१ यूहन्ना 5 - ह्योल्मोकिन्ज्योगी स़ेबु थो़ला यिह-छ्य़े 1 येशूॱराङ मास्यीका यिहन म़ेदी यिह छ्य़ेगे थाम्ज्यी किन्ज्योगी छार्क्यीनया़ यिहम्बा। ओहले सुगी किन्ज्यो याहपला चेवा पेहकेन खोगी राहङगी छार्क्यीनॱलाङ चेवा पेहकें। 2 किन्ज्योला चेवा पेहती ओहले मिह-रो़हगी काया़ ची़देॱराङ मिह-रो़हगी छार्क्यीनया़ला ओहराङगी चेवा पेहकें माएँ ताम क्यी़ह ज्योर ख़ूएँ। 3 च्यिबेमाना किन्ज्योगी काया़ ङ्यिहन्गेन्दीॱराङ ओहराङगी किन्ज्योला चेवा पेहक्यो यिहम्बा। किन्ज्योगी काया़ ची़ज्येला ओहजेबा खेन्दा-का़हबु म़ेह। 4 च्यिबेमाना किन्ज्यो लाहमले क्येक्यो मिह थाम्ज्यीगी जाम्बुलीङला क्याहल्ज्ये येह। ओहराङगी यिह-छ्य़ेगीॱराङ ओहराङगी जाम्बुलीङला क्याहल ख़ूएँ। 5 सुगी जाम्बुलीङला काहल ख़ूएँ? येशूला किन्ज्योगी स़ेबु यिहन म़ेदी यिह छ्य़ेएँ मिहगीराङ जाम्बुलीङला क्याहल ख़ूएँ। येशू मास्यीकागी तेहन्दाला पाङबु 6 येशू मास्यीका छ्यु दाङ ठा़ लाहमले फेप नाङसीन, मिहरो छ्यु लाहमले च्यी़राङ मिहम्बा, ठा़ लाहमलेॱआङ फेप नाङसीन। दि तेहन्दाम यिहन सुङदी नाम्पार-ताहक्पा थुगी पाङबु नाङगे, च्यिबेमाना नाम्पार-ताहक्पा थु तेहम्बा-तेहन्सुम यिहन। 7 ओ़ह सोङबे येशू मास्यीकाकी तेहन्दाला पाङबु तेर्केन तामया़ सुम येहबा– 8 ओ़हदी नाम्पार-ताहक्पा थु, छ्यु, दाङ ठा़ यिहम्बा। दि सुमगी येशू मास्यीकागी तेहन्दाला ना च्यी़राङ पाङबु तेर्के। 9 मिहगी तेरक्यो पाङबुला ङ्यिह यिह छ्य़ेगे। यिहॱनाङ किन्ज्योगी नाङग्यो पाङबु ओ़ह म़ेदीॱआङ स्युक छ्यिम्बु येह। किन्ज्योगीॱराङ राहङगी स़ेबुगी तेहन्दाला पाङबु नाङग्यो येहबा। 10 ओ़ह सोङबे किन्ज्योगी स़ेबु थो़ला यिह छ्य़ेगे मिहगी राहङगी सेम नाहङला दि पाङबुॱराङ ओहङगे। यिहॱनाङ किन्ज्योला यिह मे़हछ्येगे मिहगी किन्ज्योगी पाङबु तेर्केया़ला स्योप क्याहप्क्यो यिहन म़ेदी नोम्साङ ताङगे च्यिबेमाना स़ेबुगी तेहन्दाला किन्ज्योगी नाङग्यो पाङबुला खोगी यिहॱराङ मे़हछ्येएँ। 11 पाङबु दिराङ यिहम्बा: किन्ज्योगी ओहराङला था़ म़ेहबा मिहली नाङदी येह ओहले दि मिहली किन्ज्योगी स़ेबु येशू ङ्याम्बु येहबा। 12 किन्ज्योगी स़ेबु येहकें ङ्याम्बु मिहली ओहङगे, किन्ज्योगी स़ेबु म़ेहबा ङ्याम्बु मिहली मेहयोहङगे। था़ म़ेहबा मिहली 13 ख्याया़गी था़ म़ेहबा मिहली ज्योर्ती येह माएँ ताम ङोह स्य़े ख़ूज्यु म़ेदीराङ किन्ज्योगी स़ेबुला यिह-छ्य़े पेहकेनया़ला दि ताम प्रुहएँॱराङ येहबा। 14 किन्ज्योगी थु-सेम जे नाङगेन्गी से़हया़ ओहराङगी लाङगेमु मिहरोगी सेन नाङगे। ओ़ह सोङबे ओहराङ किन्ज्योगी दिनला डोज्येला आ़र पेह ख़ूएँ। 15 ओहराङगी किन्ज्यो ङ्याम्बु सोल्वाङ ताप्केमु च्यि स़ेह लाङॱनाङ मिहरोगी ओहराङला नाङज्ये येह माएँ ताम ओहराङला क्यी़ह येह। ओहले लेहमेन ताम च्यी़ॱआङ क्यी़ह येहबा– ओहराङगी किन्ज्योगी ङ्याम्बु लाङग्यो से़हया़ ओहराङगी ज्योर सिहन्दी येहबा। 16 का़हलेॱआङ सुज्यीगी राहङगी नो़हला स्यिवाला मेहक्याल्गेन्गी तिहक्पा पेह तेहक्यो थोङसीमाना खोगी तेहन्दाला किन्ज्यो ङ्याम्बु सोल्वाङ ताप तेर कोहएँ, ओहले किन्ज्योगी खोला मिहली नाङज्ये येह। यिहॱनाङ स्यिवाला क्याल्गेन्गी तिहक्पाया़ॱआङ ओहङगे, ओ़हगी तेहन्दाला सुज्यीगी सोल्वाङ ताप तेर कोहएँ म़ेदीनी ङाह मेहमाएँ। 17 ल़ेह चोक्पाया़ थाम्ज्यीराङ तिहक्पा यिहम्बा यिहॱनाङ थाम्ज्यी तिहक्पागी स्यिवाला मे़हक्याल्गे। 18 किन्ज्योगी पुह पोहमोया़गी तिहक्पा पेहतीराङ मेहतेहकें च्यिबेमाना किन्ज्योगी स़ेबुगी खुङया़ला थार च्य़ू नाङगे ओहले ती़ह गो-छ्येवागी खुङला ऩे क्याहल मी़हखुएँ। दि ओहराङला क्यी़हराङ येह। 19 जाम्बुलीङ थाम्ज्यीराङ ती़ह गो-छ्येवागी ओङ चो़ला येहॱनाङ ओहराङया़दी किन्ज्योगी छार्क्यीनया़ यिहम्बा माएँ ताम ओहराङला क्यी़ह येह। 20 किन्ज्योगी स़ेबु फेप नाङसीन ओहले मिहरोगी ओहराङला तेहन्दामगी किन्ज्योला ङोह स्य़े ख़ूएँगी येहन्देन नाङसीन। दि ओहराङला क्यी़ह येह। ओहराङ मिहरोगी स़ेबु येशू मास्यीकाला येहकें सोङबे तेहन्दामकी किन्ज्यो ङ्याम्बुराङ येह। मिह-रो़हराङ तेहन्दामकी किन्ज्यो दाङ था़ म़ेहबा मिहली यिहन। 21 ए ङाहगी पेहजाया़, ख्याया़ कुया़ ङो़ले था़-रिहङबुराङ तेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.