Chikich nugkanmaya nuwa Rut naartin pachisa timau 2 - New Testament with Old Testament portions

Rut cebadan juuktasa Boozan ajariin wemau

¹ Noemí aishri Elimelec ajakua nu weantu, Booz naartin shir wiakach pujujakuiti.

² Tura chikich tsawantin Rut Noemín chicharuk: Cebadan juwainamunam wetajai. Tuman nita ashi juutsuk ikuinamun ukunam wekasan, wisha juukan utitjai, tusa tinaiti. Tama tsatsarisha chicharuk: Takumka weme juukam utita, tusa tinaiti.

³ Tutai we cebadan juwainak pujuinamunam jeaa nita ukurin nisha cebada juwaku ikukmau ainan juwak pujusuiti. Nu ajaka Booznau ajakuiti.

⁴ Nu tsawantin Booz Belénnum pujau jeawaiti. Tura cebadan juuwak pujuinan chicharuk: Yuus atumin pegkernum yainmakarti, tusa tinaiti. Takai nitasha ayainak: Amincha Yuus yainmakti, tusa tiaruiti.

⁵ Tuma Booz takatan inamnu apurin chicharuk: ¿Au nuwasha tuiyampaita? tusa tinaiti.

⁶ Takai takatan inamnu apuri ayak: “Moabnumia nuwa Noemíjai taama nuwaiti.

⁷ Wisha juwainak yujainamunam ukunam wekasan cebada ashi juinachmaun juuktajai tusa seatmayi. Tura nigka káshik nagkama ayamtsuk yamaikisha taká pujawai”, tusa tinaiti.

⁸ Takai Booz Rutan jeari chicharuk: “Chikich ajanam weme árak juutsuk, juig juakam aminu amaina nu juukta.

⁹ Wina inatair ainan, ju nuwa waitkasairpa tusan tiarjai. Tuma asamtai, kitamakmesha wina takartin aina shikikmau entsa muitsnum pujuina juiya umarta”, tusa tinaiti.

¹⁰ Tutai eme anentas iiyak tsuntsumaa Boozsan chicharuk: Chikich nugkanmaya aisha ¿urukamtai wait anentrame? tusa tinaiti.

¹¹ Tama Booz ayak: Amina aishrum jakau aig, tsatsaram shir anentsam kuitamkum amina apa, amina nuku tura nugkemsha ikukim, ii ainatin nekakratchayatam ijai pujustasam taawaitam nunasha nekajai.

¹² Atash nanapejai nina uchirin etektuk kuitamna numamtuk yainkati tusam Israel umiru jakmauwa nu Yuus eakuitme. Tura asaakmin ame takasmaunam Yuus akirmakti, tusa tinaiti.

¹³ Takai ni ayak: Ame wina wait anentrame, ame wina turutam nu shir enentaimtikrawai. Wika imanchau aig shir amajtame, tusa tinaiti.

¹⁴ Yurumak yuta jeamtai, Booz Rutan chicharuk: “Taata tumam jui, pan vinagrenam inijaram yuata” tusa tinaiti. Tutai Rutcha inatai ainajai ekemsauwaiti, tura Booz pankan yuati tusa susauwaiti. Turam yua shir ejémaruiti, tura nuiyasha ampinturuiti.

^15-16 Rut ataksha cebadan juuktasa weakai, Booz nina inatairi ainan chicharuk: Yamaika juuwakrumsha akaketkarum jukti tusarum ikutarma. Turakrum nukap jukiti tusarum atum juuwamusha akakekrum ikutarma. Ju nuwa cebadan juuwak wekakaisha waitkasairpa tusa, tinaiti.

¹⁷ Rut Boozsan ajariyan káshik nagkama cebadan juwa juwakua etsa akatmak, cebada akarmaka veinte kijintri nagkaiki aramun juukuiti.

¹⁸ Tuma Rut cebadan juukmaurin nukap juki tsatsarin inaktustasa wuwaiti. Tura yuaku ampirmaurincha tsatsarin susauwaiti.

¹⁹ Turam tsatsari chicharuk: ¿Yamaisha tui takasu asamea ima nukapsha itame? Amina shuar wait anentramak nukap suramsa nunaka, nincha Yuus pegkernum yaigti, tusa tinaiti. Takai Rut tsatsarin chicharuk: “Shuar Booz naartina nuna takatrinig takasjai” tusa tinaiti.

²⁰ Takai Noemí ayak: “Yuus nincha pegkernum yaigti. Nu shuarka ina patai ainancha wait anentu jakuiti. Tura asa incha yainmamainaitaj nuka niyaiti. Nu shuarka ii weantuiti tuma asa ina yainmak aitkarmaji” tusa tinaiti.

²¹ Takai nuiyasha Rut chichaak: “Juakam wina inatair ainajai metek cebada juut inagnakta tusa turutui” tusa tinaiti.

²² Takai Noemí Rutan chicharuk: “Nuka pegkeraiti, inatai ainajai juakam takasta. Turasha waitkarmasarai chikich ajanmagka weepa” tusa tinaiti.

²³ Rut kashi kashinig cebadan juuwa pujau tura nina tsatsarisha nuig pujau, cebada juwamu ashimnakmatai nisha inaisauwaiti.