Salmos 2 - New Testament with Old Testament portions

Yuus nina uchirin ashi apu ainan apuri amajsamu

¹ Shuar ainaka kajekar shinuinawai. ¿Urukamtai shuar ainasha chichamnasha antrasha najanainawa?

² Apu aina chikich apu ainajai iruuntrar Yuusan kajeraina asar, ni apu atii tusa etegkamurincha kajerainawai.

³ Tumaina asar, senchi chichainak: “Ika ii wakeramua nu takakur nigka umirkacharmi tuinawai”

⁴ Imatainakai Yuus nayaimpinam pujus inama nuka nitan wishikiawai.

⁵ Tuma asa senchi kajek nitan chicharuk:

⁶ “Apu atii tusan, wii etegkamun nain Sión tutai pegkera nui apujsajai”, tusa tawai.

⁷ Yuus wina turutma nuna etserkatjai. Ni chichaak: “Wii shuarnum akinati tima akina asam, ameka wina uchiruitme turutmayi.

⁸ Ame ashi nugkanmaya shuar aina surusta tusam seatkuminka, aminu arti tusan imatiksanak amastatjame.

⁹ Shuar ichignan awati tsaimaina numamtuk, tunau ainaka apu ame ijinawartinaitme, tusa Yuus uchirin tinaiti”.

¹⁰ Apu ashi nugkanam inamin ainata antuktarma. Tumarum ju chicham shir unuimartarma.

¹¹ Yuus shir enentaimtakrum umirkatarma, tumakrum ememattarma.

¹² Yuusa uchiri shir anentsarum umirkurum ememattarma. Turachkurminka atumin kajertamak waittan suramsairum, tura jinta wekakrumsha jakairum. Shuar Yuusan nekaspapita tusa ninak umiruka shir aneasar pujusartin ainawai.