१ कोरिन्थी 10 - ह्योल्मोइस्राएलकी लुहक्सो लाहमलेगी ज्यी़-ङोर नाङग्यो 1 आदा-नो़ह दाङ आज्यी-नुहमुया़, ख्याया़गी दि केच्या या़हबु पेहती ह्अ कोहज्यु माएँ ङाहती सेम्बा येहबा, मुक्पागी ओहराङगी चावाया़ला लाहम तेन्दी ख्येर्सीन, ओहले थाम्ज्यी छो-क्याहम्जोकी पाहरक्यीले जेती फेप नाङसीन। 2 ओहले खुङ फ़ेबेॱया मोशागी तिङदा तिङ फेप नाङगेमु खुङ फे़बेया़गी मुक्पा दाङ छो-क्याहम्जो लाहमले बप्तिस्मा ज्योर्सीन। 3 ओहले खुङ थाम्ज्यीगी ना च्यी़गी यिहक्तेन तोप्च्याया़ छ्ये नाङसीन। 4 थाम्ज्यीगी यिहक्तेन छ्यु छ्य़ेसीन, च्यिबेमाना खुङ फ़ेबेॱया ङ्याम्बु-ङ्याम्बुराङ फेप नाङगे यिहक्तेन तोह-पा़राकी छ्यु खुङ फे़बेया़गी छ्ये नाङसीन ओहले ओ़ह तोह-पा़राती मास्यीकाॱराङ यिहन्गे। 5 यिहॱनाङ खुङया़ नाहङला मिह माहङबु ङ्याम्बु किन्ज्योकी थु काहसो म़ेहबा येहकें ओ़ह सोङबे खुङ रिह-काम्बुला तोङसीन। 6 दि थाम्ज्यी ओहराङगी तेहन्दाला पे च्यी़ काहल्दी येहबा। ओ़ह सोङबे ओहराङगी खुङया़गी ल़ेहमुराङ सेम ङ्येहम्बा थो़ज्ये मेहयोहङगे। 7 ओहले खुङया़ नाहङला लाहलागी कुया़ला छ्येपा फुल्ग्यो ल़ेहमुराङ ख्याया़गीॱआङ छ्येपा माहफुल। छ्य़ेला दि ल़ेहमु प्री़हदी येहबा, “मिहया़ साहज्ये दाङ थुङज्येला तेहसीन, ओहले छ्या़म्ज्येला लाहङसीन।” 8 खुङया़ नाहङला लाहलागी छ्येउ-छ्येंमु पेहक्यो ल़ेहमुराङ ओहराङगी छ्येउ-छ्येंमु पेहच्ये मेहयोहङगे। छ्येउ-छ्येंमु पेहक्यो सोङबे खुङया़ ङ्यिहमा च्यी़लाॱराङ मेहन्दा तोङरा खाल च्यी़ सुम स्यिसीन। 9 खुङया़ नाहङला लाहलागी मास्यीकाला खोक्पा ताक्यो ल़ेहमुराङ ओहराङगी मास्यीकाला खोक्पा ताज्ये मेहयोहङगे। खुङया़गी मास्यीकाला खोक्पा ताक्यो सोङबेॱराङ खुङ प्रुहलगी काहप्ती स्यिसीन। 10 खुङया़ नाहङला लाहलागी दि माहयोहङ ओ़ह माहयोहङ म़ेदी माक्यो रोहवा ओहराङगीॱआङ माज्ये मेहयोहङगे। खुङया़गी ओ़ह रोहवा माक्यो सोङबे तोङ च्य़ूगे स्यिहङगामकी स्याहप्च्यीगी खुङया़ला तोङ च्य़ूसीन। 11 खुङ थो़ला बाप्क्योकी दि केच्याया़ ओहराङगी तेहन्दाला पे च्यी़ काहल्सीन ओ़ह सोङबे ओहराङ जेम्बु पेहती तेह कोहएँ माएँगी तेहन्दाला दि केच्याया़ प्रुहक्यो यिहम्बा। ता़ह ओहराङनी दि जाम्बुलीङला काल्बाया़ तोङगेन्गी ती़हजी पोहला लेप सिहन्दी येहबा। 12 ओ़ह सोङबे सान्दी पेहती लाहङग्यो येह माएँया़गी जेम्बु पेहच्यु, मिहन्सीमानानी खो रिहल्ज्ये येह। 13 मिहया़ थो़ला ओहङगेन्गी ङ्याहम्छे म़ेदी लेहमेन ङ्याहम्छे ख्या थो़ला ओहङदी म़ेह। यिहॱनाङ किन्ज्योनी यिह-छ्य़े सी़हएँदी येहबा, मिहरोगी ख्याया़ला ख्यागी स्युकगी ना मी़हखुएँ ङ्याहम्छेला छ्यि च्य़ू नाङज्ये म़ेह, यिहॱनाङ ख्याया़गी ना़ ख़ूज्यु म़ेदी ङ्याहम्छे ङ्याम्बु-ङ्याम्बुराङ ओहलेगी थार ख़ूएँगी लाहमॱआङ मिहरोगी तेन नाङगे। दि ल़ेहमु पेहती ख्यागी ओ़ह ङ्याहम्छेया़ ना़ ख़ूज्ये येह। कुला छ्येपा फुल्ग्योकी साहप्च्या दाङ चो़वोकी डेन 14 ओ़ह सोङबे ङाहगी च्याहम्बु रो़हया़, कुला छ्येपा फुल्गेन्गी ल़ेहया़ क्युर्तोङ। 15 ह्अ कोहएँ मिहया़ला ल़ेहमुराङ पेहती ङाह ख्याया़ला माउ येह, ङाहगी माक्योकी ताम ख्या राहङगीराङ नोम्साङ ताङदोङ। 16 चो़वोकी स्याहलु लेहन्दी ओहराङ किन्ज्योला थुज्यी-छ्ये़ फुल्गे। स्याहलुले थुङगेमु ओहराङ मास्यीकाकी ठा़ ङ्याम्बु डी़गे। मिहम्बा ले? खुरा च्या़दी ओहराङगी साहएँमु ओहराङ मास्यीकाकी कुसो ङ्याम्बु डी़ ओहङगे मिहम्बा ले? 17 च्यिबेमाना खुरा च्यी़राङ यिहम्बा, ओहराङ मिह माहङबु येहॱनाङ ज़ुबुनी च्यी़राङ यिहन। ओहराङ थाम्ज्यी ओ़ह खुरा च्यी़ लाहमलेॱराङ साहएँ। 18 इस्राएली पे-ठिमला त़ेदोङ, किन्ज्योला मार्च्ये फुल्ग्योगी से़हया़ साहएँ मिह च्यि किन्ज्योगी छ्येकाङ ङ्याम्बु मी़हन्डीएँ ले? 19 ओ़हठी यिहन्सीमाना ङाहगी च्यि माएँराङ येहबा ले? कुला फुल्ग्योगी साहएँ से़हया़ च्यिॱआङ यिहम्बा ले? कुॱआङ च्यि से़हॱआङ यिहम्बा ले? 20 ङाहगी माज्ये छोल्ग्यो ताम च्यि यिहम्बा माना लेहमेन मिहया़गी किन्ज्योला मिहम्बा, ल्हान्डा-ल्हेन्डीया़ला गा मार्च्ये फुल्ग्यो यिहम्बा। ओ़ह सोङबे ख्याया़ॱआङ ल्हान्डा-ल्हेन्डीया़ ङ्याम्बु पी़मा माहन्डोज्यु माएँ ङाहती सेम्बा येहबा। 21 ख्याया़ चो़वोकी स्याहलु दाङ ल्हान्डा-ल्हेन्डीया़की मेहन्ज्या ङ्यिकाराङ लाहमले थुङ मी़हखुएँ। ख्याया़ चो़वोकी सोल्ज्यु दाङ ल्हान्डा-ल्हेन्डीया़गी चोक्ची ङ्यिकाराङ लाहमले साह मी़हखुएँ। 22 च्यि ओहराङगी चो़वोला ठादो लाहङच्युएँ? च्यि ओहराङ चो़वो म़ेदी ओङ छ्यिम्बु येहबा ले? ना थाम्ज्यी किन्ज्योकी ज़िज्यिदकी तेहन्दाला 23 ख्यागी माएँ, “ठिमला ते़बे ल़ेह ना थाम्ज्यीराङ पेहच्ये डी़गे” यिहॱनाङ ओ़ह थाम्ज्यी लाहमले ख्येप्साङती मेहयोहङगे। “ठिमला ते़बे ल़ेह ना थाम्ज्यीराङ पेहच्ये डी़गे” यिहॱनाङ ओ़ह थाम्ज्यी लाहमले याहर्क्यीनी डो च्यु मी़हखुएँ। 24 सुज्यीगीॱआङ राहङगी फेन्दोप ताज्ये मेहयोहङगे, लेहमेनती फेन्दोप ता कोहएँ। 25 स्यागी छोङखाङया़ला च्यि चोङगे ले? ख्यागी च्यिॱआङ नोम्साङ माहताङबा, च्यिॱआङ टी़हदाप माहबेबा पेहती ओ़ह सोह। 26 च्यिबेमाना “जाम्बुलीङ दाङ ओ़हला येहकेन्की ना थाम्ज्यीराङ से़हया़ किन्ज्योदीॱराङ यिहन।” 27 का़हलेॱआङ किन्ज्योला यिह-छ्य़े माहबेबा मिहगी ख्याया़ला साहप्च्या साहज्येला क़े क्याहप्सीन माना ओहले ख्येला डोज्ये सेम क्येसीमाना ओ़हला सोङ, ख्येगी च्यिॱआङ नोम्साङ माहताङबा पेहती ओहले च्यिॱआङ टी़हदाप माहबेबा पेहती च्यि तेर्के ओ़ह सोह। 28 यिहॱनाङ सुज्यीगी ख्येला “दिनी मार्च्ये फुल्ग्योगी साहप्च्या यिहम्बा” म़ेदी मासीमाना, ओ़ह ख्येला स्येके मिहगी नावाकी तेहन्दाला ओ़ह साहप्च्या माहसाह। 29 ङाहगी माक्यो ताम ख्येगी नावाकी तेहन्दाला मिहम्बा, यिहॱनाङ ओ़ह ख्येला स्येके मिहगी नावाकी तेहन्दाला माक्यो यिहम्बा। लेहमेन मिहगी नावागी ङाहती राहङवाङला च्यिबे ठिम ताङ च्य़ूज्ये ले? 30 का़हलेॱआङ ङाहगी थुज्यी-छ्ये़ फुल्दी साहसीन माना थुज्यी-छ्ये़ फुल्दी साहक्यो तामला लेहमेनगी ङाहला च्यिबे क्येन ता़ज्ये ले? 31 ओ़ह सोङबे ख्या च्यि साहॱनाङ सोह, च्यि थुङॱनाङ थुङ, च्यि पेहॱनाङ पेह, थाम्ज्यी लाहमले किन्ज्योगी ज़िज्यिदगी तेहन्दाला पेहतोङ। 32 सुज्यीॱलाङ क्येन फो़गेन्गी ल़ेह माहबे, ओ़ह यहूदी यिहॱना़ यिहन, ग्रीक यिहॱना़ यिहन, किन्ज्योगी छेन्छोक यिहॱना़ यिहन। 33 ङाहगी पेहक्यो ल़ेहमुराङ पेहतोङ। ङाहगी राहङला फेन थो़एँगी ल़ेहया़ पेहच्ये माहछोल। यिहॱनाङ ला़ खाजे मिह थाम्ज्यीगी थार्पा थोप ख़ूज्यु माएँ सेम पेहती ङाहगी ख्यागी तेहन्दालाराङ फेन थो़एँगी ल़ेहया़ पेहच्ये छोल्ग्यो यिहम्बा। |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.