगी तेहन्दाला खुङया़गी चिदुङ तेर कोहच्ये येह। 6 ओ़ह सोङबे खुङया़गी मिहया़गी ल़ेहमुराङ पेहती ज़ुबुला ठिम ज्योरॱनाङ यिहला खुङया़ किन्ज्यो ल़ेहमु पेहती थार ख़ूज्यु म़ेदीराङ स्यिक्यो मिहया़लाॱआङ या़हबु लेहङगुया़ स्य़ेक्यो यिहम्बा। 7 ता़ह ना थाम्ज्यी तोङदी डोएँगी ती़हजी पोहलाराङ लेप सिहन्दी येह। ओ़ह सोङबे राहङगी सोल्वाङकी तेहन्दाला राहङ सेम थिक-चिला ज़्या़दी जेम्बु पेहती तेहतोङ। 8 थाम्ज्यी म़ेदी छ्यिम्बु ताम, च्यी़गी च्यी़ला सेम तिहङ यिहन्ज्युराङ चेवा पेहतोङ च्यिबेमाना चेवागीॱराङ रेबेॱराङ तिहक्पाया़ला उप्के यिहम्बा। 9 ङ्येहर्स्यी माहबेबा पेहती च्यी़गी च्यी़ला ता़हनाङ-ताहम्जी पेहतोङ। 10 किन्ज्योगी काटीनला ख्या रे़ह-रे़हगी नामे नाजोकी काबापया़ ज़्योरक्यो येहबा ओ़ह काबाप ख्या थाम्ज्यीगी मिहया़ला रो़हराम पेहच्येगी तेहन्दाला या़हबु पेहती चाल तिदोङ। 11 लुहङ तेर्केन्की काबाप ज़्योरक्यो मिहगी किन्ज्यो लाहमलेॱराङ लुहङ तेर्च्यु। स्याहप्तो स्युहएँ मिहगी किन्ज्योगी ओङ लाहमले स्याहप्तो स्युहज्यु। ओ़ह ल़ेहमु पेहती ल़ेह थाम्ज्यीला येशू मास्यीका लाहमले किन्ज्योलाॱराङ ज़िज्यिद ओहङज्यु। मिह-रो़हलाॱराङ ज़िज्यिद दाङ ओङ नाहम्स्यी किन्दु ओहङज्यु! आमेन। तुहक्पुगी ती़हजीलाॱआङ सेम काहसो पेह कोहएँ 12 ए ङाहगी च्याहम्बु रो़हया़, ख्यागी ना़ॱराङ मी़हखुएँगी मेह ल़ेहमु ङ्याहम्छेया़ ख्याया़ थो़ला बाप ओहङगेमु च्यिरा याहम्जेम्बागी से़हया़ काहल्ग्यो ल़ेहमु ख्या ह्अ मा़हले। 13 यिहॱनाङ मास्यीकाकी तुहक्पु ख्यागीॱआङ ङ्याम्बुराङ खुर ङ्युहङगेमु क़ेहनाङ पेहतोङ, ओहले मास्यीका राहङगी ज़िज्यिद छ्यिम्बुला फेप नाङगेमु ख्याॱआङ क़ेहनाङ दाङ सेम काहसो पेह ख़ूज्ये येह। 14 का़हलेॱआङ मास्यीकाकी छेनला ख्याला मिहया़गी स्ये़हन्डील पेहसीनमाना ख्या काहजे सोनाम-साक्पु यिहम्बा। च्यिबेमाना ज़िज्यिद दाङ किन्ज्योकी नाम्पार-ताहक्पा थु ख्याया़ ङ्याम्बु ज़्य़ू नाङदी येह। 15 यिहॱनाङ ख्याया़गी का़हलेॱआङ तुहक्पु खुरॱटाङ कोहसीनमाना मिहला सेत्ती, कुमेन क्याहप्ती, ल़ेह चोक्पा पेहती, क्यिनी लेहमेन मिहया़गी ल़ेहला लाहक्पा क्याहप्ती तुहक्पु खुर माहकोहज्यु। 16 यिहॱनाङ सुज्यीगी मास्यीकापा काहल्ग्यो सोङबे तुहक्पु खुर कोहएँमु ङोह माहछा। यिहॱनाङ मास्यीकाकी छेन ल़ेहन ङ्युहङगेमु किन्ज्योला थुज्यी-छ्ये़ फुल्दोङ। 17 च्यिबेमाना ता़ह ठिम ताङगेन्गी ती़हजी पोहला लेप सिहन्दी येह। किन्ज्योगी ठिम ताङ नाङगेमु तोहङस्यो राहङ मिहया़ नाहङलेॱराङ छ़ू नाङज्ये येह। किन्ज्योगी ओहराङलानी ठिम ताङ नाङगे मासीमानानी जेन किन्ज्योकी या़हबु लेहङगुला मी़हचीगेन मिहया़ला काहन्डुमु ठिम ताङ नाङवा? 18 छ्य़ेगी दि ल़ेहमु सुङ नाङदी येह, “टाहङबु मिहला थार च्य़ूज्येलानी काहजे का़हबु ओहङगे मासीमानानी जेन किन्ज्योलाॱराङ मी़हचीगेन तिहक्च्येम्बा मिहया़गी गादीनी च्यि ओहङडो?” 19 ओ़ह सोङबे किन्ज्योगी थु ङ्ये़बाकी तुहक्पु खुर्केनया़गी ल़ेह या़हबु पेहच्यु ओहले खुङया़गी राहङगी सेम साज्या-नाम्ज्या छ्या़ नाङगेन यिह-छ्य़ेबु किन्ज्योला चि क्याहप्च्यु। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.