Chikich nugkanmaya nuwa Rut naartin pachisa timau 4 - New Testament with Old Testament portions

Booz Rutjai nuwenamu

¹ Yaakta waitirin shuar aina iruuntsagke au asarmatai Booz nui jea ekemsauwaiti. Tumai Booz Rutan amina nuatrammain atsuash tu enentaimtu jakmau shuar nagkamaun wainak chicharuk, jui taa ekeemsata tusa tutai jeaa ekeemsauwaiti.

² Tura Booz, diez apu ainan yaaktanmayan untsuk jui atumsha ekemsatarma, tusa tinaiti.

³ Nu ekeemsarmatai Booz nina patain chicharuk: Noemí Moabnumia waketki taa, ina patai Elimelec ajakua nuna nugken suruktajai tusa wakerawai.

⁴ Ametme nuna shir pataimka, tuma asam nu nugka sumaktasa wakerakmeka ju apu yaaktanmaya kaunkara juna emtin wii nugkan sumaktajai tusam titá. Turasha ame nu sumachkuminka wii nunaka sumamainaitjai, tusa tinaiti. Takai nina shir patai ayak: Wii sumaktajai, tusa tinaiti.

⁵ Tura nuiyasha Booz chichaak: Nu tsawanta nuig Noemí nugke sumakum, Rut waje Moabitaya nusha nuatkattame. Tura nu nugkaka jakauwa nuna naari tama atatui, tusa tinaiti.

⁶ Takai ni ayak: Nunisaitkaigka nu nugkanka sumakchattajai, nuka wina uchirnaukesha amaitsui. Turasha ame wakerakmeka sumakta, winau amaina nunaka ni sumakti tusan agkan inaiyajai, tusa tinaiti.

⁷ Nu tsawan ajakua nuigka, shuar chikichan ninu amaina nuna suakka, turachkusha suruinakkesha sandalia weamakmaurin ukuinak chikichan sujakaruiti.

⁸ Tumau asamtai Boozan chikichik sandalian suak chicharuk: Ame sumakta, tusa tinaiti.

⁹ Takai Booz, apu ainan, tura chikich aina antuinamunam chichaak: Yamai atum antuinamunam Elimelecan, Quiliónkan, tura Mahlónkan nugke ainan sumajai, tusa tinaiti.

¹⁰ Nuiyasha Majalónkan nuwe Moabita ajakua nu wina nuwar atatui, tura nina aishri naari papiinum aatramua nusha asakatramuka achattawai. Tuma asamtai kajinmatkimuka achattawai, tusa tinaiti.

¹¹ Takai nui irunu, tura apu ainasha chichainak: Nuwa amina jeemin wayatta nunasha Yuus, Raquelan, tura Lean ituru jakuita numamtuk amajsati, isha nuna uchiri ainaji. Tura nuiyasha wakeraji, ameka yaakat Efratanam, Belén tuuta amajtaiya nuisha shuar aina arantsa iitai atatme, tusa tinaiti.

¹² Tura nuiyasha ju nuwajai nukap uchirmaktinumsha Yuus yainmakti, tura Tamar Judánun uchin Faresan uchirmakua numamtuk pampagti tusar wakeraji, tusa tiaruiti.

¹³ Tu Booz Rutan nuatkauwaiti, tura aishrijai pujusmatai Yuus ajaprukti tima ajapruk uchin aishmagkun uchirmakuiti.

¹⁴ Tumamtai nuwa aina Noemín chicharainak: Yuus, amina tiragkrum kuitamramatnun uchin amasu asamtai, ashi shuar aina nina pachisar emematin arti, tura amina tiragkem Israelnumsha eme anentsa iitai atii.

¹⁵ Tura ju uchika ame uuntach jasakmincha yainmakti, tura amina uchirmi nuwe ajaku senchi anenmau asa siete uchiram amaina numamtuk atii.

¹⁶ Noemí nina uchirin kuitammaina numamtuk Rutjai jimartuk kuitamawaru ainawai.

¹⁷ Tuma asamtai nuwa aina Noemíjai irutkau pujuina chichainak, Noemíka tiragkrinayi, tusar tiaruiti. Tuina asar uchin Obed anaikaruiti. Obedka Isaí apari ajakuiti, Isaí Davidtan akiawaiti, Obedka apu Davidtan apachri ajakuiti.

¹⁸ Fares weantu ajakarua nuka ju ainawai: Faresan aparigka Hersón ajakuiti.

¹⁹ Hersónka aparigka Ram ajakuiti. Raamá aparigka Aminadab ajakuiti.

²⁰ Aminadabpa aparigka Nahasón ajakuiti. Nahasónka aparigka Salmón ajakuiti.

²¹ Salmónka aparigka Booz ajakuiti. Boozan aparigka Obed ajakuiti.

²² Obedtan apachrigka Isaí ajakuiti. Tura Davidtan aparigka Isaí ajakuiti.