१ कोरिन्थी 3 - ह्योल्मोमास्यीकाला स्याहप्तो स्युहएँ पावल दाङ अपोल्लोस 1 आदा-नो़ह दाङ आज्यी-नुहमुया़, ख्या ङ्याम्बु ताम माएँमु यिहक्तेन मिहया़ ङ्याम्बु ल़ेहमु पेहती ङाहगी ताम मा मा़हखु, यिहॱनाङ जाम्बुलीङकी मिह, मास्यीकाला येहकेन्गी ल़ेनु पेहजाया़ ङ्याम्बु ताम माक्यो ल़ेहमु पेहती ङाहगी ताम मा ख़ूसीन। 2 ओ़ह सोङबे ङाहगी ख्याला सान्दी-सान्दी तोप्च्याया़ मिहम्बा, ओहमाॱराङ लिन कोहसीन, च्यिबेमाना ख्याया़ तोहङलेॱआङ सान्दी-सान्दी तोप्च्याया़ साह मी़हखुएँ येहकें, ओहले ताहन्दाॱआङ साह मी़हखुएँ। 3 तोहरोङॱआङ ख्या जाम्बुलीङकी सेम्बाया़ लाहमले राहङगी मिहजी ताङगो दु। ओहले ख्या राहङ नाहङदुङ ठादो पेहकेन दाङ ठ़ूस्यी सिहङदा पेहकेन्की केच्याया़नी येहॱराङ येहबा। च्यि ओ़हठी यिहन्सीमानानी ख्या राहङगी ज़ुबुकी च्यि पेहच्ये सेम क्येएँ ओ़हठीॱराङ डोलु-तेहलु पेहकेन जाम्बुलीङकी लेहमेन मिहया़ ल़ेहमुराङ माहकाहल ले? 4 च्यिबेमाना च्यी़गी “ङाह पावलती यिहम्बा” ओहले लेहमेनगी “ङाहती अपोल्लोसती यिहम्बा” म़ेदी मासीमाना, च्यि ख्या किन्ज्योला ङोह मा़हस्येबाकी लेहमेन मिहया़ ल़ेहमुराङ माहकाहल ले? 5 अपोल्लोस सु यिहम्बा? ओहले पावल सु यिहम्बा? ङ्यिह ङ्यी़नी ख्याया़ला किन्ज्योला ख्योङगेन्गी किन्ज्योकी स्याहप्तो स्युहएँगी मिहया़ च्यी़राङ यिहम्बा। चो़वोगीॱराङ कुल नाङग्योकी छ्या़ले ङ्यिहगी पेहको येह। 6 ङाहगी च़ूसीन ओहले अपोल्लोसगी छ्यु लू़सीन, यिहॱनाङ ओ़हदीला छार च्य़ू नाङगेन्दीनी किन्ज्योॱराङ यिहम्बा। 7 ओ़ह सोङबे च़ूगेन दाङ छ्यु लू़गेन छ्यिम्बु मिहम्बा, यिहॱनाङ छार च्य़ू नाङगेन किन्ज्यो गा छ्यिम्बु यिहम्बा। 8 च़ूगेन दाङ छ्यु लू़गेनदीला च्यिॱआङ ख्येपार म़ेह। थाम्ज्यीगी राहङ-राहङगी ल़ेहला ते़बेकी राहङगी ले़गा ज्योर्च्ये येह। 9 च्यिबेमाना ङ्यिह ङ्याम्बु-ङ्याम्बुराङ किन्ज्योकी छ्या़ले पेहकेन्की मिहया़ यिहम्बा, ओहले ख्याया़ती किन्ज्योकी स्यिहङ दाङ किन्ज्योकी ज़िम्गाङ यिहम्बा। 10 किन्ज्योगी ङाहला नाङग्यो काटीनगी पेहती ङाहगी गो-छ्येवा चिक्सो-खे़बागी ल़ेहमुराङ पेहती खाङबाकी ब्राम तिङ ङ्युहङसीन, ओहले लेहमेनगीती ओ़ह थो़ला खाङबा ज़ोएँ। खाङबा ज़ोएँ थाम्ज्यीगी काह-ठि पेहती ज़ो कोहएँ यिहम्बा, ओ़ह या़हबु पेहती साम्लु ताङ कोहएँ। 11 च्यिबेमाना किन्ज्योगी तिङ नाङग्योकी ब्राम च्यिमी च्यी़राङ येहबा ओ़ह येशू मास्यीका यिहम्बा, ओ़ह म़ेदी लो़हलो सु मिह च्यी़गीॱआङ लेहमेन ब्राम तिङ मी़हखुएँ। 12 का़हलेॱआङ सु मिह च्यी़गी दि ब्राम थो़ला सेर, ङुल दाङ निङबु तोहया़ ख्योङदी चिक्पा ची़ ओहङ, ओहले लाहलागीती स्यिङ, सो़मा दाङ सोवागी चा ख्योङदी दि खाङबा ज़ो ओहङ। 13 मिह थाम्ज्यीकी या़हबु चोक्पा ल़ेहया़ किन्ज्योगी ठिम ताङ नाङगे ङ्यिहमाला ङ्याहम च्ये नाङज्ये येह च्यिबेमाना ओ़ह ङ्यिहमाला खुङया़गी पेहक्योकी ल़ेह काह-ठि दुबा म़ेदी मेहला लू़दे ज़ी़ नाङज्ये येह। 14 ओ़ह ब्राम थो़ला ज़ोएँ मिहगी ल़ेह मेहला लू़गेमु थाला मेहन्डोसीमाना खोगी च्याहगा ज्योर्च्ये येह। 15 का़हलेॱआङ सु मिह च्यी़गी ल़ेह मेहगी छी़दे थाला फुङे काहल्सीन मानादी खोगी क्यी़ह खुर कोहच्ये येह, यिहॱनाङ खो राहङती मेह नाहङलेगी स्योरक्यो ल़ेहमुराङ पेहती थार्च्ये येह। 16 ख्या किन्ज्योकी छ्योखाङ यिहम्बा ओहले किन्ज्योकी थु ख्या नाहङला ज़्य़ू नाङगे। च्यि दि ताम ख्याया़ला क्यी़ह म़ेहबा? 17 का़हलेॱआङ सुज्यीगी किन्ज्योकी छ्योखाङला तोङ च्यू़सीमाना किन्ज्योगी खोला तोङ च्य़ू नाङज्ये येह। च्यिबेमाना किन्ज्योकी छ्योखाङ नाम्पार-ताहक्पा ओहङगे, ओहले ओ़ह छ्योखाङ ख्याराङ यिहम्बा। 18 सुज्यीगीॱआङ राहङगी राहङला चिहन माह-क्याहप्च्यु! ख्या पाहरक्यीला सुज्यीगी दि काल्बाला ङाहराङ ख्येम्बा-ताहक्पु यिहन म़ेदी नेसीनमाना खो उल्दुम्बा डोज्यु। ओहले च्यी़राङ खो ख्येम्बा-ताहक्पु डो ख़ूज्ये येह। 19 च्यिबेमाना जाम्बुलीङकी रिहक्स्यी किन्ज्योकी दिनला उल्दुम्बा यिहम्बा। छ्य़ेला दि ल़ेहमु प्री़हदी येहबा, “ख्येम्बा ताहक्पुया़गी राहङगी रिहक्स्यीकी पेहक्योकी टिहम्दाङकी ल़ेहया़ लाहमलेॱराङ किन्ज्योगी खुङया़ला मिताला छ्यि च्य़ू नाङगे।” 20 ओहले येहपाराङ, “ख्येम्बा ताहक्पुया़गी साम्लुया़ च्यिॱआङ फेन थो़ज्ये म़ेह म़ेदी चो़वोला थुयी़ येहबा।” 21 ओ़ह सोङबे सुज्यीगीॱआङ मिहगी पेह ख़ूएँगी ल़ेह थो़ला छ्य़ेन्दो माहतेन्ज्यु। च्यिबेमाना थाम्ज्यीराङ से़हया़ ख्याराङदीॱराङ यिहन। 22 पावल, अपोल्लोस दाङ पत्रुस ख्यातीराङ यिहम्बा, जाम्बुलीङ ख्यातीराङ यिहम्बा, मिहली दाङ स्यिवा ख्यातीराङ यिहम्बा, ओहले ताहन्दागी ती़हजी दाङ तिङले ओहङगेन्गी ती़हजी थाम्ज्यीराङ ख्यातीराङ यिहन। 23 ओहले ख्याया़ मास्यीकाती यिहम्बा, ओहले मास्यीकाती किन्ज्योदी यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.