Proverbios 13 - New Testament with Old Testament portions

¹ Uchi yachaka nina apari chicharmasha metek umirnaiti. Antsu uchi yachachuka apari chicharmasha umirchauwaiti.

² Shuar chicham nekasa nuna etsernuka, pegker suam artinaiti. Antsu shuaran tsanumrur maku aina nuka ima nunak wakerin ainawai.

³ Shuar pegkerchaun chichakaij tusa kuitammamas pujauka pegkerchau chichachuiti. Antsu senchi chichakka nigki makumawai.

⁴ Shuar nákika warí ainan wakeraksha ni takaschag atsuma pujuwaiti. Antsu shuar nákichuka takaak pujak atsumtsuk pujuwaiti.

⁵ Shuar waitrichuka wait chichaman antutan nakitnaiti. Antsu shuar waitrinka waitrua asa natsamauwaiti.

⁶ Shuar tunau ainan takatan nakitnuka pegker pujuwaiti. Antsu shuar tunaun takauka nina tunaurinig makumatnaiti.

⁷ Shuar kuitrinchau ainayat kuitrinna numamtuk puju ainawai. Tura shuar kuitrintin ainayatcha kuitrinchauwa numamtuk puju ainawai.

⁸ Shuar wiakchaka achika jukimsha, mantuawarai tusa nina kuitrinig akikmak uwemmainaiti. Kuitrinchau ainaka kasaram achau ainawai.

⁹ Shuar Yuusan umirin ainaka lamparín keek tsaaptin jas awa numamtuk pegker puju ainawai. Antsu shuar tunaun takau ainaka lamparín keayat kajinak káshi jas awa numamtuk pegkerchau puju ainawai.

¹⁰ Shuar ememauka maanikta tusa utsukratnaiti. Antsu shuar pegker enentaimkauka chikich shuar chicharmasha pegker anturnaiti.

¹¹ Shuar waitrina kuitrigka wári ashimnauwaiti. Antsu shuar waitrichuka ishichik juaksha, ikua ikuakau wiakach jastinaiti.

¹² Shuar ni nakamurin wainchakka wake mesemar pujuwaiti. Antsu shuar ni nakamurin wári wainiakka shir aneas pujuwaiti.

¹³ Shuar chichaman umitan nakitakka, nigki waittan jukitnaiti. Antsu shuar chichaman uminka pegker suam atinaiti.

¹⁴ Shuar yacha jintinkartamun antuk metek umiakka, pegker pujustinaiti, tura jatancha jakashtinaiti.

¹⁵ Shuar chikich ainajai anenais pujaunka chikich ainasha shir anentin ainawai. Antsu shuar chikichan tsanumrin ainaka waittan jukiartin ainawai.

¹⁶ Shuar yachaka nina yacharinig enentaimas takauwaiti. Antsu shuar yachachuka tumachuiti.

¹⁷ Shuar chicham waitan etsernuka chicham iturchatnum jeawaiti. Antsu chichaman waitan etserchauka shuar tsuakan itaawa numamtuk, chikich ainancha pegker enentaimtiknaiti.

¹⁸ Shuar chicharmasha chichaman metek umichuka, kuitrinchau asa, natsanmain puju ainawai. Antsu chicharmasha chichaman metek uminnaka, pachisar au shuarka pegkeraiti tinu ainawai.

¹⁹ Shuar ni wakeramuri metek uminkamtaigka shir aneas pujuwaiti. Shuar enentaimkachu ainaka tunau takatairi ainan inaitan nakitin ainawai.

²⁰ Shuar pegker enentaimkaujai tsaniakka nisha pegker pujutan unuimamainaiti. Antsu shuar pegkerchaun enentaimkaujai tsaniakka nisha tumasag pegkerchaunak unuimamainaiti.

²¹ Shuar tunaun takau ainaka pegkerka pujuchu ainawai. Antsu shuar pegker enentaimkau ainaka pegker pujusartin ainawai.

²² Shuar pegker puju jakka waríri ainanka nina patai ainan ikurnaiti. Antsu shuar pegkerchau puju jakka, waríri ainanka chikichan ikurnaiti.

²³ Shuar kuitrinchaun ajariin árak aina nukap arumainaiti. Turasha shuar nuna sumau metek sumarchamka megkainaiti.

²⁴ Uun nina uchirin chichareachkugka, nunaka aneachu asa turawai. Antsu uchirin chicharea nuka anea asa turawai.

²⁵ Shuar Yuusan umirnuka shir yua pujuwaiti. Antsu shuar tunau takatnak enentaimtinka tsukai waitnaiti.