१ कोरिन्थी 1 - ह्योल्मो1 किन्ज्योकी थु लाहमले मास्यीका येशूगी ल़ेह-पेन डोज्येला क़े क्याहप नाङग्यो पावल दाङ ओहराङगी नो़ह सोस्थेनेस लाहमले, 2 कोरिन्थी लुहङबाला येहकेन्की किन्ज्योकी छेन्छोकला ङ्यिह दि यिहगी प्रुहएँॱराङ येह। मास्यीका येशूला नाम्पार-ताहक्पा काहल्ग्यो दाङ खुङया़ ङ्याम्बु-ङ्याम्बुराङ ग्या़ थाम्ज्यीला मास्यीकाकी नाम्पार-ताहक्पा मिह डोज्येकी तेहन्दाला क़े क्याहप नाङग्योया़ थाम्ज्यी, का़हन्दी का़हन्दीगी चो़वो येशू मास्यीकाकी छेनला क्याप्केन, ओ़ह चो़वो येशू मास्यीकाॱराङ ओहराङ दाङ खुङया़की चो़वो यिहम्बा: 3 किन्ज्यो ओहराङकी याहप दाङ चो़वो येशू मास्यीका लाहमले ख्याया़ला काटीन दाङ स्य़िहदे ओहङज्यु। थुज्यी-छ्ये़ फुल्ग्यो 4 मास्यीका येशू लाहमले किन्ज्योगी ख्याया़ला काटीन नाङसीन ओ़हगी तेहन्दाला ङाह किन्ज्योला नाहम-माना थुज्यी-छ्ये़ फुल्गो येह। 5 च्यिबेमाना मास्यीकागी जेती ख्या ना थाम्ज्यीला छ्युक्पु काहल्दी येह। ओ़ह सोङबे ख्या ङ्याम्बु ताम मा ख़ूएँकी ओङ येहबा ओहले रिहक्स्यीला ख्या तोहरोङ याहरक्यी काहल्दी येहबा। 6 च्यिबेमाना मास्यीकाकी तेहन्दाला ङ्यिहगी तेरक्यो पाङबु तेहम्बा-तेहन्सुमॱराङ यिहन म़ेदी किन्ज्योगी ख्याया़गी पाहरक्यीला दास्यी नाङ सिहन्दी येह। 7 ओ़ह सोङबे ओहराङ चो़वो येशू मास्यीकाकी फेप-लाहम कू़हदे तेहकेमु ख्याया़ला का़हन्दीॱआङ यिहक्तेन काबापया़ कोम्बु डोज्ये म़ेह। 8 ओहराङ चो़वो येशू मास्यीका फेप नाङगे ङ्यिहमु ख्या ङ्य़ेहबा-छ्यू़बा म़ेहबा ओहङज्यु म़ेदी मिहरोगीॱराङ ख्याला तिङस्यो ङ्यिहमा थु थिक-चि पेहती ज़्या़ नाङज्ये येह। 9 किन्ज्यो यिह-छ्य़ेबु यिहम्बा। मिहरोगीॱराङ राहङगी स़ेबु ओहराङगी चो़वो येशू मास्यीकाकी छोक्पाला ख्याया़ला क़े क्याहप नाङसीन। 10 आदा-नो़ह दाङ आज्यी-नुहमुया़, ओहराङगी चो़वो येशू मास्यीकाकी छेनला ङाह ख्याया़ला ओहर-छ्य़े स्युहउ येह, ता़हनी ख्याया़ राहङ नाहङदोङ थिम्बु पेह! ख्या राहङ नाहङदोङराङ ठ़ूदी खा फ़ेदी माहन्डो। ओहले ख्याया़ सेम च्यी़, लो च्यी़ पेहती तेहन्दा च्यी़लाॱराङ डी़दी तेहतोङ! 11 च्यिबेमाना ङाहगी आदा-नो़ह दाङ आज्यी-नुहमुया़, ख्याया़गी पाहरक्यीला ठुक्पा स्योर दु माएँ ताम आज्यी क्लोएकी खाङबा मे़हमेया़गी ङाहला स्येती येह। 12 ङाहगी माज्ये छोल्ग्योकी ताम दिराङ यिहम्बा ख्या नाहङले लाहलागी “ङाह पावलती यिहम्बा” लाहलागी “ङाह अपोल्लोसती यिहम्बा” लाहलागी “ङाह केफासती यिहम्बा” ओहले लाहलागीती “ङाह मास्यीकाती यिहम्बा” म़ेदी माउ दु लो। 13 च्यि मास्यीका बो क्याहप्क्यो यिहम्बा ले? च्यि पावल ख्याया़की तेहन्दाला क्याहङस्यीङला च्याङबा ले? च्यि ख्याया़गी पावलकी मिहनला बप्तिस्मा लेहम्बा ले? 14 ङाह किन्ज्योला थुज्यी-छ्ये़ फुल्गे, ङाहगी ख्याया़ नाहङला क्रिस्पस दाङ गायसला म़ेदी लेहमेन सुॱलाङ बप्तिस्मा तेर्ती म़ेह। 15 ओ़ह सोङबे ङाहगी मिहनला बप्तिस्मा लेहन्सीन म़ेदी ख्या सुज्यीगीॱआङ मा ङ्युहङज्ये म़ेह। 16 यिहम्बा, ङाहगी स्तिफनासकी खाङबा मे़हमेया़लाॱआङ बप्तिस्मा तेर्सीन। ओ़ह म़ेदी ल्हाक्पु सुज्यीॱलाङ बप्तिस्मा तेरक्योदी ङाहला टेहम्बा म़ेह। 17 च्यिबेमाना बप्तिस्मा तेर्च्येला मिहम्बा, यिहॱनाङ या़हबु लेहङगु प्रा-साल्ज्येला मास्यीकागी ङाहला ताङ नाङग्यो यिहम्बा– जाम्बुलीङकी रिहक्स्यीकी तामला मिहम्बा, मिहन्सीमानानी मास्यीका क्याहङस्यीङला टोहङ नाङग्योदी स्यिती काम्बु डोज्ये येह। मास्यीकाॱराङ किन्ज्योगी ओङ दाङ रिहक्स्यी यिहम्बा 18 च्यिबेमाना तोङदी डोएँ मिहया़गी तेहन्दाला क्याहङस्यीङकी लेहङगु उल्दुम्बाकी ताम यिहम्बा, यिहॱनाङ ओहराङ थार्पा ज्योरक्योया़की तेहन्दालानी किन्ज्योकी ओङ यिहम्बा। 19 च्यिबेमाना छ्य़ेला दि ल़ेहमु प्री़हदी येहबा, “येहन्देन माहङबु येहकेनया़दी येहन्देन तोङ च्य़ूज्ये येह, ओहले रिहक्स्यी माहङबु येहकेनया़दी रिहक्स्यीया़ फेन मे़हथोएँ ज़ोज्ये येह।” 20 रिहक्स्यी छ्यिम्बु येहकेनया़ का़हला येहबा? छ्य़ेकी खेम्बुया़ का़हला येहबा? दि काल्बाकी तेहन्दाला स्येपा तुहर्केया़ का़हला येहबा? च्यि किन्ज्योगी दि जाम्बुलीङकी रिहक्स्यीला उल्दुम्बा ज़ो माहनाङ ले? 21 जाम्बुलीङगी रिहक्पा-रिहक्स्यी लाहमले मिहया़गी किन्ज्योला ङोह स्य़े मी़हखुएँ म़ेदी मिहरोला थुयी़ येहकें ओ़ह सोङबे ङ्यिहगी प्रा साल्ग्यो या़हबु लेहङगुकी उल्दुम्बा ताम लाहमलेॱराङ यिह छ्य़ेगेया़ला थार च्य़ूज्ये सुङदी किन्ज्योगी थु-सेम जे नाङसीन। 22 च्यिबेमाना यहूदीया़ याहम्जेन छ्येवागी ताक्छेनया़ तेन्दोङ म़ेदी माएँ ओहले ग्रीक क्यिहपाकी मिहया़ती रिहक्स्यी च्यी़राङ छोल्गे। 23 यिहॱनाङ ङ्यिहनी क्याहङस्यीङला च्याङ नाङग्यो मास्यीकाकी लेहङगुकी तेहन्दाला स्येती डोएँ। यहूदीया़की तेहन्दाला दि नार्तो क्याहप्केन्गी ताम यिहम्बा मासीमाना ग्रीकया़की तेहन्दालाती दि उल्दुम्बाकी ताम यिहम्बा। 24 यिहॱनाङ, यहूदी यिहॱना़ यिहन, लेहमेन क्यिहपागी मिह यिहॱना़ यिहन, किन्ज्योगी क़े क्याहप नाङग्योकी मिह थाम्ज्यीगी तेहन्दाला मास्यीकाॱराङ किन्ज्योगी वाङज्या दाङ किन्ज्योगी रिहक्स्यी यिहम्बा। 25 च्यिबेमाना किन्ज्योकी उल्दुम्बा मिहया़की रिहक्स्यी म़ेदीॱआङ ज्यिबुराङ छ्यिम्बु येहबा, ओहले किन्ज्योकी स्युक छ्ये़मु मिहया़की वाङज्या छ्यिम्बु म़ेदीॱआङ स्युक छ्यिम्बु येहबा। 26 आदा-नो़ह दाङ आज्यी-नुहमुया़, ख्याला किन्ज्योगी क़े क्याहप नाङगेमु ख्या काह-ठि येहकें? ओ़ह साम्लु ताङदोङ। मिहया़गी थोङदाङला ख्या नाहङला माहङबुराङ आदा-नो़ह दाङ आज्यी-नुहमुया़ खेम्बा ताहक्पु, ओङ छ्यिम्बु दाङ मिह छ्युक्पुकी खाङबाला क्येक्योकी मिहया़ म़ेहबा येहकें। 27 यिहॱनाङ खेम्बा ताहक्पुया़ला ङोहजाला छ्यि च्य़ूज्येला किन्ज्योगी जाम्बुलीङकी उल्दुम्बा से़हया़ला दाम नाङसीन, ओहले ओङ छ्यिम्बु येहकें मिहया़ला ङोहजाला छ्यि च्य़ूज्येला किन्ज्योगी जाम्बुलीङकी स्युकॱराङ म़ेहबाकी से़हया़ला दाम नाङसीन। 28 जाम्बुलीङगी चा़ छ्यिम्बु ने़क्यो से़हया़ला फेनराङ मे़हथोएँ ज़ो नाङज्येला किन्ज्योगी जाम्बुलीङगी फेमा म़ेदी फेमा, मिह थाम्ज्यीगी नाम्दो पेहक्यो दाङ फेनराङ मेहथोएँकी से़हया़ला दाम नाङसीन। 29 ओ़ह सोङबे सुज्यीगीॱआङ किन्ज्योकी दिनला छ्य़ेन्दो माहतेन्ज्यु। 30 किन्ज्योगीॱराङ ख्याया़ला मास्यीकाला नोम फेप्सीन, मास्यीकालाॱराङ मिहरोगी ओहराङगी रिहक्स्यी, टाहङबु दाङ नाम्पार-ताहक्पा ओहले थार्पा नाङगेन्दी ज़ो नाङसीन। 31 ओ़ह सोङबे छ्य़ेला दि ल़ेहमु प्री़हदी येहबा, “छ्य़ेन्दो तेन्ज्ये सेम्बा पेहकेनया़गी चो़वोगी तेहन्दाला च्यी़राङ छ्य़ेन्दो तेन्ज्यु।” |
© 2023 (Active), Wycliffe Bible Translators, Inc. All rights reserved.
Wycliffe Bible Translators, Inc.