Proverbios 8 - New Testament with Old Testament portions

Unuimata nu pachisa jintinkartuamu

¹ Unuimata nuka shuar jiistamuk ipamauwa numamtuk, shuar ainatin wini winitarma tusa untsurmaji.

² Nainnum jinta tsegkeakmaunam shuar aina nagkamainakai wajas untsuwa numamtuk,

³ tura yaakta waitirin wajas untsuwa numamtuk,

⁴ shuar ainatiram wina chichamur anturtukrum umirtuktarma tusan untsuajrume.

⁵ Nekachu ainatiram tura enentaimkachu ainatirmesha pujut pegkera nu nekaattsarum wakerakrumka wina chichamur anturtuktarma.

⁶ Wika chicham pegkera nuna ujaktasan wakerajrume. Tuma asamtai wina chichamur anturtuktarma.

⁷ Wika chicham nekaschauwa nunaka chichatsuk, chicham nekasa nuna chichaajai.

⁸ Tuma asan pegker aina nunak chichaajai. Wina chichamur ainaka waitka ainatsui.

⁹ Shuar pegker enentaimkau aina, tura yacha aina nuka ju chichamka nekasaiti, tumau asa pegkeraiti tusar tuinawai.

¹⁰ Tuma asamtai kuit tura oro aina jukittsarum wakerarum nu nagkasarum wii jintinkartaj ju unuimartasrum wakeritarma.

¹¹ Unuimata nuka kaya pegker asa, akik aina nuna nagkasau shir pegkeraiti. Iman asamtai unuimata nuna nagkasau pachisa tumainka chikichka pegke atsawai.

¹² Wika yachaitjai, yachamata nuka wini awai. Tumau asan pujut pegkera nuna pachis jintinkartuina nuigka wisha pujajai.

¹³ Yuusan umiru asan: wika pegkerchau takatan, emematan, kajetan, tura waitrut aina nunasha nakitajai.

¹⁴ Chikich aina pujut pegkera nu pachisa chicharta nusha, juka pegkeraiti, antsu juka pegkerchauwaiti tusa tuta nusha winauk ainawai. Tura senchimata nusha winig awai.

¹⁵ Apu aina nuka wii nekat suamu asar, shuar ainan inainawai. Turuinak shuar aina umiktinan chichaman najanainawai.

¹⁶ Apu ainaka wii yayámu asar shuar ainan inainawai. Tura chichaman iwarin aina nusha wii yayámu asar, shuar ainan pujut pegkera nuna pachisar jintintainawai.

¹⁷ Wina anentainanka wisha nitancha aneajai. Wina eatainaka ni eamurinka wainkartin ainawai.

¹⁸ Wiakchamata nuka wini awai, eme anentam atá nu, tura pegker enentaimsa pujuta nusha winig awai.

¹⁹ Wii sukartamuka nekas pegkeraiti. Tuma asamtai kuit, oro, nu aina jukittsarum wakerarum nu nagkasarum wii jintinkartaj ju unuimartasrum wakeritarma.

²⁰ Wina umirtuinaka jinta pegkernum weká numamtuk pegker pujuina asar, chikich shuar ainancha pegkera nunak pachisar jintintainawai.

²¹ Wina anentuk umirtuinanka, wiakach jasarti tusan titinaitjai.

^22-26 Wika nugka, nayants aina, entsa aina, ashints aina, nain aina tura ikam ainasha atsuinaig tuke pujujakuitjai. Tuma asamtai Yuus wina chichartak: “Ame shuar aina nekamtikin atá”, tusa turutnaiti.

²⁷ Yuus nayaimpin, nayantsan tura nayants yaki takuni atinan najanawa nuisha wika pujumiajai.

²⁸ Yuragmin, nayantsan kunari nagkatkamuri atinan,

²⁹ entsa kuyuak nugkan ukumati, atak awenagka entsa nugkanka amurchati, nugkan esantin tura wagkantincha nekapmarua nuisha,

^30-31 wika pujumiajai. Tuma asan Yuus ashi najanak umik shuarnasha najana asamtai, shir aneakun Yuusan kashi kashinig emematmiajai.

³² Tuma asamtai, uchir ainata, wina chichamur metek umirtuktarma. Nu tumakrumka atumka shir aneasrum pujustin ainarme.

³³ Pujut pegkeran pachisan tajarum nu shir antukrum unuimartarma.

³⁴ Wii taja juna shuar antuk umiak wina nakaruka shir aneastinaiti.

³⁵ Wina umirtaunka Yuus pegkernum yaigtinaiti. Turamu asa pujut nagkanchaun tuke atinan jukitnaiti.

³⁶ Antsu shuar wina nakitra asa, chichamrun umiachuka waittanam wetasa wakera asa tumawai. Tura wina kajerta nuka jakattawai. (Yachamata nuka, ii shuarti pegker unuimata nuna jintinkartawai)