१ कोरिन्थी 9 - ह्योल्मोल़ेह-पेनगी ओङ 1 च्यि ङाह राहङवाङ म़ेहबा ले? च्यि ङाह ल़ेह-पेन मिहम्बा ले? च्यि ङाहगी येशू, ओहराङगी चो़वोला थोङग्यो म़ेहबा ले? च्यि ख्याया़राङ चो़वोगी तेहन्दाला ङाहगी पेहक्योकी ल़ेहगी कामेया़ मिहम्बा ले? 2 काहजे मिहया़गी ङाहला ल़ेह-पेन म़ेदी मी़हचीॱनाङ ख्याया़गी तेहन्दालानी ङाह ल़ेह-पेनराङ यिहन। ख्याया़गी मास्यीकाला यिह-छ्य़े पेहक्यो तामया़गीॱआङ ङाह ल़ेह-पेन यिहम्बा म़ेदी दास्यी तेर्के। 3 ङाहला टाह पेहती ताम माएँया़ला ङाहगी ताम दिराङ यिहम्बा, 4 च्यि ङ्यिहला साहज्ये थुङज्येला ओङ म़ेहबा? 5 च्यि लेहमेन ल़ेह-पेनया़ ल़ेहमुराङ, चो़वोगी नो़ह दाङ केफासला ल़ेहमुराङ ङ्यिहलाॱआङ किन्ज्योला यिह छ्य़ेक्योगी पी़हमी थो़दी डोएँ ओङ म़ेहबा ले? 6 च्यि बारनाबास दाङ ङाहगी च्यी़राङ ल़ेह पेहती राहङगी फोवा सो कोहएँ ले? 7 राहङदीराङ डोसोङला का़हन्दी माक्मीगी ल़ेह पेहटो ले? कुहन्डुम कामे क्याहप्के मिहगी ओ़हगी कामे मेहसाहडो ले? ओहले राह-ल़ूह सोएँ मिहगी ओ़ह लाहमले ओहमा मेहसाहडो ले? 8 च्यि ङाहगी दि मिहगी नोम्साङले माक्यो ताम यिहम्बा ले? च्यि छ्य़े-ठिमगीॱआङ दि स्याहल सुङ मेहनाङगे ले? 9 च्यिबेमाना मोशाकी छ्य़े-ठिमला दि ल़ेहमु प्री़हदी येहबा, “दाइँ पेहकें लाङगोगी खाला खास्यो माहक्याहप।” च्यि दि किन्ज्योगी लाङगोया़गी तेहन्दाला च्यी़राङ सुङ नाङग्यो यिहम्बा ले? 10 च्यि किन्ज्योगी ओहराङगी तेहन्दालाराङ दि सुङ नाङग्यो मिहम्बा ले? ओहराङगी तेहन्दालाराङ दि प्रुहक्यो यिहम्बा। च्यिबेमाना लाङगो मोएँ मिह दाङ दाइँ पेहकेन ङ्यिकागीराङ कामे ट़ूहएँमु कामेकी बो ज्योर्केंनी म़ेदी रेहवा पेहती ल़ेह पेहक्यो ओहङगे। 11 का़हलेॱआङ ङ्यिहगी ख्याया़गी पाहरक्यीला यिहक्तेन सेन ताप्क्यो येहसीमाना, ओहले साहज्ये थुङज्ये दाङ ले़गा लेहन्सीमाना च्यि आन्या काहल्बा ले? 12 ख्याया़गी लेहमेनया़लानी रो़हराम पेहसीनमाना च्यि ओ़ह म़ेदीॱआङ माहङबु ङ्यिहला रो़हराम पेह मेहकोहएँ ले? ङ्यिह ङ्याम्बु ओङ येहकें यिहॱनाङ ङ्यिहगी च्यिॱआङ मा़हमे। मास्यीकाकी या़हबु लेहङगु स्येकेमु च्यि से़हज्यीगीॱआङ मा़हकाज्यु म़ेदीराङ ङ्यिहगी थाम्ज्यी ना़दे तेहसीन। 13 च्यि ख्याया़ला क्यी़ह म़ेहबा, छ्योखाङला ल़ेह पेहकेनया़गी छ्योखाङ लाहमलेॱराङ साहएँ, ओहले छ्येकाङला ल़ेह पेहकें मिहया़गी छ्येकाङ लाहमलेॱराङ राहङगी बो लेहन्गे। 14 ओ़ह ल़ेहमुराङ पेहती या़हबु लेहङगु स्य़ेकेया़गीॱआङ या़हबु लेहङगु लाहमलेॱराङ साहज्ये थुङज्ये दाङ केहन ङ्युहङ कोहएँ सुङदी चो़वोगी का नाङसीन। 15 यिहॱनाङ दि ओङया़ नाहङला ङाहगी का़हन्दीॱआङ ओङ लाङ म़ेदी म़ेह, ओहले ङाहगी तेहन्दाला दि थाम्ज्यी च्याहम्दाया़ डी़ज्यु म़ेदी ङाहगी दि ताम प्रुहक्योॱआङ मिहन। दि ल़ेहमु पेहकें म़ेदीनी तोहरोङ ङाह स्यिएँॱराङ सोनाम-साक्पु। दि ङाहती छ्य़ेन्दो तेन्गेन्गी तामला सुज्यीगीॱआङ “दिनी स्यिती काम्बु यिहन” म़ेदी मा ख़ूज्ये म़ेह। 16 ङाहगी या़हबु लेहङगु स्येकेमु छ्य़ेन्दो तेन्ज्येला ङाहला च्यिॱआङ ओङ म़ेह च्यिबेमाना दि ङाहगी मिहया़ला स्येॱराङ कोहएँ। का़हलेॱआङ ङाहगी या़हबु लेहङगु मे़हस्येसीमाना ङाह काहजे थाप-तुहक्पा! 17 ङाहगी दि ल़ेह राहङगीराङ दाम्ग्यो यिहन्सीमाना ओ़ह लाहमले च्यिरा ज्योर्केनी म़ेदी ङाहगी रेहवा पेहच्ये येहकें। यिहॱनाङ दि ल़ेह ङाहला किन्ज्योगीॱराङ चि क्याहप नाङग्यो सोङबे ङाहगी पेहॱराङ कोहएँ म़ेदी ङाहगी पेहकेनॱराङ येह। 18 ओ़हठी यिहन्सीमाना ङाहती च्याहगा च्यि यिहम्बा ले? ङाहती च्याहगा दिराङ यिहम्बा– ङाहगी या़हबु लेहङगु स्येकेमु टाङगा च्यी़ॱआङ माहलेहम्बा पेहती स्य़े ङ्युहङज्यु। ओ़हठी पेहती या़हबु लेहङगु स्येकेमु ङाहगी ज्योर्केन्की ओङया़ चा़लती माहकोहज्यु। 19 च्यिबेमाना ङाह मिहया़ लाहमले राहङवाङ येहॱनाङ तोहरोङ माहङबु मिहया़ला किन्ज्योगी क्याहल्सीला ख्योङ ख़ूज्यु म़ेदी ङाह राहङगी राहङलाराङ मिह थाम्ज्यीदी लाबु ज़ोसीन। 20 यहूदी मिहया़ला मास्यीकाला ख्योङ ख़ूज्यु म़ेदी यहूदीया़की तेहन्दाला ङाह यहूदी ल़ेहमुराङ काहल्सीन। छ्य़े-ठिमगी ओङ चो़ला तेहकें मिहया़ला मास्यीकाला ख्योङ ख़ूज्यु म़ेदी ङाह राहङॱआङ छ्य़े-ठिमगी ओङ चो़ला मे़हॱनाङ छ्य़े-ठिमगी ओङ चो़ला येहकेनया़गी तेहन्दाला छ्य़े-ठिमगी ओङ चो़ला ज्युल्दी तेहसीन। 21 छ्य़े-ठिम म़ेदी फिला येहकेनया़ला मास्यीकाला ख्योङ ख़ूज्यु म़ेदी ङाह राहङॱआङ किन्ज्योगी छ्य़े-ठिमला माहगोम्बा पेहती मास्यीकाकी छ्य़े-ठिमकी ओङ चो़ला तेहती छ्य़े-ठिम म़ेदी फिला येहकें मिहया़ ल़ेहमुराङ काहल्सीन। 22 मा-फाम्बु मिहया़ला मास्यीकाला ख्योङ ख़ूज्यु म़ेदी ङाह राहङॱआङ मा-फाम्बु पेहती तेहसीन। काह-ठि पेहती यिहॱनाङ मिहया़ला मास्यीकाला थार च्य़ू ख़ूज्यु म़ेदी नामे नाजो छ्याप्स्यीया़ पेहती ङाहॱआङ खुङ ल़ेहमुराङ काहल्सीन। 23 या़हबु लेहङगुगी मेलामया़ ङाहगी ज्योर ख़ूज्यु म़ेदीराङ ङाहगी दि ना थाम्ज्यी या़हबु लेहङगुगी तेहन्दालाराङ पेहकेनॱराङ येहबा। 24 तेहम्बाराङ ख्याया़ला क्यी़ह येहबा। छ्योङ-छ्योङ चेएँमु मिह थाम्ज्यीराङ छ्योङगे, यिहॱनाङ च्याहगादी मेहन्दा च्यी़गीज्यीराङ ज्योर्के। ओ़ह सोङबे ख्याया़ॱआङ च्याहगा ज्योर्के छ्याप्स्यी पेहती छ्योङदोङ। 25 चेमु चाज्येला बो लेहन्गे मिहया़गी ज्यिबुराङ तुहक्पु पेहती च्याहङदार पेहकें। खुङया़गी ओ़ह तोङदी डोएँगी च्याहगा ज्योर्च्येला ओ़हठी पेहकें, यिहॱनाङ ओहराङदी नाहमॱआङ मेहतोङगे च्याहगा ज्योर्च्येला दिठी पेहकें। 26 ओ़ह सोङबे ङाह मी़ मा़हतेबा पेहती मे़हछ्योङ। ङाह ल्हा़बाला ओ़दुम मेहक्याहप। 27 यिहॱनाङ ङाह राहङगी ज़ुबुला ज्यिबुराङ तुहक्पु तेर्ती च्याहङदार पेहकें ओहले ङाह राहङगी ज़ुबु दाङ सेमला थिला ज़्या़गे, मिहन्सीमानानी लेहमेनया़ला या़हबु लेहङगु स्येती ङाह राहङती च्याहगा ज्योर्च्येगी तेहन्दाला सी़हज्ये म़ेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.