१ कोरिन्थी 15 - ह्योल्मोयेशू टोहङलेगी सोम्बो ज़्याङ नाङग्यो 1 आदा-नो़ह दाङ आज्यी-नुहमुया़, ङाहगी ख्याया़ला स्ये़क्योकी या़हबु लेहङगु ङाह येहपाराङॱआङ ख्याया़ला टेहम्बा साल च्य़ूएँ। च्यिबेमाना ख्याया़गी ओ़ह या़हबु लेहङगुला राहङगी सेम तिहङ यिहन्ज्युराङ यिह छ्य़ेसीन ओहले ताहन्दा थु ख्याया़ ओ़ह या़हबु लेहङगुला थिक-चि पेहती तेहती येहबा। 2 का़हलेॱआङ ख्याया़ ङाहगी स्येक्योगी या़हबु लेहङगुला थिक-चि पेहती तेहक्यो येहसीमाना ख्याया़ दि लाहमले थार सिहन्दी येह, मिहन्सीमानानी ख्याया़गी स्यिती काम्बुला यिह छ्य़ेसीन। 3 च्यिबेमाना ङाहगी च्यि ज्योर्पा ओ़ह ङाहगी थाम्ज्यी म़ेदी चा़ छ्यिम्बु ने़दी ख्याया़ला चि क्याहप्सीन, ओ़ह च्यि यिहम्बामाना, नाम्पार-ताहक्पा सुङरापगी सुङग्यो ल़ेहमु “मास्यीका ओहराङगी तेहन्दाला टोहङ नाङसीन।” 4 मिहरोगी फुङबुला तो़हसीन, ओहले नाम्पार-ताहक्पा सुङरापगी सुङग्यो ल़ेहमु “मिहरो ङ्यिहमा सुम तिङले येहपाराङ सोम्बो ज़्याङ नाङसीन।” 5 ओहले मिहरो पत्रुस (केफास) साला ओहले ओ़ह तिङला स्याहप्च्यी च्यिङ्यी़ सालाॱआङ थेन फेप नाङसीन। 6 ओ़ह तिङला मिहरो ती़हजी च्यी़लाॱराङ ङाप्क्या म़ेदीॱआङ माहङबु आदा-नो़ह दाङ आज्यी-नुहमुया़की पाहरक्यीला फेप नाङसीन ओहले खुङ थाम्ज्यीगी देप च्यी़लाॱराङ मास्यीकाला थोङसीन। मिहरोला थोङगेनया़ नाहङला काहजे मिहया़ स्यी़दीॱआङ काहल्सीन माहङ छ्येवादी नाहरे थुॱआङ येहॱराङ येहबा। 7 ओ़ह तिङला मास्यीका याकूबसाला, ओहले थाम्ज्यीराङ ल़ेह-पेन साला थेन फेप नाङसीन। 8 ओहले थाम्ज्यी म़ेदी तिङस्योलादी मास्यीका ङाहसाला थेन फेप नाङसीन। ओ़ह ती़हजीला ङाह दावा माहछाङबा पेहती क्येक्योगी पेहजा ल़ेहमुराङ येहकें। 9 ल़ेह-पेनया़ नाहङला ङाह थाम्ज्यी म़ेदी फेमा यिहम्बा। यिहन्ज्ये नि ङाह ल़ेह-पेन सी़हएँगी मिहनी मिहम्बा यिहन्गे च्यिबेमाना ङाहगी किन्ज्योगी छेन्छोकला ज्यिबुराङ तुहक्पु तेर्ती येहकें। 10 यिहॱनाङ ताहन्दा ङाह काह-ठि येहबा, ओ़ह थाम्ज्यी किन्ज्योगी काटीनगीॱराङ यिहम्बा ओहले मिहरोगी ङाहगी मिहजीला जे नाङग्योकी काटीन स्यिती काम्बुला थोरो माहकाहल। तोहरोङ खुङया़गी म़ेदीॱआङ माहङबु ङाहगी तुहक्पु पेहसीन। यिहॱनाङ ङाहगी मिहम्बा, ङाह ङ्याम्बु ज़्य़ू नाङगे किन्ज्योगी काटीनगी यिहम्बा। 11 ओ़ह सोङबे ङाहगी यिहॱनाङ, खुङया़गी यिहॱनाङ, ङ्यिह थाम्ज्यीगी स्येक्योगी लेहङगु च्यी़राङ यिहम्बा, ओ़ह लेहङगुला ख्याया़गी यिह छ्य़ेसीन। स्यिक्यो मिहया़ येहपाराङ सोम्बो लो़हज्ये येह 12 मास्यीकानी टोहङदी येहपाराङ सोम्बो ज़्याङ नाङसीन म़ेदी ख्यागी मिहया़ला स्येकें मासीमाना काह-ठि पेहती ख्या नाहङला लाहलागी स्यिक्यो मिहया़ येहपाराङ सोम्बो लो़ह मी़हखुएँ म़ेदी मा ख़ूएँ ले? 13 का़हलेॱआङ स्यिक्यो मिहया़ येहपाराङ सोम्बो लो़ह मी़हखुएँ मासीमाना मास्यीकाॱआङ टोहङग्योलेगी सोम्बो ज़्याङ नाङग्यो मिहन। 14 मास्यीका टोहङग्योलेगी सोम्बो ज़्याङ नाङग्यो मिहम्बा यिहन्सीमानानी ङ्यिहगी स्येक्योगी लेहङगुया़ स्यिती काम्बुला थोरो डोज्ये येह ओहले ख्याया़गी तेहपा पेहक्योदीॱआङ स्यिती काम्बुला थोरो डोज्ये येह। 15 दि म़ेदी माहङबु ओहराङ किन्ज्योगी तेहन्दाला चिहन क्याहप्ती पाङबु तेरक्यो ल़ेहमु डोज्ये येह च्यिबेमाना किन्ज्योगी मास्यीकाला टोहङग्योलेगी सोम्बो ज़्याङ च्य़ू नाङसीन म़ेदी ङाहगी किन्ज्योगी तेहन्दाला पाङबु तेर्ती येह। यिहॱनाङ तेहम्बाराङ मिह स्यिदी येहपाराङ सोम्बो मे़हलोहगे मासीमानानी किन्ज्योगी मास्यीकालाॱआङ सोम्बो ज़्याङ च्य़ू माहनाङ। 16 च्यिबेमाना का़हलेॱआङ स्यिक्यो मिहया़ येहपाराङ सोम्बो मे़हलोहगे मासीमानानी किन्ज्योगी मास्यीकालाॱआङ सोम्बो ज़्याङ च्य़ू माहनाङ। 17 का़हलेॱआङ मास्यीका सोम्बो ज़्याङ माहनाङबा यिहनानी ख्याया़गी तेहपाॱआङ स्यिती काम्बुला थोरो डोज्ये येहकें ओहले ख्याया़ ताहन्दा थुॱआङ राहङगी तिहक्पालाॱराङ लिहच्ये येहकें। 18 ओ़हठी यिहन्सीमाना मास्यीकाला यिह-छ्य़े पेहती स्यिक्योया़ॱआङ थाम्ज्यीराङ तोङसीन। 19 का़हलेॱआङ दि मिहजीगी तेहन्दाला च्यी़राङ ओहराङगी मास्यीकाला रेहवा पेहक्यो यिहन्सीमानानी ओहराङ लेहमेन मिह थाम्ज्यी म़ेदीॱआङ थाप-तुहक्पा यिहम्बा! 20 यिहॱनाङ मास्यीकानी टोहङदीॱआङ येहपाराङ सोम्बो ज़्याङ नाङसीन। ओहले टोहङग्योया़लेगी थाम्ज्यी म़ेदी तोहङस्यो सोम्बो ज़्याङ नाङगेन्दी मास्यीका यिहन्गे सोङबे स्यिक्यो मिहया़ॱआङ तिङले येहपाराङ सोम्बो लो़हज्ये येह माएँ तामगी दास्यीती मास्यीकाॱराङ यिहम्बा। 21 च्यिबेमाना मेहन्दा च्यी़गी पेहती मिह थाम्ज्यीराङ स्यि कोहसीन। ओ़हठीॱराङ पेहती मेहन्दा च्यी़गी पेहती स्यिक्यो मिहया़ येहपाराङ सोम्बो लो़हज्ये येह। 22 च्यिबेमाना मिह थाम्ज्यीराङ आदमगी क्यिह यिहन्गे सोङबे स्यिसीन, ओ़हठीॱराङ पेहती मास्यीकाला यिह-छ्य़े पेहकें थाम्ज्यीगी मिहली ज्योर्सीन। 23 यिहॱनाङ थाम्ज्यीगी राहङ-राहङगी रिहम्बा ते़बे थाम्ज्यी म़ेदी तोहङस्यो मास्यीका ज़्याङ नाङसीन ओहले मास्यीका येहपाराङ जाम्बुलीङला फेप नाङगेमु मिहरोला यिह-छ्य़े पेहक्योया़ सोम्बो लो़हज्ये येह। 24 ओ़ह तिङले तोहङमागी जाम्बुलीङ तोङज्ये येह। ओ़ह ती़हजीला थाम्ज्यीराङ ठिम-पेन, ओङ छ्य़ेगे दाङ स्युकया़ला तोङ च्य़ू नाङदी मिहरोगी थाम्ज्यीराङ क्याहल्सी किन्ज्यो याहपला चि क्याहप नाङज्ये येह। 25 च्यिबेमाना मास्यीकागी राहङगी थाम्ज्यीराङ टाहया़ला राहङगी स्याहप चो़ला छ्यि-माहच्यु थु मिहरोगी ओङ छ्ये़ॱराङ कोहएँ। 26 मास्यीकागी थाम्ज्यी म़ेदी तिङस्योला तोङ च्य़ू नाङगेन्गी टाहदी स्यिवा यिहम्बा। 27 च्यिबेमाना छ्य़ेगी दि ल़ेहमु सुङ नाङगे, “किन्ज्योगी थाम्ज्यीराङ से़हया़ला मास्यीकागी स्याहप चो़ला ज़्या़ नाङदी येहबा।” दि माक्योगी तेहन्दादी किन्ज्योॱआङ मास्यीकागी ओङ चो़ला ओहङगे म़ेदी माक्योती मिहम्बा, यिहॱनाङ किन्ज्योगीॱराङ ना थाम्ज्यीराङ से़हया़ला मास्यीकाकी ओङ चो़ला ज़्या़ नाङज्ये येह म़ेदी माक्यो यिहम्बा। 28 थाम्ज्यीराङ से़हया़ मास्यीकागी ओङ चो़ला छ्यि फान्ज्यो किन्ज्योगी स़ेबु मास्यीका राहङॱआङ, राहङगी काङबा चो़ला थाम्ज्यीराङ से़हया़ छ्यि च्य़ू नाङगेन किन्ज्योगी ओङ चो़ला ज़्य़ू नाङज्ये येह ओहले किन्ज्योगीॱराङ मिह थाम्ज्यीला ओहले थाम्ज्यीराङ से़हया़ला ओङ छ्ये नाङज्ये येह। 29 मिहन्सीमानानी स्यिएँया़गी तेहन्दाला बप्तिस्मा लेहन्गे मिहया़ला च्यि ख्येप्साङ काहल्बा ले? का़हलेॱआङ स्यिक्योया़ सोम्बो मेहलोहसीन मानानी च्यिबे खुङया़ला ओ़हगी तेहन्दाला बप्तिस्मा तेर्पा ले? 30 ङाहॱआङ च्यिबे याहम्बी-याहम्बीला ज्यिक्पाला छ्यिच्ये? 31 आदा नो़ह दाङ आज्यी-नुहमुया़, ख्याया़ दाङ ङ्यिह ङ्यी़ चो़वो येशू मास्यीकाला येहकेन्गी ङाहगी छ्य़ेन्दोगी ङाह दि मा ख़ूएँ “ङाह ङ्यिहमा-टाहङमाराङ स्यिएँ।” 32 मिहदीॱराङ ताम माज्ये मानानी, एफिससला रिहदा ङ्याम्बु जिङगेमु ओ़हदीगी ङाहला च्यि फेन थो़बा ले? स्यिक्योया़ सोम्बो मे़हलोहगे यिहन्सीमानानी, “ता़ह ओहराङ से़हदी थुङदी खाम्साङबु पेह कोहएँ, च्यिबेमाना नाहङबारनी ओहराङ स्यिएँ!” 33 ख्या तेहन्दाम म़ेहबागी तामया़ला यिहम्बा म़ेदी माहतेह। चोक्पा मिहया़ ङ्याम्बु च्याम्गेमु या़हबु मिहया़ॱआङ नोहङगे। 34 जेम्बु पेह, ता़ह यिहन्ज्यु तिहक्पा माहबे। च्यिबेमाना काहजे मिहया़लानी किन्ज्योगी तेहन्दाला क्यी़हराङ म़ेह। ख्याया़ला ङोह छाज्यु म़ेदी ङाहगी दि माक्यो यिहम्बा। स्यिदी सोम्बो लो़हक्योगी ज़ुबु 35 यिहॱनाङ लाहलागी मारो, “काह-ठि पेहती स्यिक्यो मिह सोम्बो लो़हगे यिहम्बा? ओहले खुङया़गी काहन्डुमु छ्याप्स्यीगी ज़ुबु ख्योङदी ओहङगे यिहम्बा?” 36 ए उल्दुम्बाया़! ख्याया़गी सेन ताप्केमु ओ़ह मा़हस्यीबा पेहती मेहक्येएँ। 37 ने़ह यिहॱनाङ, लेहमेन च्यि सेन यिहॱनाङ, ख्यागी बुदी च्यी़राङ ताप्कें, छारक्योगी तोहङबोराङनी ख्येर्ती मेहताप्केन ग्यिले। 38 यिहॱनाङ किन्ज्योगी राहङगी थुला ठुङग्यो ल़ेहमु ओ़ह तोहङबोया़ला राहङ-राहङगी ज़ोप्ता नाङगे। ओहले मिहरोगी सेनया़ ना ऱेह-ऱेहला ज्यार्पु थोङगे छ्याप्स्यीगी ज़ुबुया़ नाङगे। 39 थाम्ज्यीराङ सेम्ज्येनया़गी ज़ुबु ना च्यी़राङ मेहयोहङगे। मिहगी ज़ुबु ना च्यी़दी येहबा मासीमाना बासोगी ज़ुबु ना लेहमेनॱराङ ओहले च्याह-च्यिहवागी ज़ोप्ता लेहमेनॱराङ ओहले ङ्याहया़दी ज़ोप्ता लेहमेनॱराङ येहबा। 40 ओहले नामला येहकेन्गी ङ्यिहमा, दायुम दाङ कार्माया़दी राहङ-राहङगी ज़ोप्ता येहबा, ओहले जाम्बुलीङला येहकेन्की सेम्ज्येनया़दीॱआङ राहङ-राहङगी ज़ोप्ता येहबा। 41 ङ्यिहमागी येहसेर ना च्यी़ येहबा, दायुमगी येहसेर लेहमेनॱराङ, ओहले कार्माया़गी येहसेर लेहमेनॱराङ येहबा। च्यिबेमाना कार्मा च्यी़, लेहमेन कार्मा म़ेदी येहसेरला ख्येपार ओहङगे। 42 स्यिक्यो मिहया़ सोम्बो लो़हगेमु ओ़हठीॱराङ ओहङगे। ज़ुबु स्यिएँमु साला पिहप्के, यिहॱनाङ ओ़ह सोम्बो लो़हगेमु नाहमॱआङ मिहस्यीएँगी मिहजी लेहन्दी लाहङगे। 43 साला पिहप्केमु ओहराङगी ज़ुबु चोक्पा दाङ ओङ च्यिॱआङ म़ेहबा काहल्ग्यो ओहङगे, येहपाराङ सोम्बो लो़हगेमुनी ओहराङगी ज़ुबु ज़िज्यिद दाङ ओङज्या छ्यिम्बु ओहङगे। 44 साला पिहप्केमु रेहको दाङ स्यागी ज़ुबु थो़दी पिहप्के यिहम्बा, येहपाराङ सोम्बो लो़हगेमु यिहक्तेन ज़ुबु थो़दी लाहङज्ये येह। रेहको दाङ स्यागी ज़ुबु ओहङगे ल़ेहमुराङ यिहक्तेन ज़ुबुॱआङ ओहङगे यिहम्बा। 45 ओ़ह सोङबे छ्य़ेला दि ल़ेहमु प्रुहक्यो येहबा, “तोहङस्यो मिह आदमदी मिहली ज्योर्केन्गी मिह येहकें।” यिहॱनाङ तिङस्यो आदमदी मिहली नाङगेन्गी थु काहल्सीन। 46 तोहङस्योदी यिहक्तेन ज़ुबु मिहम्बा, यिहॱनाङ रेहको दाङ स्यागी ज़ुबु यिहम्बा, ओ़ह तिङला च्यी़राङ यिहक्तेन ज़ुबु फेप नाङसीन। 47 तोहङस्यो आदम दि जाम्बुलीङगी सासागी ज़ोक्योगी मिह यिहम्बा, तिङस्यो आदमदी स्यिहङगामलेगी फेप नाङग्यो यिहम्बा। 48 दि जाम्बुलीङला येहकेन्गी मिहया़नी सासागी ज़ोक्योगी आदम ल़ेहमुराङ यिहम्बा, स्यिहङगामकी मिहया़नी स्यिहङगामलेगी फेप नाङग्योकी मिह ल़ेहमुराङ ओहङगे। 49 ताहन्दा ओहराङगी सासागी ज़ोक्योगी ज़ुबु लेहन्दी येहबा। ओ़हठीॱराङ पेहती तिङले ओहराङगी स्यिहङगामकी मिहती ल़ेहमुराङ ज़ुबु लेहन्ज्ये येह। 50 आदा नो़ह दाङ आज्यी-नुहमुया़, ङाहगी माज्ये छोल्ग्यो ताम दिराङ यिहम्बा, स्या दाङ ठा़गी किन्ज्योगी क्याहल्सीला स्य़ूहज्येला ओङ ज्योर मी़हखुएँ। ओहले तोहङदी डोएँ ज़ुबुगी नाहमॱआङ मेहतोङगेन ज़ुबुगी ओङ ज्योर मी़हखुएँ। 51 त़ेदोङ, ङाह ख्याया़ला तिहङ-रिहङबुगी ताम च्यी़ माएँ, ओहराङ थाम्ज्यी स्यिज्ये म़ेह यिहॱनाङ ओहराङ थाम्ज्यीगी ज़ुबु ग्युर्च्ये येह, 52 उ़देप च्यी़लाॱराङ, मी़ चुम पेहताङ च्यी़लाॱराङ, ओहले तिङस्यो रोहवा-लीङगी क़े थे़-लुहङ मे़हबाराङ। च्यिबेमाना रोहवा-लीङगी क़े थे़न्ज्ये येह, ओहले स्यिक्योया़ नाहमॱआङ मिहस्यीएँगी मिहली लेहन्दी लाहङज्ये येह। ओहले ओहराङगी ज़ुबु ग्युर्च्ये येह। 53 च्यिबेमाना तोङदी डोएँगी ल़ेहनाङया़गी ता़ह नाहमॱआङ मेहतोङगेन्गी ल़ेहनाङया़ ल़ेहन कोहएँ ओहले दि स्यिदी डोएँगी ज़ुबुगी ता़ह नाहमॱआङ मिहस्यीएँगी ज़ुबु ल़ेहन कोहएँ यिहम्बा। 54 ता़ह तोङदी डोएँदी नाहमॱआङ मेहतोङगेन डोएँमु ओहले स्यिएँदीती नाहमॱआङ मिहस्यीएँ डोएँमु सुङरापगी सुङ नाङग्योकी स्याहल तेहन्दा डुप्च्ये येह, “स्यिवाला दुल्दी क्याहल सिहन्ग्यो येह।” 55 “ए स्यिवा, ख्येगी क्याहल्ग्यो का़हला येहबा? ए स्यिवा, ख्येगी तुह का़हला येहबा?” 56 स्यिवाकी तुह तिहक्पा यिहम्बा, तिहक्पागी ओङ छ्य़े-ठिम यिहम्बा 57 यिहॱनाङ किन्ज्योला थुज्यी-छ्ये़ फुल्गे, मिहरोगी ओहराङगी चो़वो येशू मास्यीका लाहमले ओहराङला क्याहल च्य़ू नाङगे। 58 ओ़ह सोङबे ङाहगी च्याहम्बु आदा नो़ह दाङ आज्यी-नुहमुया़, ख्या सेम माहयाहङबा पेहती थिक-चि पेहती तेहतोङ। चो़वोगी छ्या़लेला ख्या नाहम-माना याहरक्यी पेहती सोङ। च्यिबेमाना ख्याया़ला क्यी़हराङ येहबा, चो़वोगी तेहन्दाला पेहक्योगी ख्याया़गी तुहक्पु नाहमॱआङ थोरो डोज्ये म़ेह। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.