Proverbios 31 - New Testament with Old Testament portions

^1-9 (-)

Nuwa pegker enentaimkau pujuti pachisa timau

¹⁰ Nuwa pegker enentaimkaun wainkan nuatkatjai takursha yupichu wainmaitsui. Turasha nuwa iman wainmauka kaya shir pegker asa akika nuna nagkasauwaiti.

¹¹ Shuar nuwa imanun nuatkauka atsumtsuk pujau asa, shir aneas pujuwaiti.

¹² Aishrin waitkatsuk, ashi tsawantin aishrinka pegkernum yainaiti.

¹³ Lanan tura lino tutaincha sumak jaanchin najana suruktasa, eak wekaksha shir aneas wekainaiti.

¹⁴ Yutai ainan yajayan barco chumpia itauwa numamtinaiti.

¹⁵ Káshik nantaki uchiri ainan yurumkan ayurnaiti. Turak inatairi nuwa ainanka takamtiknaiti.

^16-17 Nugkan pegkeran iis sumauwaiti. Tura árak ainan araattsa uminas shir aneas jintuki arauwaiti.

¹⁸ Warí ainan shir surukarti tusasha iinaiti. Takamain akaigka káshisha jiin ekeemak pujus takauwaiti.

¹⁹ Uruchin kutamar jaanch ainancha nigki najannaiti.

²⁰ Tura kuitrinchau asa waitainancha tuke suwaiti.

²¹ Turin asa tsetsek tepeamtaisha tsetsekai waitainatsuash tuka enentaimchauwaiti.

²² Esekmatai colcha ainan, tura nugkutai pegker ainancha nigki najannaiti.

²³ Iman asamtai nina aishrinka, nu yaaktanmaya shuar ainaka shir nekaina asar, apu ainancha inagkas araantus iin ainawai.

²⁴ Nu nuwaka jaanchin, tura akachumtai ainancha najanak surinaiti.

²⁵ Ni pegker takaamurinak takastasa wakerin, tumau asa chikich tsawantin atsumashtajash tuka enentaimchauwaiti.

²⁶ Shir enentaimar chichauwaiti. Tura uchiri ainancha shir jintinnaiti.

²⁷ Pegkerash takaina tusa nina jeenia ainanka shir iinaiti. Kasamkagka pegkesha yuchauwaiti. Antsu ni takasmaunmayanak yuwaiti.

²⁸ Uchiri aina tura aishrisha chicharainak:

²⁹ “Nuwa pegker ainaka nukapeti. Turasha ametme nita nagkasau ima pegkermeka: Tumau asam nuwa aina nuka ame ashi jintinme” tusa tinu ainawai.

³⁰ Nuwa iyashi shiram aina nunaka shuar wainkar wakerin ainawai. Nuwa iyashi shirma nuka shuaran tsanuatnuriyaiti. Antsu nuwa Yuusan umiruk pegker puja nu shir anentam atinaiti.

³¹ ¡Ashi shuar ainan emtin ememattarma! ¡Ni ashi pegker takasmauri aina pachisrumsha ememattarma!