१ पत्रुस 3 - ह्योल्मोख्योवा-पी़हमी 1 ओ़ह ल़ेहमुराङ पेहती पी़हमी-पेहजाया़, ख्याया़ॱआङ राहङ ख्योवागी ओङ चो़ला तेहतोङ, ओहले दि ल़ेहमु पेहती खुङया़गी किन्ज्योगी सुङला मी़हचीॱनाङ राहङगी पी़हमीकी डोलु-तेहलु पेहती ताम छिका च्यी़ॱआङ मा़हमेबा पेहती खुङया़गी सेम ग्युर ख़ूज्ये येह। 2 च्यिबेमाना ख्याया़गी डोलु-तेहलु चाङमा थोङदी ओहले मिहया़गी ख्याला ची़नाङ पेहक्यो थोङदी खुङया़गी सेम ग्युर्च्ये येह। 3 ख्या राहङ गो़गी टा ज़ाप्ती, सेरकी केहन्ज्याया़ ता़दी, ओहले रिहन माहङबु डोएँगी काप्च्या केहन्दी फि ज़ाप्के मिहम्बा, 4 यिहॱनाङ ख्यागी नाहङ सेमदी या़हबु ओहङ कोहकें, ओ़ह नाहमॱआङ याहल्दी मेहन्डोएँ ङ्येम्ज्युङ दाङ स्य़िहदेकी केहन्ज्याया़गी राहङगी सेम ज़ाप कोहएँ यिहम्बा ओ़ह किन्ज्योगी ज़ी़लुला ज्यिबुराङ रिहन केहपु येहबा। 5 च्यिबेमाना दि ल़ेहमुराङ छ्याप्स्यी पेहती तोहङ तोहङले किन्ज्यो थो़ला रेहवा पेहकें नाम्पार-ताहक्पा पी़हमी पेहजाया़गीॱआङ ज़ाप्को येहकें, ओहले राहङ ख्योवागी ओङ चो़ला तेहको येहकें। 6 सारा ओ़ह ल़ेहमुराङ येहकें, मोहगी अब्राहामकी माक्यो तामया़ ङ्यिहन्गो येहकें, मोहगी अब्राहामला “ङाहगी ताहक्पु” म़ेदी माउ येहकें। का़हलेॱआङ ख्याया़गी च्यि तामॱलाङ मा़हन्ज्यीबा पेहती ल़ेह या़हबुया़ पेहसीनमाना ख्याया़ सारादीॱराङ पोहमोया़ सी़हज्ये येह। 7 क्येप-ख्योवाया़, ओ़ह ल़ेहमुराङ पेहती राहङगी पी़हमीया़गी सेम छ्ये़मु दाङ ज़ुबुला स्युक ङ्ये़हमु ओहङगे माएँ ताम ह्अ के़हदी खुङया़ला ची़नाङ पेहतोङ च्यिबेमाना खुङया़गीॱआङ ख्या ङ्याम्बु-ङ्याम्बुराङ मिहली ज्योर्च्ये येह, दि ल़ेहमु पेहती ख्याया़गी सोल्वाङ ताप्केमु च्यिॱआङ ङ्याहम्छेया़ माहयोङज्यु म़ेदी च्यी़गी च्यी़ला छ्याप्स्यी या़हबुया़ पेहकें पेहतोङ। ल़ेह या़हबु पेहकेमु ओहङगेन्गी तुहक्पुया़ 8 ज्युक्स्योलला ख्या थाम्ज्यी सेम च्यी़ टी़हदी, च्यी़गी च्यी़ला सेम ज़ुङ च्य़ूगेन्गी छ्याप्स्यीया़ पेहतोङ, राहङ आदा-नो़ह दाङ आज्यी-नुहमुया़ॱराङ यिहम्बा ने़दी च्यी़गी च्यी़ला चेवा पेहतोङ, निङज्यी पेहतोङ ओहले ङ्येम्ज्युङ पेहतोङ। 9 सुज्यीगी चोक्पा पेहसीन म़ेदी खोलाॱआङ चोक्पा माहबे, खोगी मे़मु क्याहप्सीन म़ेदी ख्यागीॱआङ खोला मे़मु माहक्याहप यिहॱनाङ ओ़हगी छापला खोला मेलाम क्याहप्तोङ च्यिबेमाना दिगी तेहन्दालाराङ ख्याया़गीॱआङ मेलाम ल़ेहन ख़ूज्यु म़ेदी किन्ज्योगी ख्याला क़े क्याहप नाङग्यो यिहम्बा। 10 च्यिबेमाना, “का़हन्दीगी मिहलीला चेवा पेहकें ओहले ङ्यिहमा या़हबुया़ थोङगेन्गी सेम्बा पेहकें, ओ़हदीगी राहङगी च्येलेला ल़ेह चोक्पा ङो़ले ओहले राहङगी खाला चिहन क्याहप्केन्गी तामया़ माएँ ङो़ले था़-रिहङबुराङ ज़्या़दोङ। 11 खो ल़ेह चोक्पालेगी लो़हज्यु ओहले ल़ेह या़हबु पेहच्यु, खोगी स्य़िहदेगी लाहम छोल्ज्यु ओहले ओ़हगी तिङ ङ्या़ज्यु। 12 च्यिबेमाना चो़वोगी च्याहङज्यु सेम्बा थो़क्यो मिहया़ला ज़ी़ नाङगे, ओहले चो़वोगी ख्याया़गी सोल्वाङ सेन नाङज्ये येह, यिहॱनाङ ल़ेह चोक्पा पेहकेनया़ला चो़वोगी क्याहप लो़ह नाङज्ये येह।” 13 ख्याया़गी ल़ेह या़हबु पेहकेन सेम्बा पेहसीनमाना ख्याया़ला सुगी ने क्याल ख़ूएँ ले? 14 यिहॱनाङ ल़ेह या़हबु पेहके पेहकेंमुॱआङ तुहक्पु खुर कोहसीनमाना ख्याया़ काहजे सोनाम-साक्पु। खुङया़गी ज्यी़-ङोर तेन्सीन म़ेदी ख्या मा़हन्ज्यी, ओहले का माहक्याहल। 15 यिहॱनाङ मास्यीकाला चो़वो ने़दी ख्ये सेमगी मास्यीकाला ची़नाङ पेहतोङ। ख्या नाहङला येहकेन्गी रेहवागी तेहन्दाला सुज्यीगी टी़हसीन माना ओ़हगी ल़ेहन क्याहप्च्येला नाहम्माॱनाङ ठाबे पेहती तेहतोङ, यिहॱनाङ ओ़ह ल़ेह ङ्येम्बु दाङ ची़नाङ पेहती पेहतोङ। 16 ख्याया़गी नावा नाहम-माना चाङमा ज़्या़दोङ, ओ़हठी पेहसीमाना ख्याया़गी मास्यीकाला तिङ ङ्या़गेमु पेहक्योगी या़हबु छ्याप्स्यीया़ थोङदी ख्याला आब्रु तेन्गेया़ खुङ राहङराङ ङोहजाला छ्यिच्ये येह। 17 ल़ेह चोक्पा पेहती तुहक्पु खुर्के म़ेदीनी ल़ेह या़हबु पेहती किन्ज्योगी थु-ङ्य़ेबेगी तुहक्पु खुर्केॱराङ सोनाम-साक्पु यिहम्बा। 18 च्यिबेमाना ओहराङला किन्ज्यो साला ख्योङज्येला नाहम-मानाकी तेहन्दाला ताहङस्यी जेती मास्यीकाॱआङ तिहक्पाया़गी तेहन्दाला लेहमा च्यी़ टोहङ नाङसीन। नाम्पार-ताहक्पा मिह तिहक्च्येम्बाया़गी तेहन्दाला मास्यीका राहङगी कुसोला टोहङ नाङसीन यिहॱनाङ थु लाहमले मिहरो येहपाराङ सोम्बो ज़्याङ नाङसीन। 19 ओहले ओ़ह थु लाहमलेॱराङ मिहरो फेप नाङसीन ओहले ताहम्दी ज़्या़क्योगी नाम्स्यीया़लाॱआङ सुङदेन प्रा साल नाङसीन। 20 ओ़ह नाम्स्यीया़दी, ताहङबो नोआगी छ्यु-टुह ज़ो नाङगे ती़हजीला तिहक्पालेगी लो़हगे यिहम्बानी म़ेदी किन्ज्योगी लाहम ज़ी़ नाङग्योकी नाम्स्यीया़ यिहन्गे। यिहॱनाङ खुङया़गी किन्ज्योला माहङ्यीहन। छ्यु-टुह नाहङला येहकें ङ्युहङसे़ मिहया़, मेहन्दा क्ये़ह च्यी़राङ छ्यु लाहमले थार्सीन। 21 दि छ्युगी, बप्तिस्माकी पे तेन्गे दिगी ख्याला थार च्य़ूगे। दि ज़ुबुकी ङ्योक्पाया़ स्याल्ग्यो ल़ेहमु मिहम्बा यिहॱनाङ दि नावा चाङमा थो़दी किन्ज्यो ङ्याम्बु ज़्या़क्योगी ताहम्ज्या यिहम्बा। येशू मास्यीका टोहङग्योलेगी सोम्बो ज़्याङ नाङग्यो सोङबे बप्तिस्मागी ख्याला थार च्य़ूगे। 22 मिहरो स्यिहङगामला फेप नाङसीन ओहले स्यिहङगामकी स्याहप्च्यीया़, ओङ छ्य़ेगेया़ दाङ ओङज्याया़ला राहङगी ओङ चो़ला ज़्या़दी किन्ज्योकी योबा ङो़ले ज़्य़ू नाङदी येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.