१ कोरिन्थी 14 - ह्योल्मोलुहङदेन दाङ ताम साम्बाकी काबापया़ 1 ओ़ह सोङबे ख्याया़गी चेवा पेहच्येला ज्यिबुराङ निङरु पेहतोङ, ओहले नाम्पार-ताहक्पा थुगी काबापया़ ज्योर्च्येला ज्यिबुराङ चा़ पेहतोङ, ओ़हॱलाङ लुहङदेन स्येकेन्गी काबाप ज्योर्च्येला स्युक पेहतोङ। 2 च्यिबेमाना लेहमेन ताम साम्बा माएँ मिहगी– मिहया़ ङ्याम्बु मिहम्बा, यिहॱनाङ किन्ज्यो ङ्याम्बु ताम माएँ। खोगी च्यि माएँराङ येहबा ओ़ह सुगीॱआङ ह्अ मेहकोहएँ, यिहॱनाङ खोगी नाम्पार-ताहक्पा थुगी तिहङ-रिहङबुगी तामया़गी तेहन्दालाराङ ताम माएँ। 3 यिहॱनाङ लुहङदेन स्येके मिहगी मिहया़ ङ्याम्बु ह्अ कोहएँ पेहती ताम माएँ। ओहले दिगी मिहया़ला रो़हराम पेहकें, स्युक क्ये च्य़ूगे, ओहले स्य़िहदे तेर्के। 4 साम्बा-साम्बा तामया़ माएँ मिहगी राहङला च्यी़राङ किन्ज्यो ङ्याम्बु क्याप्च्येला सान्दी ज़ोएँ। यिहॱनाङ लुहङदेन स्येकें मिहगीती थाम्ज्यी छेन्छोकला याहरक्यी ख्येर्च्येला रो़हराम पेहकें। 5 ख्या थाम्ज्यीगी साम्बा-साम्बा तामया़ माज्यु माएँ ङाहगी सेम्बा येहबा, यिहॱनाङ ओ़ह म़ेदीॱआङ जेन माहङबु ख्याया़गी लुहङदेन स्येच्यु माएँ ङाहगी सेम्बा येहबा। छेन्छोकला याहरक्यी ख्येर्च्येला साम्बा-साम्बा तामया़गी तेहन्दा स्येके मिह मे़हसीमाना साम्बा ताम माएँ म़ेदीनी लुहङदेन स्य़ेकेन्दीॱराङ या़हस्यो यिहम्बा। 6 ओ़ह सोङबे आदा-नो़ह दाङ आज्यी-नुहमुया़, ङाह ख्यासाला ओहङगेमु ख्याया़ सुज्यीगीॱआङ ङोह मे़हस्येएँगी ताम साम्बाया़ मासीमाना ख्याला च्यि फेन थो़ज्ये ले? यिहॱनाङ ङाह ख्यागी पाहर्कीला ओहङगेमु किन्ज्योगी तेन नाङग्योकी तामया़, येहन्देनगी सुङ, लुहङदेन दाङ लुहङ ख्योङदी ओङसीमाना ओ़ह ख्याया़ला तेहम्बाराङ फेन थो़ज्ये येह। 7 लेमु फुएँमु दाङ टाहम्ङ्येन तुहङगेमु खुङ ङ्यी़गी पाहर्कीला क़े खा मेहफ़ेसीमाना, “दि च्यि से़हगी क़े यिहम्बा” म़ेदी सुगी खा फे़ ख़ूज्ये ले? 8 रोहवा-लीङगी क़े या़हबु मेहतेर्सीमाना मा़ क्याहप्च्येकी तेहन्दाला सु ठाबे ओहङज्ये ले? 9 ख्याया़ ङ्याम्बुॱआङ ओ़हठीॱराङ ओहङगे। का़हलेॱआङ ङोहॱराङ स्य़े मी़हखुएँगी तामया़ ख्यागी खाले थेन्सीमाना ख्याया़गी च्यि माएँराङ येहबा ओ़ह सुगी ङोह स्ये़ज्ये ले? ख्याया़ ल्हा़बा ङ्याम्बु ताम माक्यो ल़ेहमु यिहम्बा। 10 जाम्बुलीङला ना माहङबुराङ तामया़ येहबा। यिहॱनाङ ओ़ह थाम्ज्यी तामया़गी तेहन्दा येहबा। 11 का़हलेॱआङ सुज्यीगी माक्यो ताम ङाहगी ङोह मे़हस्येसीमाना ओ़ह ताम माएँ मिहगी तेहन्दाला ङाह छ्यि-क्याहपा मिह ल़ेहमुराङ डोज्ये येह ओहले ङाहगी तेहन्दाॱलाङ खो छ्यि-क्याहपा मिह ल़ेहमुराङ डोज्ये येह। 12 ओ़हठीॱराङ पेहती ख्याया़ॱआङ नाम्पार-ताहक्पा थुगी काबापया़गी तेहन्दाला ज्यिबुराङ चा़ पेहक्यो सोङबे दि काबापया़दी ख्याया़गी छेन्छोकला याहरक्यी ख्येर्केन्गी ल़ेहला चाल तिदोङ। 13 ओ़ह सोङबे साम्बा-साम्बा ताम माएँ मिहगी, ओ़हगी तेहन्दा स्य़े ख़ूएँगी काबापगी तेहन्दालाॱआङ सोल्वाङ ताप्च्यु। 14 च्यिबेमाना ङाहगी ताम साम्बा ङो़ले सोल्वाङ ताप्केमु ङाहती यिहगी सोल्वाङ ताप्के, यिहॱनाङ ङाहगी नावागी च्यिॱआङ ल़ेह मेहबेकें। 15 ता़ह ङाहगी च्यि पेहच्ये ले? ङाह यिहगी सोल्वाङ ताप्के, ओहले नावा लाहमलेॱआङ सोल्वाङ ताप्के। ङाह यिह लाहमले छ्ये़-लु लेहन्गे, ओहले ङाहती नावागीॱआङ छ्ये़-लु लेहन्गे। 16 मिहन्सीमाना ख्येगी यिह लाहमले किन्ज्योला त़ेरा तेच्यानी फुल्गे यिहॱनाङ ख्येगी फुल्ग्योगी त़ेरा तेच्या ह्अ मेहकोहएँ लेहमेन मिहया़गी काह-ठि पेहती आमेन माज्ये ले? च्यिबेमाना ख्येगी च्यि माएँराङ येहबा ओ़ह खोगी ह्अ मेहकोहएँ। 17 ख्येगीनी या़हबु पेहती थुज्यी-छ्ये़ फुल्गो येहटो, यिहॱनाङ ओ़हदीगी लेहमेन मिहया़ला किन्ज्यो पोहला ख्येर मी़हखुएँ। 18 ङाह किन्ज्योला थुज्यी-छ्ये़ फुल्गे, च्यिबेमाना ङाह ख्याया़ म़ेदीॱआङ माहङबु ताम साम्बाया़ माएँ। 19 यिहॱनाङ ङाह छेन्छोकला ताम साम्बा ङो़ले छिका तोङरा च्यु माएँ म़ेदीनी ङाह राहङदीराङ नावालेगी छिका ङाज्यीराङ म़ेदी थाम्ज्यीगी ङोह स्ये़एँगी लुहङ तेर्के। 20 आदा-नो़ह दाङ आज्यी-नुहमुया़, ख्याया़ नोम्साङ ताङलुला पेहजाया़ ल़ेहमु माहबे। ताम चोक्पाया़गी तेहन्दाला पेहजाया़ ल़ेहमु, च्यिॱआङ क्यी़ह म़ेहबा ल़ेहमु पेहती तेहतोङ, यिहॱनाङ नोम्साङ ताङलुला ख्या मिह छ्यिम्बु ल़ेहमु ओहङ कोहएँ। 21 छ्य़े-ठिमला दि ल़ेहमु प्री़हदी येहबा, “याहम्जेम्बागी ताम माएँ मिहया़ लाहमले ओहले छ्यि-क्याहपा मिहगी खा लाहमले ङाह दि मिहया़ ङ्याम्बु ताम माज्ये येह, यिहॱनाङ खुङया़गी ङाहगी ताम ङ्यिहन्ज्ये म़ेह।” 22 ओ़ह सोङबे ताम साम्बाया़ मास्यीकाला यिह-छ्य़े पेहक्यो मिहया़गी तेहन्दाला मिहम्बा, यिहॱनाङ मास्यीकाला यिह-छ्य़े माहबेबा मिहया़गी तेहन्दाला ता़स्यी यिहम्बा। यिहॱनाङ लुहङदेनती मास्यीकाला यिह-छ्य़े माहबेबा मिहया़गी तेहन्दाला मिहम्बा, यिहॱनाङ मास्यीकाला यिह-छ्य़े पेहक्यो मिहया़गी तेहन्दाला यिहम्बा। 23 का़हलेॱआङ थाम्ज्यी छेन्छोकया़ डी़दी मिह थाम्ज्यीगीराङ ताम साम्बाया़ मासीमाना, ओहले मास्यीकाला यिह मे़हछ्येएँगी मिहया़ दाङ ह्अ मेहकोहएँगी मिहया़ ओ़हला ओहङसीमाना च्यि खुङया़गी ख्याया़ला ङ्योम्बा मेहमाएँ ले? 24 यिहॱनाङ थाम्ज्यीगी लुहङदेन स्ये तेहक्यो ती़हजीला लाहला मास्यीकाला यिह मा़हछ्येबाकी मिह दाङ फिगी मिहया़ ओहङसीमाना खोगी ओ़ह लाहमले राहङगी तिहक्पाया़ ङोह स्ये़ज्ये येह ओहले ख्यागी लुहङदेन स्य़ेक्यो लाहमले खुङगी राहङला या़हबु पेहती ङ्याहम च्येच्ये येह। 25 खोगी सेम नाहङगी तामया़ थोङज्ये येह, ओहले खोगी खेप्चु क्याहप्ती किन्ज्योला त़ेरा तेच्या फुल्ज्ये येह, ओहले खोगी “किन्ज्यो ख्याया़गी पाहरक्यीला ज़्य़ू नाङदी दु” म़ेदी स्येच्ये येह। त़ेरा तेच्यागी तेहन्दाला 26 आदा नो़ह दाङ आज्यी-नुहमुया़, ङाहगी माज्ये छोल्ग्योगी ताम दिराङ यिहम्बा, ख्याया़ छो़गेमु लाहला ङ्याम्बु छ्ये़-लु लेहन्गेन्गी काबाप, लाहला ङ्याम्बु लुहङदेन तेर्केन्गी काबाप, लाहला ङ्याम्बु किन्ज्योगी थु लाहमले स्याहल सुङगेन्गी काबाप, लाहला ङ्याम्बु ताम साम्बा माएँगी काबाप ओहले लाहला ङ्याम्बु ओ़ह ताम साम्बागी तेहन्दा स्येकेन्गी काबापया़ येहबा। दि थाम्ज्यी लाहमले छेन्छोककी याहरक्यी ओहङ कोहएँ। 27 ताम साम्बा माएँगी मिहया़ येहसीमाना मेहन्दा ङ्यी़ सुमगी च्यी़राङ पा़लो-पा़लो पेहती माज्यु, ओहले मेहन्दा च्यी़गी ओ़हगी तेहन्दा स्ये़ज्यु। 28 यिहॱनाङ तेहन्दा स्येकेन्गी मिह ओ़हला सुज्यीॱआङ मे़हना ओ़ह ताम साम्बा माएँ मिह छेन्छोककी छो़बाला खाजुम्बा तेहच्यु, ओहले खो राहङ ङ्याम्बु ओहले किन्ज्यो ङ्याम्बु च्यी़राङ ताम माज्यु। 29 लुहङदेन स्येकेन्दी मेहन्दा ङ्यी़ क्यिनी मेहन्दा सुम येहच्यु, ओहले लेहमेनया़गी खुङगी माक्यो ताम या़हबु पेहती ङ्याहम च्येच्यु। 30 का़हलेॱआङ मिह च्यी़गी लुहङदेन स्ये तेहक्यो ती़हजीला लेहमेन सुज्यीला किन्ज्योगी रिहक्स्यी नाङदी स्याहल सुङ च्यू़सीमाना तोहङले लुहङदेन स्येती तेहक्यो मिहती खाजुम तेहच्यु। 31 ख्या थाम्ज्यीगी पा़लो पा़लो पेहती लुहङदेन स्य़े ख़ूएँ, ओहले दिठीॱराङ पेहती ख्या थाम्ज्यीगी ह्अ कोह ख़ूएँ ओहले थाम्ज्यीगी स्युक ज्योर्च्ये येह। 32 लुहङतेम्बाया़गी यिह लुहङतेम्बाया़दीॱराङ ओङ चो़ला ओहङगे। 33 च्यिबेमाना किन्ज्योगी गो़ थोम च्य़ूएँगी छ्या़ले जे मेहनाङगे, यिहॱनाङ ओहराङगी किन्ज्यो स्य़िहदे नाङगेन्गी किन्ज्यो यिहम्बा। किन्ज्योकी मिहया़गी थाम्ज्यी छेन्छोकया़ला लेहमु, 34 पी़हमी-पेहजाया़ छेन्छोककी छो़बाला खाजुम्बा तेहच्यु। खुङया़गी ताम माज्ये मेहयोहङगे, यिहॱनाङ छ्य़े-ठिमगी सुङग्यो ल़ेहमुराङ पी़हमी-पेहजाया़ क्येप-ख्योवाया़गी ओङ चो़ला तेह कोहएँ। 35 च्यि से़हज्यीगी तेहन्दाला लोप्च्ये सेम क्येसीमाना खाङबाला राहङगी ख्योवा ङ्याम्बु टी़हज्यु। च्यिबेमाना छेन्छोकला पी़हमी-पेहजाया़गी ताम माएँदी ङोहजागी ताम यिहम्बा। 36 च्यि किन्ज्योगी सुङ ख्या लाहमले छ़ूक्यो यिहम्बा ले? च्यि ख्याया़गी च्यी़राङ किन्ज्योगी लुहङ ज़्योरक्यो यिहम्बा ले? 37 का़हलेॱआङ सुज्यीगी राहङगी राहङला लुहङतेम्बा यिहम्बा ओहले नाम्पार-ताहक्पा थुगी काबाप ङाह ङ्याम्बु येहबा म़ेदी ने़सीमाना ङाहगी प्रुहक्योगी तामया़ चो़वोगी का यिहम्बा म़ेदी खोगी माज्यु। 38 यिहॱनाङ खोगी दि तामया़ मिहङ्यीहन्सीमाना ख्यागीॱआङ खोगी माक्यो तामया़ माहङ्यीहन। 39 ओ़ह सोङबे आदा-नो़ह दाङ आज्यी-नुहमुया़, लुहङदेन स्येच्येला ज्यिबुराङ निङरु पेह, ओहले ताम साम्बा माएँ मिहया़ला मा़हका! 40 यिहॱनाङ ताम थाम्ज्यी ठाबे सी़हएँदी ओहङ कोहएँ ओहले गो़ थोम च्य़ूएँ छ्याप्स्यीती ओहङज्ये मेहयोहङगे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.