१ यूहन्ना 3 - ह्योल्मोकिन्ज्योगी छार्क्यीन 1 त़ेदोङ, याहप्च्येन आबागी ओहराङला काहजे माहङबु निङज्यी जे नाङगु दु! मिहरोगी निङज्यीगी पेहती ओहराङ किन्ज्योगी छार्क्यीनया़ काहल्दी येहबा, यिहन्ज्येॱआङ ओहराङ तेहम्बाराङ किन्ज्योगी छार्क्यीनया़राङ यिहम्बा। ओ़ह सोङबे जाम्बुलीङकी मिहया़गी ओहराङला ङोह मे़हस्येएँ च्यिबेमाना खुङया़गी किन्ज्योला ङोह स्य़ेक्यो म़ेह। 2 ए ङाहगी च्याहम्बु रो़हया़, ताहन्दानी ओहराङ किन्ज्योगी छार्क्यीनया़राङ यिहम्बा यिहॱनाङ तिङलेनी ओहराङ च्यि ओहङगे यिहम्बा, ओ़हगी तेहन्दाला किन्ज्योगी ओहराङला ह्अ कोह च्य़ू नाङदी म़ेह। यिहॱनाङ मास्यीका फेप नाङ फान्ज्यो ओहराङॱआङ मिहरो ल़ेहमुराङ डोज्ये येह च्यिबेमाना मिहरो काहन्डुमु येहबा, ओहराङगी मिहरोला ओ़ह ल़ेहमुराङ थोङज्ये येह। 3 ओहले मास्यीकाला दि ल़ेहमु रेहवा पेहकेनया़गी राहङला मास्यीकाला ल़ेहमुराङ चाङमा पेहती ज़्या़गे। 4 तिहक्पा पेहकेनया़गी छ्य़े-ठिम गोम्गे। च्यिबेमाना छ्य़े-ठिम मी़हचीगेन्दीराङ तिहक्पा यिहम्बा। 5 ख्याया़ला क्यी़हराङ येह मिहगी तिहक्पा ता़ह च्य़ूज्येला मास्यीका फेप नाङसीन ओहले मिहरोला तिहक्पा च्यी़ॱआङ म़ेह। 6 ओ़ह सोङबे मास्यीकाला क्याप्ती तेहकें मिहगी तिहक्पा पेहतीराङ मेहतेहकें। तिहक्पा पेहतीराङ तेहकें मिहगी नाह मास्यीका थोङग्यो ओहङगे नाह ङोह स्य़ेक्योॱराङ ओहङगे। 7 ए ङाहगी च्याहम्बु पेहजाया़, सुज्यीगीॱआङ ख्याला चिहन क्याहप माहङ्युहङज्यु। मास्यीका टाहङबु येहकें ल़ेहमुराङ काहदी मिहगी राहङगी डोलु-तेहलुया़ टाहङबु पेहकें, खो मिह टाहङबु यिहम्बा 8 तिहक्पा पेहतीराङ तेहकें मिहती ती़ह गो-छ्येवागी मिह यिहम्बा। ती़ह गो-छ्येवागी छ़ूगे यिहन्ज्युराङ तिहक्पा पेहतीराङ ओहङदी येह। ओ़ह सोङबे ती़ह गो-छ्येवागी ल़ेहला तोङ च्य़ू नाङज्येला किन्ज्योगी स़ेबु फेप नाङसीन। 9 किन्ज्यो लाहमले क्येक्यो पेहजाया़गी तिहक्पा पेहतीराङ मेहतेहकें, च्यिबेमाना खो ङ्याम्बु किन्ज्योगी सेन ओहङगे, ओ़ह सोङबे तिहक्पा पेहतीराङ तेह मी़हखुएँ, च्यिबेमाना खो किन्ज्यो लाहमले क्येक्यो यिहम्बा। 10 किन्ज्योकी छार्क्यीन सु यिहम्बा, ओहले ती़ह गो-छ्येवाकी छार्क्यीन सु यिहम्बा माएँदी ओहराङगी दि ल़ेहमु पेहती ह्अ कोह ख़ूएँ– किन्ज्योकी ज़ी़लुला काहदी मिहगी राहङगी डोलु-तेहलु टाहङबु मेहबेकें ओहले किन्ज्योला यिह-छ्य़े पेहक्यो आदा-नो़ह दाङ आज्यी-नुहमुया़ला चेवा मेहबेकें खो किन्ज्योकी छार्क्यीन मिहम्बा। च्यी़गी च्यी़ला चेवा पेहतोङ 11 ख्याया़गी छ़ूगे यिहन्ज्युराङ थे़क्योकी लेहङगु दिराङ यिहम्बा, “ओहराङगी च्यी़गी च्यी़ला चेवा पेह कोहएँ।” 12 ओहराङ कयिन ल़ेहमु ओहङज्ये मेहयोहङगे। खो ती़ह गो-छ्येवादी यिहन्गे। खोगी राहङगी नो़हला सेसीन। खोगी राहङगी नो़हला च्यिबे सेपा? च्यिबेमाना खोती ल़ेह टाहङबु म़ेहबा येहकें। यिहॱनाङ खोगी नो़हगी ल़ेहती टाहङबु येहकें। 13 आदा-नो़हया़ दाङ आज्यी-नुहमुया़, जाम्बुलीङगी मिहया़गी ख्याला ङेन्ज्येन पेहकेमु ह्अ मा़हलेह। 14 ओहराङगी आदा-नो़ह दाङ आज्यी-नुहमुया़ला चेवा पेहक्यो सोङबेॱराङ ओहराङ स्यिवा च्येती मिहलीला पो सिहन्दी येहबा माएँ ताम ओहराङला क्यी़ह येहबा। का़हन्दीगी चेवा मेहबेकें, खो स्यिवालाॱराङ लिहकें। 15 का़हन्दी मिहगी राहङगी आदा-नो़ह दाङ आज्यी-नुहमुया़ला ङेन्ज्येन पेहकें खो, मिह सेकें मिह यिहम्बा। ओ़ह सोङबे ओ़ह ल़ेहमु मिह ङ्याम्बु था़ म़ेहबा मिहली मेहयोहङगे माएँ ताम ख्याया़ला क्यी़हराङ येह। 16 मास्यीकागी ओहराङगी तेहन्दाला राहङगी कुसोॱराङ नाङसीन। ओ़ह सोङबे ओहराङगी मास्यीकागी चेवा ङोह स्य़ेदी येहबा। ओहराङगीॱआङ राहङगी आदा-नो़ह दाङ आज्यी-नुहमुया़गी तेहन्दाला राहङगी ज़ुबु तेर कोहएँ। 17 जाम्बुलीङगी क्युह-नोहर येहकेया़गी राहङगी आदा-नो़ह दाङ आज्यी-नुहमुया़ तुहक्पुला छ्यिक्यो थोङगेमुॱआङ राहङगी सेम सान्दी पेहसीनमाना ओ़ह ल़ेहमु मिहया़गी किन्ज्योला काह-ठि पेहती चेवा पेह ख़ूज्ये ले? 18 ए ङाहगी पेहजाया़! ओहराङ खा दाङ तामगी ज्यीॱराङ चेवा पेहच्ये मेहयोहङगे, ओहराङगी चेवादी तेहन्दामदी ओहङ कोहएँ। दि ल़ेहमु चेवाती ल़ेह लाहमले च्यी़राङ थोङगे यिहम्बा। 19 दि लाहमलेॱराङ ओहराङ तेहन्दामकी मिहया़ यिहम्बा म़ेदी क्यी़ह ज्योर ख़ूएँ। ओहले ओहराङ किन्ज्योगी दिनला स्युक क्ये ख़ूएँ। 20 का़हलेॱआङ ओहराङला राहङदीराङ सेमगी क्येन ता़सीन माना किन्ज्योनी ओहराङगी सेम म़ेदी ज्यिबुराङ छ्यिम्बु येहबा, मिहरोगी ना थाम्ज्यीराङ ङोह ख्येन नाङगे माएँ ताम क्यी़ह ज्योर कोहएँ। 21 ए ङाहगी च्याहम्बु रो़हया़, ओहराङगी सेमगी राहङला क्येन मेहकेन्सीमाना किन्ज्योगी दिनला डोज्येला ओहराङला च्यिॱआङ ज्यी़सु मेहयोहङगे। 22 ओहराङगी किन्ज्योगी काया़ ची़क्यो दाङ मिहरोगी थु ङ्ये़एँगी ल़ेहया़ पेहक्यो सोङबे ओहराङगी च्यि लाङगे ओ़ह मिहरोगी नाङगे। 23 किन्ज्योगी का च्यि यिहम्बा मासीमाना किन्ज्योगी स़ेबु येशू मास्यीकाला यिह-छ्य़ेबु ओहङ कोहएँ ओहले मास्यीकागी सुङ नाङग्यो ल़ेहमुराङ ओहराङ थाम्ज्यीगी च्यी़गी च्यी़ला चेवा पेह कोहएँ यिहम्बा। 24 किन्ज्योगी का ङ्यिहन्गे मिह थाम्ज्यी किन्ज्यो ङ्याम्बुराङ ओहङज्ये येह ओहले किन्ज्यो खुङ ङ्याम्बु ज़्य़ू नाङज्ये येह। किन्ज्योगी ओहराङला नाङग्यो नाम्पार-ताहक्पा थु लाहमले किन्ज्यो ओहराङ ङ्याम्बु ज़्य़ू नाङगे माएँ ताम ङोह स्य़े ख़ूएँ। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.