१ कोरिन्थी 16 - ह्योल्मोयहूदी मास्यीकापाया़गी तेहन्दाला डेल्बा तुहक्यो 1 यहूदीयाला तेहकेन्गी मास्यीकागी नाम्पार-ताहक्पा मिहया़गी तेहन्दाला डेल्बा तिहदोङ म़ेदी ङाहगी गलातीकी छेन्छोकला माक्यो ल़ेहमुराङ पेहतोङ। 2 जा ङ्यिहमा-टाहङमाराङ ख्या राहङ-राहङगी कामे ती़क्योदी टाङगा लाहमले सिपाज्यी डेल्बाकी तेहन्दाॱलाङ खा फ़ेदोङ। ओ़हठी पेहसीमाना ङाह ओहङगेमु ख्याया़गी टाङगा ती़हदे तेह मेहकोहएँ। 3 ओहले ङाह लेप फान्ज्यो ङाहगी यिहगी प्री़हदी ख्याया़गी सुगी लाहक्पाला डेल्बा ताङज्ये म़ेदी सेम्बा पेहती येहबा ङाह खुङगी लाहक्पालेॱराङ ख्याया़गी डेल्बा लेहन्दी यरूशलेमला ताङ चाहङगे। 4 यिहॱनाङ ङाहॱआङ डो कोहज्ये ॱठि येहसीमाना खुङया़ ङाह ङ्याम्बुराङ डोज्ये येह। पावल कोर्याङला डोज्येला ठाबे पेहक्यो 5 ङाह माकेडोनिया लुहङबाला कोरा क्याहप्ती लो़ह ओहङगेमु ख्याया़ला थ़ूगे, च्यिबेमाना ताहन्दा ङाह माकेडोनियाकी लाहमले पेहतीराङ डोॱराङ येहबा। 6 ङाह लो़ह ओहङगेमुदी ङ्यिहमा तोबा थु ख्याया़ ङ्याम्बु तेह को़हटो, ला़ खासीमाना ङाह सेर्का काहङॱराङ ख्याया़ ङ्याम्बुराङ तेहकें। ओ़ह तिङले ङाह येहपाराङ कोर्याङला थेन्गेमु ख्याया़गी ङाहगी कोर्याङगी तेहन्दाला लाहमगी च्याहम्दाया़ ठाबे पेह ख़ूज्ये येह। 7 दि पा़लो ङाह ख्या ङ्याम्बु याहम्बीज्यीॱराङ मिहम्बा, का़हलेॱआङ चो़वोगी थुला येहसीमानानी ङाह ख्याया़ ङ्याम्बु ङ्यिहमा माहङबुराङ तेह ङ्युहङज्ये येह म़ेदी ङाहगी रेहवा पेहती येहबा। 8 यिहॱनाङ पेन्तिकोस छ्येपा थु ङाह एफिससलाॱराङ तेहकें। 9 च्यिबेमाना ङाहगी चो़वोकी छ्या़ले पेहकेन्गी ज्यिबुराङ छ्यिम्बु लोहङ ज्योर्ती येहबा, ओहले ङ्यिहला टाह पेहकें मिहया़ॱआङ देला माहङबुराङ येहबा। 10 तिमोथी ख्यासाला ओहङगेमु खोला च्यि से़हदीॱआङ ज्यिक्पा मेहयोहङगे छ्याप्स्यी पेहती ख्याया़गी खोला तेहसा ग्या़ तेर्तोङ। च्यिबेमाना खोगीॱआङ ङाहगी ल़ेहमुराङ चो़वोगी छ्या़लेया़ पेहकेनॱराङ येहबा। 11 ओ़ह सोङबे सुगीॱआङ खोला ङ्येन्ज्येन माहबेच्यु। यिहॱनाङ खो ङाहसाला ओहङगेमु खोला सेम लो तेहमु पेहती ख्याया़गी ताङ चाहङदोङ। च्यिबेमाना आदा-नो़हया़ ङ्याम्बु ओहङगेॱराङ येहबा म़ेदी ङाह खो ओहङगेन्गी लाहम ते़ तेहती येहबा। 12 ता़ह नो़ह अपोल्लोसगी तेहन्दाला ङाह ख्याया़ला दि ताम माएँ, ङाहगी खोला लेहमेन आदा-नो़हया़ ङ्याम्बु डी़दी ख्याया़ला थुज्येला सोङ म़ेदी ज्यिबुराङ ओहर-छ्य़े स्युहसीन, यिहॱनाङ ताहन्दा खो ख्यासाला डोज्ये सेम माहबे। यिहॱनाङ खोला लोहङ ज्योर लुहङ म़ेहबा खो ख्यासाला ओहङज्ये येह। पावलगी तिङस्यो लोप्च्युङ 13 जेम्बु पेहती तेह, यिह-छ्य़ेला थिक-चि पेहती तेहतोङ। आ़र क्ये़दी सान्दी पेहती तेहतोङ। 14 च्यि ल़ेह पेहॱनाङ ओ़ह थाम्ज्यी चेवा लाहमलेॱराङ पेहतोङ। 15 आदा-नो़ह दाङ आज्यी-नुहमुया़, ख्याया़गी अखैयाला येहकेन्गी स्तिफनास दाङ खोगी खाङबा म़ेहमे थाम्ज्यीला ङोह स्य़ेएँ। खुङगी थाम्ज्यी म़ेदी तोहङस्यो किन्ज्योला यिह-छ्य़े पेहक्यो येहकें। ताहन्दा खुङया़गी मास्यीकागी पुह पोहमोया़ला स्याहप्तो स्य़ूहज्येला राहङगी मिहजीराङ तेर्ती येहबा। 16 दि ल़ेहमु मिहया़ दाङ दिठीॱराङ कादुप च्याहङदी ङ्याम्बु-ङ्याम्बुराङ ल़ेह पेहकें मिहया़गी ओङ चो़ला तेह म़ेदी ङाह ख्याया़ला ओहर-छ्य़े स्युहउ येह। 17 स्तिफनास, फोर्टुनाटस दाङ अखाइकस ओहङगेमु ङाह ज्यिबुराङ क़ेहनाङ लाहङसीन च्यिबेमाना ख्याया़ म़ेहबा ती़हजीला खुङया़गी ङाहला रो़हराम पेह तेर्सीन। 18 च्यिबेमाना खुङया़गी ङाहती ओहले ख्याया़गी यिहला आ़र क्ये च्य़ूसीन। खुङ ल़ेहमु मिहया़ला ची़नाङ पेहतोङ। 19 एशियाला येहकेन्गी छेन्छोकया़गी ख्याया़ला टास्यी-देले ताङदी येह। अकिलास, प्रिस्का दाङ खुङया़गी खाङबाला येहकेन्गी छेन्छोकया़गी चो़वोगी छेनला ख्याया़ला टास्यी-देले ताङदी येह। 20 थाम्ज्यीराङ आदा-नो़ह दाङ आज्यी-नुहमुया़की ख्याया़ला टास्यी-देले ताङदी येहबा। ख्याया़गीॱआङ च्यी़गी च्यी़ला नाम्पार-ताहक्पा चेवा लाहमले टास्यी-देले पेहतोङ। 21 ङाह पावल, राहङगीराङ लाहक्पागी दि टास्यी-देलेगी ताम छिकाया़ प्रुहएँॱराङ येहबा। 22 का़हन्दीगी चो़वोला चेवा मेहबेकें खोला मे़मु सू़हज्यु। ए ओहराङगी चो़वो, फेप नाङदोङ! 23 चो़वो येशूगी काटीन ख्याया़ ङ्याम्बु ज़्य़ू नाङज्यु। 24 मास्यीका येशूकी छेनला ङाहगी चेवा ख्या थाम्ज्यी ङ्याम्बु लिहच्यु। आमेन। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.