१ कोरिन्थी 11 - ह्योल्मो1 ओ़ह सोङबे ङाहगी मास्यीकाती पे ताक्यो ल़ेहमुराङ ख्याया़गीॱआङ ङाहती पे त़ेदोङ। 2 ख्यागी ङाहला टेहम्बा साल्ग्यो सोङबे ओहले ङाहगी तेरक्यो लोप्च्युङया़ ची़क्यो सोङबे ङाह ख्याला या़हबु माएँ। 3 यिहॱनाङ मास्यीकाॱराङ मिह थाम्ज्यीगी गो़ यिहम्बा म़ेदी ख्या थाम्ज्यीगी ह्अ के़हदोङ। पी़हमीगी गो़ मोहगी ख्योवा यिहम्बा, ओहले मास्यीकागी उ किन्ज्यो यिहम्बा। 4 सोल्वाङ ताप्केमु ओहले तिङला ओहङगेन्गी केच्याया़गी तेहन्दाला प्रा साल्गेमु राहङगी गो़ उप्के मिहगी राहङगी गो़ला स्याहम्डेन तेन्गे। 5 यिहॱनाङ राहङगी गो़ माहउप्पा पेहती सोल्वाङ ताप्के दाङ तिङला ओहङगेन्गी केच्याया़ प्रा साल्गे पी़हमी-पेहजागी राहङ गो़ला स्याहम्डेन तेन्गे, च्यिबेमाना दि मोहगी राहङगी गो़गी टा रेबेॱराङ ज्य़ारक्यो ङ्याम्बा यिहम्बा। 6 का़हलेॱआङ पी़हमी-पेहजागी राहङगी गो़ मिहउप्सीमाना मोहगी राहङगी गो़-टा प्रा़हज्यु। यिहॱनाङ गो़-टा प्रा़हगे दाङ रेबेॱराङ ज़्यार्केन्दी मोहगी तेहन्दाला ङोहजाकी ताम यिहन्सीमाना मोहगी राहङगी गो़ उपॱराङ कोहएँ। 7 क्येप-ख्योवागी राहङगी गो़ उप्च्ये मेहयोहङगे च्यिबेमाना दि किन्ज्योगी राहङगी ङ्य़ेहरी दाङ केहन्ज्या यिहम्बा। ओहले पी़हमी-पेहजादी क्येप-ख्योवागी केहन्ज्या यिहम्बा। 8 च्यिबेमाना क्येप-ख्योवा पी़हमी-पेहजा लाहमले ज़ोक्यो मिहम्बा। यिहॱनाङ पी़हमी-पेहजा गा क्येप-ख्योवा लाहमले ज़ोक्यो यिहम्बा। 9 पी़हमी-पेहजागी तेहन्दाला क्येप-ख्योवा ज़ोक्यो मिहम्बा, यिहॱनाङ क्येप-ख्योवागी तेहन्दाला गा पी़हमी-पेहजा ज़ोक्यो यिहम्बा। 10 ओ़ह सोङबे स्यिहङगामकी स्याहप्च्यीगी दिनला पी़हमी-पेहजागी “ङाह राहङगी ख्योवागी ओङ चो़ला येहबा” म़ेदी तेन्ज्येला राहङगी गो़ उप कोहएँ। 11 यिहन्दी सुङनाङ चो़वोगी दिनला पी़हमी राहङगी ख्योवा यिहन्ज्यु ओहले ख्योवा राहङ पी़हमी यिहन्ज्यु राहङवाङ मेहयोहङगे। 12 च्यिबेमाना काह-ठि पेहती क्येप-ख्योवा लाहमले पी़हमी-पेहजा ज़ेबा ओ़हठीॱराङ पेहती क्येप-ख्योवा पी़हमी-पेहजा लाहमले क्येएँ। यिहॱनाङ ना थाम्ज्यी किन्ज्यो लाहमलेॱराङ ओहङगे यिहम्बा। 13 ख्या राहङगीराङ साम्लु ताङदोङ, च्यि पी़हमी-पेहजागी राहङगी गो़ माहउप्पा पेहती किन्ज्योला सोल्वाङ ताप्च्येला पे सी़हएँ ले? 14 मिहगी ज़ोप्ताला ते़दीॱआङ, क्येप-ख्योवाला टा रिहङबु पे मी़हसीहएँ, 15 यिहॱनाङ पी़हमी-पेहजादी टा रिहङबु येहसीमाना ओ़ह मोहगी तेहन्दाला चा़ छ्यिम्बु यिहम्बा। च्यिबेमाना पी़हमी-पेहजागी टा मोहला गो़ उप्च्येला नाङग्यो यिहम्बा। 16 काहस्यीले सुज्यीगी दिगी तेहन्दाला च्यिरा ताम माज्ये सेम पेहसीमाना, दि म़ेदी ङ्यिहती लेहमेन च्यिॱआङ पे-ठिमया़ म़ेह ओहले किन्ज्योगी छेन्छोकया़दीॱआङ म़ेह। चो़वोगी डेन ( मत्ती २६:२६-२९ ; मर्क १४:२२-२५ ; लूक २२:१४-२० ) 17 ताहन्दा माएँगी तामगी तेहन्दाला ङाहगी ख्याला या़हबु म़ेदीनी मा मी़हखुएँ। च्यिबेमाना ख्याया़ या़हबु तामगी तेहन्दाला म़ेदीॱआङ चोक्पा तामगी तेहन्दाला गा माहङबु जोम्गु दुबा। 18 च्यिबेमाना थाम्ज्यी म़ेदी तोहङस्योनी ख्या छेन्छोकला छो़गेमु ख्यागी पाहर्कीला खा फ़ेदी डोएँगी तामया़ ओहङगु दु माएँ ताम ङाहगी थ़ेसीन, लाहला तामया़नी तेहन्दामॱआङ यिहन्डो। 19 यिहन्ज्येनी तेहन्दामकी मिह ङोह स्येच्येला ख्याया़ नाहङला ठ़ूस्यी ओहङॱराङ कोहएँ। 20 ख्याया़ जोम्दी साहक्यो दाङ थुङग्योनी ओ़ह चो़वोकी डेन मिहन। 21 च्यिबेमाना ख्याया़ साहज्येला तेहकेमु राहङ-राहङगी ख्योङग्यो से़हया़ साहएँ, ओहले लाहलादी तो़बाराङ लिहकें, ओहले लाहला ज़िक्यो ओहङगे। 22 च्यि साहज्ये दाङ थुङज्येला ख्याया़दी राहङ-राहङगी खाङबा म़ेहबा ले? च्यिबे ख्या किन्ज्योगी छेन्छोकला ङ्येन्ज्येन पेहकें? ओहले च्यिबे प्राङबुया़ला स्याहम्डेन केन्गे? दिगी तेहन्दाला ङाहगी ख्याया़ला च्यि माज्ये? च्यि ख्यागी या़हबु पेहसीन म़ेदी माज्ये ले? ओ़हठी मिहम्बा, ख्यागी या़हबु पेहसीन म़ेदी ङाहगी मा मी़हखुएँ। 23 च्यिबेमाना ङाहगी ख्याला तेरक्योगी लोप्च्युङ चो़वो लाहमलेॱराङ ङाहगी ज़्योरक्यो यिहम्बा। चो़वो येशूला मिहया़गी ज़ुङगे कुहङमु चो़वो येशूगी खुरा नोम नाङसीन। 24 ओहले किन्ज्योला थुज्यी-छ्ये़ फुल्दी खुरा च्या़गेॱराङ सुङ नाङसीन, “दि ख्याया़गी तेहन्दाला ङाहगी ज़ुबु यिहम्बा। ङाहला टेहम्बा साल्ज्येला दि ल़ेहमु पेहतोङ।” 25 ओ़हठी पेहती छ्ये फान्ज्यो चो़वोगी स्याहलु नोम्दी दि ल़ेहमु सुङ नाङसीन, “दि स्याहलु ङाहगी ठा़ला येहकेन्गी साम्बा ताहम्ज्या यिहम्बा। दि थुङगेमु ख्यागी ङाहला टेहम्बा साल्ज्येला दि ल़ेहमु पेहतोङ।” 26 च्यिबेमाना दि ल़ेहमु पेहती ख्यागी खुरा साहएँमु ओहले दि स्याहलु लाहमले थुङगेमु चो़वो माहफेप थु मिहरो टोहङग्योगी तेहन्दाला ख्यागी मिहया़ला प्रा साल्ज्ये येह। 27 ओ़ह सोङबे का़हन्दीगी ची़नाङ माहबेबा पेहती चो़वोकी खुरा साहएँ ओहले मिहरोगी स्याहलु लाहमले थुङगे, खोगी चो़वोकी कुसो दाङ ठा़ला मेहचाङा ज़ोएँ ओहले खोला ङ्य़ेहबा फो़गे। 28 मिह थाम्ज्यीगी तोहङला राहङला ङ्याहम च्येच्यु, ओहले च्यी़राङ खोगी खुरा साहज्यु ओहले स्याहलु लाहमले थुङज्यु। 29 च्यिबेमाना चो़वोकी कुसोला ङोह मा़हस्येबा पेहती का़हन्दीगी साहएँ ओहले थुङगे खोगी ओ़ह साहक्यो दाङ थुङग्यो सोङबे राहङ थो़ला ङ्य़ेहबा ख्योङगे। 30 ओ़ह सोङबे ख्याया़ नाहङला काहजे मिहया़ मा-फाम्बु येहबा, खुङया़ला नाहजाया़ क्याहप्ती येह ओहले लाहलानी स्यिॱआङ सिहन्सीन। 31 यिहॱनाङ तोहङलेराङ राहङला या़हबु पेहती ङ्याहम च्येसीनमाना किन्ज्योगी ओहराङला ठिम ताङ नाङज्ये म़ेह। 32 चो़वोगी ओहराङला ठिम ताङ नाङगे ती़हजीला दि जाम्बुलीङगी मिहया़ ङ्याम्बुराङ क्येन माह फो़ज्यु म़ेदी मिहरोगी ओहराङला टिहला ज़्या़ नाङगे। 33 ओ़ह सोङबे ङाहगी च्याहम्बु आदा-नो़ह दाङ आज्यी-नुहमुया़, ख्याया़ दि ल़ेहमु पेहती चो़वोगी डेन साहज्येला छो़गेमु च्यी़गी च्यी़ला कू़हदोङ। 34 का़हलेॱआङ सुज्यीला टेहपा तो़क्यो येहसीमाना खोगी राहङ खाङबालाराङ साहज्यु मिहन्सीमाना चो़वोगी डेन साहज्येला छो़गेमु ख्या थो़ला ङ्य़ेहबा फो़ज्ये येह। ओहले लेहमेन केच्याया़गी तेहन्दाला ङाह तिङले ओहङदी डी़ च्यू़गे। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.