१ कोरिन्थी 2 - ह्योल्मोक्याहङस्यीङला टोहङ नाङग्यो मास्यीकाकी लेहङगु 1 आदा-नो़ह दाङ आज्यी-नुहमुया़, ङाह ख्यासाला किन्ज्योदी तिहङ-रिहङबुगी स्याहलया़ स्य़े ओहङगेमु छ्यिम्बु-छ्यिम्बु ताम म़ेदी रिहक्स्यीकी छ्य़ेन्दो माहतेन। 2 च्यिबेमाना ङाह ख्या ङ्याम्बु येहकेंमु ङाहगी येशू मास्यीका दाङ मिहरोला क्याहङस्यीङला च्याङग्योकी तामया़ मिहम्बानी लेहमेन थाम्ज्यी तामया़ला आहन्डाराङ टेहम्बा च्येहती ताङगे म़ेदी ङाहगी सेम पेहसीन। 3 ङाह ख्यासाला ओहङगेमु ङाह ज्यिबुराङ मा-फाम्बु पेहती, ओहले ज्यी़दी दार्ती तेहसीन। 4 ङाहगी ताम माएँमु ओहले लोप्च्युङ प्रा साल्गेमु ख्येसो तेन्दी रिहक्स्यीकी छ्यिम्बु-छ्यिम्बु ताम छिकाया़ मा़हमे, यिहॱनाङ ओ़ह किन्ज्योकी थु दाङ ओङ लाहमले ङाहगी प्रा साल खू़क्यो यिहन्गे। 5 ओ़ह सोङबे ख्याया़की तेहपा मिहगी रिहक्पा-रिहक्स्यी थो़ला मिहम्बा, यिहॱनाङ किन्ज्योकी ओङ थो़ला ज़्या़ ख़ूज्यु। 6 यिह-छ्य़ेला चार्ङ्यी तिहङ रिहङबु सू़ह सिहन्ग्योया़ ङ्याम्बु ङ्यिह रिहक्स्यीकी तामया़ प्रा साल्गे, यिहॱनाङ दि काल्बाकी रिहक्स्यी मिहम्बा। दि काल्बाला ओङ छ्येएँया़की रिहक्स्यीॱआङ मिहम्बा। दिया़नी ङ्यिहमा च्यी़ तोङदी डोज्ये येह। 7 यिहॱनाङ ङ्यिह किन्ज्योगी पे़हदी ज़्या़ नाङग्यो दाङ साङदे ज़्या़ नाङग्योकी रिहक्स्यीगी तेहन्दाला प्रा साल्गो येहबा। ओ़ह काल्बा-काल्बा तोहङ यिहन्ज्युराङ ओहराङगी ज़िज्यिदकी तेहन्दालाराङ ठाबे जे नाङग्यो येहकें। 8 दि काल्बाला ओङ छ्य़ेएँ का़हन्दीॱआङ क्याहल्बुया़गी ओ़ह तामया़ ङोह स्य़े मा़हखु। का़हलेॱआङ ङोह स्य़े ख़ूबा यिहनानी ज़िज्यिदकी चो़वोला खुङया़गी क्याहङस्यीङला च्याङज्येॱराङ म़ेहबा येहकें। 9 यिहॱनाङ छ्य़ेला दि ल़ेहमु प्री़हदी येहबा, “मी़गी माहथोङबा, नाम्ज्योगी मा़हथेबा ओहले मिहगी सेमला मा़हनेबाकी तामया़ॱराङ किन्ज्योगी मिहरोला चेवा जे नाङगेया़गी तेहन्दाला ठाबे जे-नाङदी येहबा।” 10 किन्ज्योगी राहङगी थु लाहमले ओहराङला राहङगी स्याहलया़ तेन नाङदी येह। च्यिबेमाना नाम्पार-ताहक्पा थुगी ना थाम्ज्यीराङ तामया़ छोल नाङगे, ओहले किन्ज्योकी तिहङ रिहङबु-रिहङबुकी तामया़ॱआङ छोल नाङगे। 11 मिह राहङगी सेम नाहङला साम्लु ताङग्योगी तामया़ खो राहङगी यिहगी मिहम्बा नि लेहमेन सुगी ह्अ कोह ख़ूज्ये ले? ओ़हठीॱराङ पेहती किन्ज्योकी थु किन्ज्योकी थुगी मिहम्बा लेहमेन सुगीॱआङ ङोह स्य़े मी़हखुएँ। 12 ता़ह ओहराङगी जाम्बुलीङकी नाम्स्यी मिहम्बा, यिहॱनाङ किन्ज्योगी थु ज्योर्ती येह। किन्ज्योगी ओहराङला आहन्डाराङ नाङग्योकी ना थाम्ज्यीराङ तामया़ ङोह स्य़े ख़ूज्यु म़ेदीराङ ओहराङगी किन्ज्योगी थु ज़्योरक्यो यिहम्बा। 13 ओ़ह सोङबे ङ्यिह मिहया़की रिहक्स्यीगी लोप्क्योकी छिका लाहमले मिहम्बा, यिहॱनाङ नाम्पार-ताहक्पा थुगी लोप नाङग्योकी स्याहलया़ लाहमले ङ्यिह यिहक्तेन छिकाया़ला यिहक्तेन तेहम्बा-तेहन्सुमकी तेहन्दाया़ प्रा साल्गो येह। 14 का़हन्दी मिह यिहक्तेन म़ेह, खोगी किन्ज्योकी थुगी स्याहलया़ ल़ेहन मी़हखुएँ। च्यिबेमाना ओ़ह से़हया़नी खोगी तेहन्दाला उल्दुम्बा यिहम्बा ओ़ह सोङबे खोगी ओ़ह से़हया़ ङोह स्य़े मी़हखुएँ, च्यिबेमाना ओ़ह से़हया़ यिहक्तेन लाहमले च्यी़राङ ङोह स्य़े ख़ूएँ यिहम्बा। 15 यिहक्तेन मिहगी थाम्ज्यीराङ तामया़ या़हबु दाङ चोक्पा च्यि यिहम्बा दु म़ेदी ङ्याहम च्ये ख़ूएँ, यिहॱनाङ खोलाती सुज्यीगीॱआङ ङ्याहम च्ये मी़हखुएँ। 16 “च्यिबेमाना सुगी चो़वोगी थुला ङोह स्य़े खू़क्यो येहबा ले? ओहले सुगी चो़वोला लोप ख़ूएँ ले?” यिहॱनाङ ओहराङगी दि तामया़ ङोह स्य़े ख़ूएँ च्यिबेमाना ओहराङ ङ्याम्बुनी मास्यीकाकी थु ज़्य़ू नाङदी येहबा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.