१ कोरिन्थी 5 - ह्योल्मोदेक्षा 1 ख्याया़गी पाहरक्यीला देक्ष येहबा माएँ ताम ङाहगी या़हबु पेहती थे़दी येह, दि ल़ेहमु देक्षनी लेहमेन क्यिहपाकी मिहया़गी पाहरक्यीलाॱआङ मेहयोहङगे। ख्या नाहङला मेहन्दा च्यी़गी राहङदीराङ आसा-आमाला राहङ ङ्याम्बुराङ ज़्या़दी येह माएँ ताम ङाहगी थे़दे येहबा। 2 तोहरोङ ख्यानी सेम मा-फाम्बु पेह कोहएँ ग्या़लानी छ्य़ेन्दो गा तेन्गु दुबा! दि ल़ेहमु पे मी़हसीहएँगी ल़ेह पेहकें मिहला ख्याया़गी छोक्पाले तेन चोहङ। 3 ङाह ज़ुबुला था़-रिहङबु येहॱनाङ ङाहगी सेमनी ख्या ङ्याम्बुराङ येह। ओ़ह सोङबे ङाह ख्यागी पाहरक्यीला येहकें ल़ेहमुराङ पेहती दि ल़ेहमु ल़ेह पेहकेन मिहला ङाहगी ठिम ताङ सिहन्दी येह। 4 ख्याया़ ओहराङ चो़वो येशूकी छेनला जोम्गेमु ङाहॱआङ यिहला ख्याया़ ङ्याम्बुराङ ओहङज्ये येह ओहले ओहराङ चो़वो येशू मास्यीकाकी ओङॱआङ ओ़हला ओहङज्ये येह। 5 ओ़ह मिहगी पे मी़हसीहएँ ज़ुबुकी पेहताङया़ तोङज्यु म़ेदी ख्याया़गी खोला ती़ह गो-छ्येवागी लाहक्पाला चि क्याहप्तोङ ओहले चो़वोगी ठिम ताङ नाङगे ङ्यिहमाला खोगी यिहदी थार ख़ूज्यु। 6 ख्याया़गी छ्य़ेन्दो तेन्गेन्दी या़हबु मिहम्बा। च्योप्क्यो चाम्बाला सिपाज्यीराङ खमिर लू़सीमाना चाम्बा रेबेॱराङ फोर्के माएँदी च्यि ख्याया़ला क्यी़ह म़ेहबा? 7 दि निङबा तिहक्पाकी खमिरला ख्याया़गी तेन्दी क्युरॱराङ कोहएँ। ओहले ख्याया़ या़हबु पेहती चाङमा डो ख़ूज्ये येह। यिहन्ज्येनी ख्या खमिर मा़हलुबा च्योप्क्यो साम्बा चाम्बाराङ यिहन। ओहराङदी थार्पा छ्येपा ठाबे येह च्यिबेमाना ओहराङगी थार्पा नाङगेन्गी मास्यीकाॱराङ ल़ूह स्ये़बु ल़ेहमु जेती मार्च्ये फुल सिहन्दी येह। 8 ओ़ह सोङबे ओहराङ निङबा खमिरगी, पे यिहॱना़ ल़ेह चोक्पा दाङ ल़ेह ङ्येहम्बा खमिरगी मिहम्बा यिहॱनाङ खमिर मा़हलुबागी खुरा चाङमा दाङ तेहन्दामगी थार्पा छ्येपा ताङ कोहएँ। 9 ङाहगी प्रुहक्योकी यिहगीला ख्याया़ला छ्येउ-छ्येंमु पेहकें मिहया़ ङ्याम्बु माहच्याम म़ेदी माक्यो येहकें। 10 किन्ज्योला ङोह मा़हस्येबा मिहया़गी छ्येउ-छ्येंमु पेहकें, ह्अम्बा पेहकें, कुमेन क्याहप्के दाङ कुला छ्येपा फुल्गे ङाहगी दि ल़ेहमु मिहया़ ङ्याम्बु माहच्याम म़ेदी माक्यो मिहम्बा, मिहन्सीमानानी ख्याया़ दि जाम्बुलीङलेगीॱराङ थेन्दी डो कोहच्ये येहकें। 11 ओ़ह सोङबे ङाहगी ख्याला ताहन्दा माएँ, “ङाह किन्ज्योला यिह-छ्य़े पेहक्यो नो़ह यिहम्बा” म़ेदी माज्येनी माएँ यिहॱनाङ छ्येउ-छ्येंमु पेहकें, ह्अम्बा पेहकें, कुला छ्येपा फुल्गे, मिह ताम च्येहके, छ्याङसीवा ओहले कुमेन क्याहप्केनया़गी तेहन्दाला माक्यो यिहम्बा। ओ़ह ल़ेहमु मिहया़ ङ्याम्बुनी तेहती तोप्च्याॱआङ माहसाह। 12 किन्ज्योला ङोह मा़हस्येबाकी मिहया़ला ठिम ताङगेन ल़ेह ङाहती मिहन। यिहॱनाङ ख्याया़गी छेन्छोक नाहङगी मिहया़ला ठिम ताङॱराङ कोहएँ, मिहम्बा ले? 13 किन्ज्योला ङोह मा़हस्येबाकी मिहया़ला किन्ज्योगीॱराङ ठिम ताङ नाङज्ये येह। “ख्याया़गी राहङगी पाहरक्यीले मिह ङ्येहम्बाला तेन चोहङ।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.