१ यूहन्ना 2 - ह्योल्मोमास्यीकागी ओहराङला रो़हराम जे नाङगे 1 ए ङाहगी च्याहम्बु पेहजाया़, ख्यागी तिहक्पा माहबे म़ेदी ङाह ख्याया़ला दि यिहगी प्रुहएँॱराङ येहबा। यिहॱनाङ सुज्यीगी तिहक्पा पेहसीमाना याहप ङ्याम्बु ओहराङ छ्यो़ले स्याहल सुङ तेर्के मेहन्दा च्यी़ येहबा, ओ़ह टाहङबु येशू मास्यीका यिहम्बा। 2 मिहरो ओहराङगी तिहक्पा ता़ह च्य़ू नाङज्येलाॱराङ टोहङ नाङग्यो यिहम्बा। ओहराङ च्यी़गी तेहन्दाला मिहम्बा, यिहॱनाङ जाम्बुलीङगी मिह थाम्ज्यीगी तेहन्दाला यिहम्बा। 3 ओहराङगी मिहरोगी काया़ ङ्यिहन्सीन माना तेहम्बाराङ ओहराङगी मिहरोला ङोह स्य़ेक्यो दु म़ेदी ह्अ कोह ख़ूएँ। 4 सुज्यीगी ङाह चो़वोला ङोह स्य़ेएँ म़ेदी माएँ यिहॱनाङ चो़वोगी नाङग्यो काया़ मी़हचीसी माना खोगी स्योप क्याहप्क्यो ओहङगे ओहले खो ङ्याम्बु तेहन्दाम मेहयोहङगे। 5 यिहॱनाङ काहदी मिहगी चो़वोगी लुहङया़ ची़गे, खोगी तेहम्बा-तेहन्सुमॱराङ किन्ज्योला सेम तिहङ यिहन्ज्युराङ चेवा पेहक्यो ओहङगे। दि लाहमलेॱराङ ओहराङ किन्ज्यो ङ्याम्बु येहबा माएँ ताम क्यी़ह ज्योर ख़ूएँ। 6 किन्ज्यो ङ्याम्बुराङ येह म़ेदी माएँ मिहगी मास्यीकाती ल़ेहमुराङ राहङगी डोलु-तेहलुया़ पेह कोहएँ। साम्बा का 7 ए ङाहगी च्याहम्बु आदा-नो़ह दाङ आज्यी-नुहमुया़, ख्याया़ला प्रुहक्योकी दि काया़ साम्बा मिहन। यिहॱनाङ दि छ़ूगे यिहन्ज्युराङ ची़दे ओहङग्योगी निङबा काया़ यिहम्बा। दि निङबा काया़ ख्याया़गी थ़े सिहन्ग्योगी लोप्च्युया़ॱराङ यिहन। 8 यिहॱनाङ ङाह ख्याया़ला साम्बा का च्यी़ प्रुहएँॱराङ येहबा, दि कागी तेहन्दाम मास्यीकाला थोङदी येह ओहले ख्याॱलाङ थोङदेराङ येहबा, च्यिबेमाना ता़ह ना़-जुबेदी तोर्ती डोॱराङ येहबा, ओहले तेहन्दामगी येहसेर तोहङ यिहन्ज्युराङ येहपा छ्या़देॱराङ येहबा। 9 सुज्यीगी ङाह क्या-साङेला येह म़ेदी माज्येनी माएँ यिहॱनाङ खोगी राहङगी आदा-नो़ह दाङ आज्यी-नुहमुया़ला ङेन्ज्येन पेहसीनमाना खो तोहरोङॱआङ ना़-जुबेलाराङ येहबा। 10 का़हन्दीगी राहङगी आदा-नो़ह दाङ आज्यी-नुहमुया़ला चेवा पेहकें, खो क्या-साङेला ओहङगे, ओहले लेहमेन मिहया़गी ल़ेहया़ला का़गेन्गी तामया़ खो ङ्याम्बु च्यिॱआङ मेहयोहङगे। 11 ओहले का़हन्दीगी राहङगी आदा-नो़ह आज्यी-नुहमुया़ला ङेन्ज्येन पेहकें, खो ना़-जुबेला ओहङगे, ओहले खो ना़-जुबेलाराङ डोएँ। खो काहल डोॱराङ येहबा माएँ ताम खो राहङलाराङ क्यी़ह मेहयोहङगे, च्यिबेमाना ना़-जुबेगी खोला मी़ काना ज़ोक्यो ओहङगे। 12 ए ङाहगी च्याहम्बु पेहजाया़, येशूगी छेनला ख्या थाम्ज्यीगी तिहक्पा ता़हक्यो सोङबे ङाह ख्याया़ला दि ताम प्रुहएँ राङ येहबा। 13 ए आबाया़, ङाह राहङ फे़बेया़ला दि ताम प्रुहएँॱराङ येहबा, च्यिबेमाना छ़ूगे यिहन्ज्युराङ ज़्य़ू नाङगेन मास्यीकाला ख्या फे़बेया़गी ङोह स्य़ेदीॱराङ येह। ए स्यारा स्यार्माया़, ङाह ख्याया़ला दि ताम प्रुहएँॱराङ येहबा, च्यिबेमाना ख्याया़गी ओ़ह ती़हला क्याहल्दी येह। 14 ए पेहजा फेमाया़ ख्यागी किन्ज्यो याहपला ङोह स्य़ेदी येहबा। ओ़ह सोङबेॱराङ ङाहगी ख्याया़ला दि ताम प्रुहक्यो यिहम्बा। ए आबाया़, ख्या फे़बेया़गी छ़ूगे यिहन्ज्युराङ ज़्य़ू नाङगेन मास्यीकाला ङोह स्य़ेदीॱराङ येह। ओ़ह सोङबे ङाहगी ख्या फे़बेया़ला दि ताम प्रुहक्यो यिहम्बा। ए स्यारा स्यार्माया़, ख्या ङ्याम्बु स्युक छ्यिम्बु येह ओहले किन्ज्योगी लुहङ ख्यागी सेम नाहङला येह। ख्याया़गी ती़हला क्याहल्दी येह। ओ़ह सोङबे ङाहगी ख्याया़ला दि ताम प्रुहक्यो यिहम्बा। 15 जाम्बुलीङ दाङ जाम्बुलीङला येहकेन्गी से़हया़ला चेवा माहबे। का़हन्दी मिहगी जाम्बुलीङला चेवा पेहकें खोगी किन्ज्योला चेवा मेहबेकें। 16 च्यिबे मासीमाना जाम्बुलीङला येहकेन थाम्ज्यीराङ से़हया़– पे यिहॱना़: ज़ुबुगी चोक्पा सेम्बा, मी़गी चोक्पा सेम्बा ओहले मिहलीगी छ्य़ेन्दो याहप लाहमले ओहङग्यो मिहम्बा। दिनी जाम्बुलीङ लाहमलेॱराङ ओहङग्यो यिहम्बा। 17 जाम्बुलीङ दाङ जाम्बुलीङगी चोक्पा सेम्बाया़ थाम्ज्यीराङ तोङदी डोज्ये येह, यिहॱनाङ किन्ज्योगी थु ङ्ये़बाकी ल़ेह पेहकें मिहया़ नाहम्स्यी किन्दुॱराङ लिहच्ये येह। मास्यीकाकी टाह 18 ए पेहजाया़, ता़ह तिङस्यो ती़हजी दिराङ यिहन। मास्यीकाला टाह पेहकें मिहया़ थेन्गेॱराङ येह माएँ ताम ख्यागी थ़े सिहन्दी येह। ता़ह मास्यीकाला टाह पेहकेनया़ माहङबुराङ थेन सिहन्दी येह। ओ़ह सोङबे दिराङ तिङस्यो ती़हजी यिहम्बा म़ेदी ओहराङला क्यी़ह येहबा। 19 ओ़ह टाहया़ ओहराङ नाहङलेॱराङ थेन्दी काहल्सीन, च्यिबेमाना खुङ ओहराङदी मिहम्बा यिहन्गे। का़हलेॱआङ खुङया़ ओहराङदी यिहम्बा यिहनानी खुङ ओहराङ ङ्याम्बुराङ तेहच्ये येहकें। खुङ ओहराङदी मिहम्बा दु म़ेदी या़हबु पेहती क्यी़ह ज्योर्च्येला खुङया़गी ओहराङला क्युर ज़्या़दी काहल्सीन। 20 यिहॱनाङ मास्यीकागी नाम्पार-ताहक्पा थु ख्याया़ला नाङग्यो सोङबे ख्या थाम्ज्यीगी तेहन्दामकी स्याहलया़ ङोह स्य़ेगे। 21 ख्यागी तेहन्दामगी स्याहलला ङोह मा़हस्येबा सोङबे ङाहगी दि ताम प्रुहक्यो मिहम्बा, यिहॱनाङ ख्यागी तेहन्दामकी स्याहलला ङोह स्ये़उ दु म़ेदीराङ प्रुहक्यो यिहम्बा। तेहन्दामकी स्याहललेगी चिहन क्याहप्केन्गी तामया़ च्यिॱआङ मेहथेन्गे माएँ ताम ख्याया़ला क्यी़हराङ येह। 22 चिहन क्याहप्कें मिह सु यिहम्बा? का़हन्दी मिहगी येशूला मास्यीका मिहम्बा म़ेदी माएँ खोराङ चिहन क्याहप्केन्गी मिह यिहम्बा। ओहले का़हन्दी मिहगी याहप दाङ स़ेबुला मा-लोक पेहकें ओ़ह मिहराङ मास्यीकाकी टाह यिहम्बा। 23 स़ेबुला मा-लोक पेहकें मिहगी याहपलाॱआङ मा-लोक पेहकें ओहले स़ेबुला मा-लोक मेहबेकें मिहगी याहपलाॱआङ मा-लोक मेहबेकें। 24 ओ़ह सोङबे ख्याया़गी छ़ूगे यिहन्ज्युराङ थे़दे ओहङग्योकी लुहङया़ राहङगी सेमला ज़्या़दोङ। ख्यागी थे़क्योकी लुहङया़ राहङगी सेमला ज़्या़क्यो येहसीमाना ख्या किन्ज्यो याहप दाङ स़ेबु ङ्याम्बुराङ ओहङज्ये येह। 25 ओहले मास्यीकागी ओहराङ ङ्याम्बु ज़्या़ नाङग्योकी ताहम्ज्यादी था़ म़ेहबा मिहली यिहम्बा। 26 ख्याया़ला चिहन क्याहप्केनया़गी तेहन्दाला दि ताम ङाह ख्याया़ला प्रुहएँॱराङ येहबा। 27 यिहॱनाङ ख्या थो़ला मास्यीकागी राहङदी नाम्पार-ताहक्पा थु नाङदी येह। ख्या ङ्याम्बु नाम्पार-ताहक्पा थु ज़्य़ू नाङग्यो सोङबे सुज्यीगीॱआङ ख्याया़ला तेहन्दामकी तेहन्दाला लोप मेहकोहएँ च्यिबेमाना नाम्पार-ताहक्पा थुगीॱराङ ख्याया़ला ना थाम्ज्यीराङ लोप नाङगे। मिहरोगी लोप नाङग्योकी स्याहलला तेहन्दाम ओहङगे, यिहॱनाङ चिहन क्याहप्क्यो मेहयोहङगे। नाम्पार-ताहक्पा थुगी नाङग्यो लुहङया़ ची़दे मास्यीकाला क्याप्ती तेहतोङ। 28 ए ङाहगी पेहजाया़, ख्या मास्यीकाला क्याप्ती तेहतोङ, ओहले मास्यीका फेप नाङगेमु ओहराङला स्युक क्येज्ये येह, ओहले मास्यीका फेप नाङगेमु मिहरोगी दिनला ओहराङ ङोह-छारी डोज्ये म़ेह। 29 मास्यीका टाहङबु येह म़ेदी ख्याया़ला क्यी़हराङ येह। ओ़ह सोङबे किन्ज्योगी दिनला ठाबे सी़हएँगी ल़ेह पेहकें मिहया़ च्यी़राङ मिहरोगी छार्क्यीनया़ ओहङज्ये येह माएँ तामॱआङ ख्याया़ला क्यी़हराङ येह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.