१ कोरिन्थी 8 - ह्योल्मोकुला छ्येपा फुल्ग्योकी साहएँ से़हया़ 1 ता़ह ङाह कुला छ्येपा फुल्ग्यो साहएँ से़हया़गी तेहन्दाला माउ येह। ओहराङला क्यी़हराङ येहबा, ओहराङ ङ्याम्बु येहन्देन येहबा। येहन्देनगी मिहला छ्य़ेन्दो तेन्गे ज़ोएँ, यिहॱनाङ चेवागीती मिहला याहरक्यी डो च्य़ूगे। 2 का़हलेॱआङ सुज्यीगी “ङाह तेहम्बाराङ स्य़ेएँ” म़ेदी साम्लु ताङसीमाना, खोगी काहजे स्य़े कोहएँ यिहम्बा ओहजे स्य़ेक्यो मेहयोहङगे। 3 यिहॱनाङ का़हन्दीगी किन्ज्योला चेवा पेहकें खोला किन्ज्योगी ङोह ख्येन्गे। 4 कुला छ्येपा फुल्ग्योगी साहएँ से़हया़ साहज्ये ओहङगेनी मेहयोहङगे माएँ ताम ओहराङला क्यी़ह येहबा, जाम्बुलीङला कु च्यिॱआङ मिहम्बा, किन्ज्यो च्यी़ मिहम्बा लेहमेन सुॱआङ म़ेह। 5 नाम दाङ जाम्बुलीङला मिहन च्यिगी ल्हाया़ च्यी़राङ येहबा यिहन्डो। (तेहम्बाराङ दि ल़ेहमु माहङबुराङ “ल्हाया़” दाङ “चो़वोया़” येहबा) 6 यिहॱनाङ ओहराङगी तेहन्दालानी किन्ज्यो याहप च्यी़राङ ज़्य़ू नाङदी येहबा। मिहरोगीॱराङ थाम्ज्यीराङ से़हया़ ज़ो नाङसीन। ङ्यिह किन्ज्योगी तेहन्दालाराङ थार्के। ङ्यिहती च्यिमे च्यी़राङ चो़वो येशू मास्यीका ज़्य़ू नाङदी येहबा। मिहरो लाहमलेॱराङ थाम्ज्यी से़हया़ छ्या़सीन। मिहरो लाहमलेॱराङ ङ्यिह थार्के यिहम्बा। 7 यिहॱनाङ मिह थाम्ज्यीला दिगी तेहन्दाला क्यी़ह मेहयोहङगे। यिहॱनाङ काहजे मिहया़ कुला छ्येपा फुल्गेन बा़नी काहल सिहन्ग्यो ओहङगे, खुङया़गी दि ल़ेहमु साहप्च्या साहएँमु तेहम्बाराङ कुला फुल्ग्यो यिहम्बा म़ेदी ने़गे, ओहले खुङया़गी नावा मा-फाम्बु येहकें सोङबे खो मेहचाङा डोएँ। 8 साहएँ से़हगी मिहला किन्ज्यो पोहला ख्येर मी़हखुएँ ओ़ह सोङबे मेहसाहएँमु च्यिॱआङ क्येन म़ेह ओहले साहएँमुॱआङ च्यिॱआङ फेन्दोप म़ेह। 9 यिहॱनाङ जेम्बु पेह, ख्येगी राहङवाङगी यिह-छ्य़ेला मा-फाम्बु येहकें मिहया़ तिहक्पाला माहछ्यीज्यु। 10 च्यिबेमाना का़हलेॱआङ यिह-छ्य़ेला मा-फाम्बु येहकें मिहगी ख्ये रिहक्स्यी येहकें मिहला कुगी छ्योखाङला साहज्येला तेहक्यो थोङसीमाना, च्यि कुला फुल्ग्योकी साहएँ से़हया़ साहज्येला खोला स्युक मेहक्येएँ ले? 11 ओहले ख्येगी येहन्देनगी पेहती ओ़ह यिह-छ्य़ेला मा-फाम्बु येहकें नो़ह तिहक्पाला छ्यिकें। खोगी तेहन्दाला चो़वो मास्यीका टोहङ नाङग्यो यिहम्बा। 12 दि ल़ेहमु पेहती ख्यागी यिह-छ्य़ेला मा-फाम्बु येहकेन राहङ नो़हया़गी सेम सुह क्याहप च्य़ूदी ख्यागी मास्यीकाला टाह पेहती तिहक्पा पेहकें। 13 का़हलेॱआङ साहएँ से़हया़गी ङाहती किन्ज्योला यिह-छ्य़े पेहक्यो नो़हया़ला तिहक्पाला छ्यिच्युगे यिहन्सीमानानी ङाह नाहमॱआङ स्या साहज्ये म़ेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.