१ पत्रुस 1 - ह्योल्मो1 येशू मास्यीकाकी ल़ेह-पेन ङाह पत्रुस लाहमले पोन्टस, गलातीया, कापाडोकिया, एशिया दाङ बिथिनिया साने़या़ला राहङगी क्याहल-खाप यिहन्ज्यु काहल्दी फेतोर कोहतोर काहल्ग्योया़ला, 2 तोहङ यिहन्ज्युराङ राहङगी ज़ो नाङग्योगी च्याहम्दा लाहमले जेती किन्ज्यो याहपकी ख्याया़ला राहङदीराङ नाम्पार-ताहक्पा मिहया़ ज़ो नाङज्येला दाम नाङग्यो यिहम्बा। येशू मास्यीकाकी ठा़गी नाम्पार-ताहक्पा काहल्दी मिहरोकी काया़ ख्याया़गी ची़ ख़ूज्यु म़ेदी किन्ज्योगी ख्याया़ला नाम्पार-ताहक्पा थु लाहमले राहङदी ज़ो नाङसीन। किन्ज्योगी ख्याया़ला काटीन दाङ स्य़िहदे माहङबु म़ेदी माहङबु नाङज्यु। था़ म़ेहबा मिहलीगी रेहवा 3 ओहराङ चो़वो येशू मास्यीकाकी याहप किन्ज्योला थुज्यी-छ्ये़। किन्ज्योगी थुज्यी लाहमले टोहङग्योलेगी येशू मास्यीकाला सोम्बो ज़्याङ च्य़ू नाङदी मिहरोगी ओहराङला मिहली साम्बा नाङसीन। ओ़ह सोङबे ओहराङ थाम्ज्यीगी सोम्बो रेहवा ज्योर्ती येह। 4 स्यिहङगामला ख्याया़गी तेहन्दाला सी़दे ज़्या़क्योगी फास्यी नाहमॱआङ तोङदी डोज्ये म़ेह, नाहमॱआङ नोङज्ये म़ेह ओहले नाहमॱआङ तोर्च्ये म़ेह। 5 तिङमा ती़हजीला ओहङज्ये पेहक्योगी थार्पागी तेहन्दाला ख्या तेहपा लाहमले किन्ज्योगी ओङ लाहमले जेम्बु जेती ज़्या़ नाङदी येह। 6 दि केच्याया़की तेहन्दाला ख्या काहसो पेहतोङ। यिहन्ज्येनी, ताहन्दा ख्याया़गी ङ्यिहमा ङ्युहङसेगी तेहन्दाला नामे-नाजोगी तुहक्पुया़ खुर के़हदी येहबा। 7 ओ़ह तुहक्पुया़ ख्यागी च्यिबे खुर कोहक्यो मासीमाना ओ़ह तुहक्पुया़ लाहमले ख्यागी किन्ज्योला यिह छ्य़ेक्योदी तेहम्बाराङ यिहम्बा दु म़ेदी ताहक्स्यार ओहङज्येगी तेहन्दाला यिहम्बा। तोङदी डोएँगी सेरलानी मेहला सा़दी या़हबु चोक्पा खा फ़ेदी ताहङमा ज़ोएँ मासीमाना ख्याया़गी यिह-छ्य़ेनी ओ़ह म़ेदीॱआङ माहङबु चा़ छ्यिम्बु यिहम्बा। ओ़ह सोङबे दि यिह-छ्य़ेला क्ये़ह चाङमा ज़ोज्येला ङ्याहम च्येकें। दिगी पेहती येशू मास्यीका फेप नाङगे ङ्यिहमाला ख्या तेच्या, ज़िज्यिद दाङ चा़ सी़हएँगी मिहया़ ओहङ ख़ूज्यु। 8 ख्यागी येशू मास्यीकाला थोङग्यो मे़हॱनाङ मिहरोला चेवा पेहकें। मिहरोला ख्यागी ताहन्दा थोङ मी़हखुएँ, यिहॱनाङ ख्यागी मिहरोला यिह-छ्य़े पेहकें। ओहले स्येॱराङ मी़हखुएँगी ज़िज्यिद छ्यिम्बु काहसोगी ख्याया़गी सेम काहङदी येह। 9 च्यिबेमाना ख्याया़गी येशू मास्यीकाला तेहपा पेहक्यो सोङबे ख्याया़गी यिहकी थार्पा ज्योर्ती येह। 10 ख्यागी ज्योरक्योकी दि थार्पाकी तेहन्दाला ङोह स्य़ेज्येला लुहङतेम्बाया़गीॱआङ ज्यिबुराङ निङरु पेहती छोल्सीन। ओहले ओ़ह लुहङतेम्बाया़गीॱराङ किन्ज्योगी ख्याला नाङज्ये जेक्यो काटीनकी तेहन्दाला तोहङलेराङ ङे़स्यी स्य़ेदी सुङ नाङग्यो येहकें। 11 लुहङतेम्बाया़गी दि काह-ठि पेहती ओहले नाहम ओहङगे यिहम्बा म़ेदी ङोह स्ये़ज्ये छोल्ग्यो येहकें। खुङ नाहङला येहकेन्की मास्यीकाकी थुगी मास्यीकाकी तुहक्पुया़ दाङ ओ़ह तिङले ओहङगेन ज़िज्यिदकी तेहन्दाला तोहङलेराङ खुङया़ला तेन नाङग्यो येहकें। 12 खुङया़ला दि केच्या ङोह स्य़े च्य़ूक्यो येहकें च्यिबेमाना खुङया़गी राहङगी तेहन्दाला मिहम्बा, यिहॱनाङ ख्याया़ला स्याहप्तो स्यी़ह-तेहक्यो येहकें। दि केच्या स्यिहङगामले माहर ताङ नाङग्योकी नाम्पार-ताहक्पा थु लाहमले ख्याया़ला स्येक्योगी या़हबु लेहङगुया़ प्रा साल्गेनया़गीॱराङ ताहन्दा ख्याया़ला स्येती येहबा। स्यिहङगामकी स्याहप्च्यीया़ॱआङ दि से़हया़ ताज्येला ज्यिबुराङ सेम पेहती येहबा। नाम्पार-ताहक्पा ओ़ह कोहकें 13 ओ़ह सोङबे ल़ेह पेहच्येकी तेहन्दाला ख्यागी सेम ठाबे ओहङ कोहएँ ओहले राहङगी सेम थिक-चिला ज़्या़ कोहएँ। येशू मास्यीका फेप नाङगेमु ज्योर्केन्गी काटीनलाॱराङ ख्या सेम तिहङ यिहन्ज्यु म़ेहबा पेहती तेहतोङ। 14 ख्या किन्ज्योकी काया़ ची़गेन्गी पुह पोहमोया़ यिहन्गे सोङबे तोहङले ङोह मा़हस्येबा पेहती सेमला ने़जेबा ल़ेह चोक्पाया़ पेहती काहल्ग्योगी लाहमया़ला ता़ह स्य़ूहदी माहन्डो। 15 ख्याया़ला क़े क्याहप नाङगेन्गी किन्ज्यो नाम्पार-ताहक्पा येह ओ़ह सोङबे ख्याया़ॱआङ राहङ मिहजीगी च्यि ल़ेहलामाॱनाङ नाम्पार-ताहक्पा पेहतोङ। 16 च्यिबेमाना छ्य़ेला दि ल़ेहमु प्री़हदी येहबा, “ख्याया़ नाम्पार-ताहक्पा पेहतोङ, च्यिबेमाना ङाह नाम्पार-ताहक्पा येह।” 17 सुलाॱआङ ङ्येम्बा-ङ्य़ेहरी जे माहनाङबा जेती मिहगी ल़ेहला ते़बे ठिम ताङ नाङगेन्दीला याहप म़ेदी क्याप्केन यिहन्सीमाना, दि ङ्यिहमा ङ्यी़गी जाम्बुलीङला लिहकें थु राहङगी छे काहङ किन्ज्योगी ज्यिक्पा खुर्ती मिहजी ताङदोङ। 18 ख्याया़ला क्यी़हराङ येहबा– राहङ चावाया़ लाहमले ओहङग्योगी स्यिती काम्बुगी तामया़ यिहन्ज्यु, सेर दाङ ङुल ल़ेहमु तोङदी डोएँगी से़हया़ लाहमले रिहन च्याल्दी ख्याया़ला खा फे़क्यो मिहम्बा। 19 यिहॱनाङ च्यिॱआङ क्येन म़ेहबा दाङ ओङबु छाङबु येहकेन्की ल़ूह स्ये़बुदी ल़ेहमुराङ मास्यीकाकी नाङ छ्यिम्बु ठा़ लाहमले रिहन च्याल्दी खा फे़ नाङदी येह। 20 किन्ज्योगी जाम्बुलीङला छ्या़ नाङगे म़ेदी तोहङलेराङ मास्यीकाला दाम नाङग्यो येहकें ओहले ख्याया़गी तेहन्दाला दि तिङस्यो ती़हजीला मिहरो फेप नाङसीन। 21 ओहले मिहरो लाहमलेॱराङ ख्याया़गी किन्ज्योला तेहपा पेहसीन, ओहले ओ़ह किन्ज्योगीॱराङ मास्यीकाला टोहङग्योलेगी सोम्बो ज़्याङ च्य़ू नाङसीन ओहले मिहरोला ज़िज्यिद-च्येन ज़ो नाङसीन, ओ़ह सोङबे ख्याया़गी राहङगी तेहपा दाङ रेहवा किन्ज्यो थो़ला ज़्या़गे यिहम्बा। 22 ता़ह तेहन्दामकी स्याहलला ची़दे ख्याया़गी राहङलाराङ चाङमा ज़ोक्यो सोङबे राहङगी आदा-नो़हया़ला च्याहङज्यु सेम्बा थो़दी चेवा पेहतोङ, ओहले सेम तिहङ यिहन्ज्युराङ च्यी़गी च्यी़ला चेवा पेहतोङ। 23 किन्ज्योकी सोम्बो दाङ नाहमॱआङ मेहतोङगेन्गी सुङ लाहमले ख्याया़ येहपाराङ साम्बा पेहती क्येदी येह। ख्याया़ तोङदी डोएँगी छार्क्यीनया़ मिहम्बा, यिहॱनाङ ख्यानी नाहमॱआङ तोङदी मेहन्डोएँगी छार्क्यीनया़ गा यिहम्बा। 24 च्यिबे मासीमाना, “मिह थाम्ज्यी थाङगागी चाया़ ल़ेहमुराङ यिहम्बा ओहले खुङया़गी ज़िज्यिदॱआङ रिहगी मेहन्दो ल़ेहमुराङ यिहम्बा। थाङगागी चाया़ काम्दी डोएँ ओहले रिहगी मेहन्दो प्रुहप्ती डोएँ। 25 यिहॱनाङ चो़वोकी सुङनी नाहम्स्यी किन्दुॱराङ लिहकें।” दि चो़वोगी सुङॱराङ ख्याया़ला स्ये़क्योकी या़हबु लेहङगु यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.