१ यूहन्ना 4 - ह्योल्मोचिहन क्याहप्केन्गी लुहङतेम्बाया़ला ङोह स्य़े कोहएँ 1 ङाहगी च्याहम्बु रो़हया़, “ङाह ङ्याम्बु नाम्पार-ताहक्पा थु येह” माएँ मिह थाम्ज्यीला ख्यागी यिह मा़हछ्ये, यिहॱनाङ खुङ ङ्याम्बु किन्ज्योगी नाम्पार-ताहक्पा थु येहबानी म़ेहबा म़ेदी ङ्याहम च्येतोङ च्यिबेमाना चिहन क्याहप्केन्गी लुहङतेम्बाया़ माहङबुराङ दि जाम्बुलीङला थेन सिहन्दी येह। 2 येशू मास्यीका मिहगी कुसोला फेप नाङसीन म़ेदी माएँ थुराङ किन्ज्योगी थु यिहम्बा। दि लाहमलेॱराङ ख्याया़गी किन्ज्योगी थुला ङोह स्य़े ख़ूज्ये येह। 3 येशू मिहगी कुसोला फेप माहनाङ म़ेदी माएँ नाम्स्यी किन्ज्योगी थु लाहमले ओहङग्यो मिहम्बा, ओ़हदी मास्यीकाला टाह पेहकेन्गी नाम्स्यी यिहम्बा। ओ़हदी ता़ह ओहङज्ये येह माएँ तामनी ख्याया़गी थ़े सिहन्दी येह, ता़ह ओ़हदी दि जाम्बुलीङला ओहङ सिहन्दी येह। 4 ङाहगी च्याहम्बु पेहजाया़, ख्याया़नी किन्ज्योदी यिहम्बा, ख्यागी चिहन क्याहप्केन लुहङतेम्बाया़ला क्याहल्दी येहबा, च्यिबेमाना ख्याया़ ङ्याम्बु ज़्य़ू नाङगेन किन्ज्यो दि जाम्बुलीङला येहकेन्गी ती़ह म़ेदी ज्यिबुराङ ओङ छ्यिम्बु येहबा। 5 खुङया़ जाम्बुलीङदी यिहन्गे सोङबे जाम्बुलीङदी ताम माएँ ओहले जाम्बुलीङगी खुङया़गी माक्यो ताम ङ्यिहन्गे। 6 यिहॱनाङ ओहराङनी किन्ज्योदी यिहम्बा ओहले का़हन्दीगी किन्ज्योला ङोह स्य़ेक्यो येहबा, खोगी ओहराङगी ताम ङ्यिहन्गे। का़हन्दी किन्ज्योदी मिहम्बा, खोगी ओहराङगी ताम मिहङ्यीहन्गे। दि ल़ेहमु पेहतीराङ ओहराङगी तेहन्दामकी थु दाङ चिहन क्याहप्केन्गी नाम्स्यी खा फे़ ख़ूएँ। किन्ज्योगी चेवा दाङ ओहराङगी चेवा 7 ए ङाहगी च्याहम्बु रो़हया़, ओहराङगी च्यी़गी च्यी़ला चेवा पेह कोहएँ च्यिबेमाना चेवा किन्ज्यो लाहमले ओहङग्यो यिहम्बा। का़हन्दीगी चेवा पेहकें खो किन्ज्यो लाहमले क्येक्यो ओहङगे, खोगी किन्ज्योला ङोह स्य़ेएँ। 8 चेवा मेहबेकेन्दीगी किन्ज्योला ङोह मे़हस्येएँ च्यिबेमाना किन्ज्योॱराङ चेवा यिहम्बा। 9 किन्ज्योगी ओहराङला दि ल़ेहमु जेती चेवा जे नाङसीन– मिहरोगी राहङगी स़ेबु लाहमले ओहराङगी था़ म़ेहबाकी मिहली ज्योर ख़ूज्यु सुङदी मिहरोगी राहङगी च्यी़मे च्यी़राङ स़ेबुला दि जाम्बुलीङला ताङ नाङसीन। 10 ओहराङगी किन्ज्योला चेवा पेहक्यो सोङबे मिहम्बा, यिहॱनाङ मिहरोगी ओहराङला चेवा जे नाङग्यो सोङबे, ओहराङगी तिहक्पागी तेहन्दाला कुसो नाङज्येला मिहरोगी राहङगी स़ेबुला ताङ नाङसीन। चेवा माक्योदी दिराङ यिहम्बा। 11 ए ङाहगी च्याहम्बु रो़हया़, किन्ज्योगी दि ल़ेहमु जेती ओहराङला चेवा जे नाङग्यो यिहम्बा मासीमाना ओहराङगीॱआङ च्यी़गी च्यी़ला चेवा पेह कोहएँ। 12 किन्ज्योला सुगीॱआङ नाहमॱआङ थोङदी म़ेह। यिहॱनाङ ओहराङगी च्यी़गी च्यी़ला चेवा पेहसीमाना किन्ज्यो ओहराङ नाहङलाराङ ज़्य़ू नाङगे, ओहले ओहराङ लाहमले किन्ज्योगी चेवा छाङबु डोएँ। 13 दि ल़ेहमु पेहती ओहराङ किन्ज्यो ङ्याम्बु ओहङगे ओहले मिहरोॱआङ ओहराङ ङ्याम्बुराङ ज़्य़ू नाङगे माएँ ताम ह्अ कोह ख़ूएँ च्यिबेमाना किन्ज्योगी ओहराङला राहङगी नाम्पार-ताहक्पा थु नाङदी येहबा। 14 किन्ज्यो याहपगी राहङगी स़ेबुला जाम्बुलीङला थार्पा नाङज्येला ताङ नाङग्यो ङ्यिहगी थोङसीन ओहले ताहन्दा ङ्यिह दिगी पाङबु तेर्के। 15 येशूॱराङ किन्ज्योगी स़ेबु यिहम्बा माएँ मिह ङ्याम्बु किन्ज्यो ज़्य़ू नाङगे ओहले खो किन्ज्यो ङ्याम्बु ओहङगे। 16 ओहराङ राहङगीॱआङ किन्ज्योगी ओहराङला चेवा जे नाङग्यो माएँ ताम ङोह स्य़ेगे ओ़ह सोङबे ओहराङगी किन्ज्योगी चेवाला यिह छ्य़ेगे। किन्ज्योॱराङ चेवा यिहम्बा। चेवा पेहतीराङ तेहकें मिह किन्ज्यो ङ्याम्बु ओहङगे ओहले किन्ज्योॱआङ खो ङ्याम्बु ज़्य़ू नाङगे। 17 दि ल़ेहमु पेहतीराङ ओहराङ ङ्याम्बु येहकेन्गी चेवा छाङबु काहल्ग्यो ओहङगे ओहले ठिम ताङ नाङगे ङ्यिहमाला ओहराङ ज्यी़ मेहकोहएँ च्यिबेमाना दि जाम्बुलीङला ओहराङ मास्यीका ल़ेहमुराङ येहबा। 18 चेवाला ज्यी़सु मेहयोहङगे, तेहन्दामगी चेवागी ज्यी़सुला ङेके। च्यिबे मासीमाना ज्यी़सुगीॱराङ ङ्य़ेहबा फो़गेन म़ेदी तेन्गे ओहले ज्यी़गे मिह ङ्याम्बु तेहन्दामगी चेवा मेहयोहङगे। 19 तोहङस्यो किन्ज्योगीॱराङ ओहराङला चेवा जे नाङग्यो सोङबे ओहराङॱआङ चेवा पेहकें। 20 सुज्यीगी “ङाह किन्ज्योला चेवा पेहकें” म़ेदी माएँ यिहॱनाङ राहङगी आदा-नो़ह दाङ आज्यी-नुहमुला ङेन्ज्येन पेहसीनमाना खो स्योप्क्येरे यिहम्बा। राहङगी थोङग्यो आदा-नो़ह दाङ आज्यी-नुहमुला चेवा पेह मी़हखुएँ मिहगी थोङॱराङ माहथोङबाकी किन्ज्योला काह-ठि पेहती चेवा पेह खू़रो ले? 21 का़हन्दीगी किन्ज्योला चेवा पेहकें, ओ़हदीगी राहङगी आदा-नो़ह दाङ आज्यी-नुहमुला चेवा पेहॱराङ कोहएँ। दिराङ मास्यीकागी ओहराङला नाङग्योकी का यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.