१ यूहन्ना 1 - ह्योल्मोमिहली नाङगेन्गी लुहङ 1 छ़ू नाङगे यिहन्ज्युराङ येहकेन, ङ्यिहगी थे़क्यो ओहले राहङ मी़गीराङ थोङग्यो, ओहले ङ्यिहगी या़हबु पेहती तासीन ओहले ङ्यिहगी राहङ लाहक्पागीॱराङ दे़सीन। ओ़ह मिहली नाङगे सुङगी तेहन्दालाराङ ताहन्दा ङ्यिह ख्याया़ला दि यिहगी प्रुहएँॱराङ येहबा। 2 ओ़ह मिहली ताहन्दा फेप नाङसीन, ओहले ङ्यिहगी थोङसीन, ङ्यिह दिगी पाङबु येहॱराङ येह। ताहन्दा ङ्यिह ख्याया़ला ओ़ह था़ म़ेहबा मिहलीगी तेहन्दाला स्येको येहबा। याहप ङ्याम्बु च्यी़राङ था़ म़ेहबा मिहली येहकें, ओहले ओ़ह मिहली ओहराङ साला फेप नाङसीन। 3 ओहले ख्यागीॱआङ ङ्यिह ङ्याम्बुराङ छोक्पा पेहच्यु म़ेदी ङ्यिहगी च्यि थोङबा ओहले च्यि थे़बा, ओ़ह ख्याला स्येको येहबा। ङ्यिहगी छोक्पाती किन्ज्यो याहप दाङ मिह-रो़हगी स़ेबु येशू मास्यीका ङ्याम्बु येहबा। 4 ओहले ङ्यिहगी सेम लो तेहमु तेहन्दा डुप ख़ूज्यु म़ेदीराङ दि ताम प्रुहएँॱराङ येहबा। येहसेर लाहमले ओहराङगी डोलु-तेहलु पेह कोहएँ 5 ता़ह ङ्यिहगी किन्ज्योकी स़ेबु येशू लाहमले थे़क्योकी लेहङगु ख्याया़ला प्रा साल्गो येह, ओ़ह दिराङ यिहम्बा– किन्ज्योॱराङ येहसेर यिहम्बा, किन्ज्यो ङ्याम्बु ना़-जुबे माएँदी सिपाज्यीॱआङ म़ेह। 6 का़हलेॱआङ ओहराङगी छोक्पा किन्ज्यो ङ्याम्बु येह म़ेदी माएँ, यिहॱनाङ ओहराङदी ना़-जुबेलाराङ डे़दी तेहसीमानानी ओहराङगी स्योप क्याहप्क्यो ओहङगे ओहले ओहराङगी तेहन्दामगी मिहजी ताङग्यो मेहयोहङगे। 7 यिहॱनाङ मिहरो येहसेरला ज़्य़ू नाङग्यो ल़ेहमुराङ का़हलेॱआङ ओहराङॱआङ येहसेरला डोलु-तेहलु पेहसीनमाना, च्यी़गी च्यी़ ङ्याम्बु ओहराङगी छोक्पा ओहङगे ओहले मिहरोगी स़ेबु येशूकी ठा़गी ओहराङगी थाम्ज्यीराङ तिहक्पाया़ला चाङमा ज़ो नाङगे। 8 का़हलेॱआङ ओहराङगी राहङला तिहक्पा च्यिॱआङ म़ेह म़ेदी मासीमाना राहङगी राहङला गो़ कोर च्य़ूगे, ओहले ओहराङ ङ्याम्बु तेहन्दाम मेहयोहङगे। 9 का़हलेॱआङ ओहराङगी “ङाहगी तिहक्पा पेहक्यो येह” म़ेदी किन्ज्योगी दिनला मासीमाना किन्ज्योगी ओहराङगी तिहक्पा कोहङदा नाङज्ये येह, ओहले ओहराङगी पेहक्यो ना थाम्ज्यीराङ टाहङबु म़ेहबाकी ल़ेहया़ लाहमले ओहराङला चाङमा ज़ो नाङज्ये येह, च्यिबेमाना किन्ज्योनी यिह-छ्य़े सी़हएँदी यिहन ओहले टाहङबु यिहन। 10 का़हलेॱआङ ओहराङगी ङाहगी तिहक्पा पेहती म़ेह म़ेदी मासीमाना ओहराङगी किन्ज्योला स्योप क्याहप्क्यो ओहङगे ओहले ओहराङ ङ्याम्बु किन्ज्योगी सुङ मेहयोहङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.