Chikich nugkanmaya nuwa Rut naartin pachisa timau 3 - New Testament with Old Testament portions

Boozan naweni Rut tepesmau

¹ Chikichik tsawantin Noemí Rutan chicharuk: Wina nawantru, ame aishrum shir anentramsatnun eatkatjame.

² Ina patai Boozan inatairi ainajai ni takarkum pujusum nu, ju káshia jui cebadan akak ajariin wetatui.

³ Tumatin asamtai maim, perfume yakamarta. Tura jaanch pegker iisam nugkurta, tumam ai wetá. Turasha Booz waitkai tusam yurumkan yuati uumkam nakasta, tusa tinaiti.

⁴ Tumam tuig tepes kanarat tusam shir nekata. Tura jearim naweni jaanch urakam nuig amesha tepesta. Turam ni ame turumainnaka turamtatui, tusa tinaiti.

⁵ Takai Rut ayak: Ame turutam nunaka ashi umiktajai, tusa tinaiti.

⁶ Timau asa Rut, mai, perfumen yakamar tura jaanch pegkeran nugkur Booz cebadan akak pujamunam jeawaiti. Tuma nui jea nina tsatsari timaunka turusag umikuiti.

⁷ Booz yurumkan yua shir aneas cebada akara iruumramunam tepes kanaruiti. Tumamtai Rut uumak pujau asa yaitamtaik jeari nawenam jaanchin uratak nisha nuig tepesuiti.

⁸ Káshi ajampek ai Booz nantaki yáki nuwasha wina naweruinisha tepa tusa puyakkauwaiti.

⁹ Tuma Booz iniak: ¿Yaitme? tusa tinaiti. Takai nuwa ayak: Wika amina inatairam Rutaitjai. Ameka wina tsatsaru pataiyaitme tuma asam yainkata. Tura nuatrukti tusan wakerajme, tusa tinaiti.

¹⁰ Takai Booz chicharuk: Yuus pegkernum yainmakti. Amina aishrum amain wiya ju natsaka eatsuk, kuitrinchau, tura kuitrinnuksha eakchaume. Amina aishrum ajakua nuna patai eme anentsa iiya asam ame timaurmeka metek umiame.

¹¹ Ame nuwa uminaitam nunaka, wina yaaktarin Belénnum shuar pujuina nuka ashi nekarmainawai. Tuma asamtai ashamkartukaipa, ame wina warig seattam nunaka turusnak umiktajai, tusa tinaiti.

¹² Nekas wii amina nuatmainaitjame. Turasha amina aishrum ajakua nuna shir patai nuatramak kuitamramaincha atsuash,

¹³ tuma asamtai juig juakam kanarta, tura kashin tsawara yáki amina nuatramaincha atii nu shir nekami. Turasha ni nuatramta nakitakaigka wii nuatkatjame tusan Yuusa naarijai tajame, tusa tinaiti.

¹⁴ Tutai Boozsan naweni Rut kanaruiti. Turasha kashin tsawak shir tsawatsu aig káshi nantaknaiti. Nunaka nuwa jui kanarun chikichkiksha nekacharti tusa tumawaiti.

¹⁵ Tura Booz chicharuk: Jaanch awagkeakam nu jusam nugka ainkata, tusa tinaiti. Tutai jaanchin jusa ainkauwaiti, turamtai Booz cebada kijintri cuarenta aramun nagkasau aun ayankauwaiti. Turam yaaktanam waketkinaiti.

¹⁶ Rut tsatsari pujamunam jeawaiti. Tumamtai tsatsari chicharuk: ¿Wina nawantru uruk wekasaume? tusa tinaiti. Tutai Rut tsatsarin Booz ni turamun ashi ujak,

¹⁷ nuiyasha chichaak: “Amina tsatsarminka pegke jutsukka wemaitsume” tusa cebada ainan juna surusai, tusa tinaiti.

¹⁸ Takai Noemí chichaak: Iturchat enentaimtsuk nakasta. Ju shuarka ayamtsuk yamaik ashi iwar inaisattawai, tusa tinaiti.