Salmos 118 - New Testament with Old Testament portions

Yuus uwemtikarturmaunam maaketi timau

¹ ¡Yuus maaketi titarma! niyaiti pegkerka, nina anenkariya nuka tuke awai.

² Israelita ainaka chichainak: “Yuusa anenkarigka tuke awai tiarti”.

³ Sacerdote ainasha chichainak: “Yuusa anenkarigka tuke awai tiarti”.

⁴ Tura Yuusan umirin ainasha chichainak: “Yuusa anenkarigka tuke awai tiarti”.

⁵ Waitakun pujusan yainkati tusan Yuusan seamiajai tura ai ni anturtuk uwemtikrurmiayi.

⁶ Yuus wijai pujawai, wika ashamkartatsjai, tuma asamtai winaka chikichkiksha pegkerchauka amajtumain ainatsui.

⁷ Yuus wijai pujawai, tuma asa winaka yaintui. Wina kajertin aina nepetkam irunun wainkattajai.

⁸ Shuar nekaspapita tu enentaimtutsuk, nekas Yuusa nuke nekaspapita tusa enentaimtumainaitji.

⁹ Apu aina nu nekaspapita tu enentaimtutsuk, Nekas Yuusa nuke nekaspapita tusa enentaimtumainaitji.

¹⁰ Chikich nugkanmaya shuar aina wina kajertuinak tuartukarmiayi, turasha Yuusa naarijai nepetmakmiajai.

¹¹ Ashi shuar aina tentatkarmiayi, turasha Yuusa naarijai nepetmakmiajai.

¹² Etea numamtuk tentatkarmiayi, turasha jagki irumramun ji keak aesna numamtuk jakarmiayi. Tura Yuusa naarijai nepetkamiajai.

¹³ Ajuarar maami tusar shitatawarmiayi, turasha Yuus wina yainkauwaiti.

¹⁴ Yuus wina senchimtikra nuna kantamrajai. ¡Tura niyaiti wina uwemtikrinka!

¹⁵ Shuar Yuusan umirin ainaka, jeen pujusar shir anenak untsumainak: “Yuus nina senchirijai nepetmakai” tusar tiartinaiti.

¹⁶ Yuus nina senchirin iwainamua nuka nekas pegkeraiti, ¡Yuusa senchiriya nu nepetmakai!

¹⁷ ¡Jakashtatjai, iwáku pujuttajai! Yuus ina ayamrutmak iwainakua nuna etserkattsan wakerajai.

¹⁸ Yuus winaka shir senchi waittan surusuiti. Turasha jakati tusagka inaituschauwaiti.

¹⁹ Yuusa jee pegkera nuna waitiri uraitarma, nui wayan Yuusan maaketi titatjai.

²⁰ Ju waitiya juka Yuus pujamunam waitaiyaiti. Shuar Yuusan nemarin ainaka nu waitiya nunii wayawartinaiti.

²¹ Yainkata tusa seam ame anturtukam uwemtikruru asaakmin Yuusa maaketi tajame.

²² Kaya ekenar jeamin aina kaya pegkerchauwaiti tusa nakitrarua nu yamai nekas ima pegker atsumtai jasai.

²³ Nunaka Yuus turayi, tuma asamtai shir puyatrusar enentaimtumainaitji.

²⁴ Ju tsawanta juwaiti, Yuus ina ayamrutmakuitaj nuka, tuma asamtai yamai shir aneakur jiistamawarmi.

²⁵ Yuusa, wait aneasam uwemtikarturta Yuusa, wait aneasam shir matsamsarti tusam yaigkratkata.

²⁶ Yuus akupkamu wina nuka pegkernum chicharkamu atii, tura Yuusa jeen pujusrik atumka pegkernum chicharnarme.

²⁷ Apua nuka Yuusaiti, Yuusaiti tsaaptinan suramsauka yagkur aina yaruakar tagku aina maa patasa epetainam ejéniarmi, turakur Yuus etegkamu aina matsataina nu uyuntsarmi.

²⁸ Apuru, ameka wina Yuusruitme, tuma asaakmin maaketi tajame, turakun amina imantrumin ememattatjame.

²⁹ ¡Ina Yuusri emematiarmi! Ni pegker asamtai maaketi tiarmi, nigka inaitamtsuk tuke anenmaji.