Biblia Todo Logo
Bìoball air-loidhne

- Sanasan -

Proverbios 1 - New Testament with Old Testament portions


Apu Salomón chicham pegkera nuke unuimartarma tusa timau

1-3 Davidtan uchiri Salomón Israel shuar ainan apuri, shuar aina chicham nekasa nuna enentaimtusarti, tura pegkera nunak unuimarar jintinkartuawarti. Tura pegker aina nuna unuimarar, pegkera nunak takasarti, tumainak chikich ainancha tsanutsuk, shir anentiarti tusa nekamtikawartasa wakera asa aaruiti.

4 Nigka natsa imanis nekachu ainasha, yachamararti tusa wakeru jakuiti.

5 Tura shuar yacha ainancha juna chichaman antukar nu nukap yachamararti, tusa tinaiti.

6 Shuar yacha aina jintinkartuamurin, tura ni pachisa jintinkartuamurincha nekawarti, tusa tinaiti.


Uchi aina umiktin pachisa timau

7 Pegker pujuta nu nekaattsar wakerakrika Yuus umirmainaitji. Turasha shuar enentaimkachu aina nuka Yuusan eme anentas iichu asar unuimatan, tura jintinkartamuncha nakitainawai.

8 Uchi ainata, atumi apari, tura atumi nukurisha chichartamkaigka metek umirkatarma.

9 Nu tumakrumka etsegkrutain pegkeran etsegkrakua numamtuk, tura shaukan pegkeran nugkuarua numamtin atattrume.

10-12 Shuar tunaun takau aina tsanurmainak: “Shuar maar wa taimunam egkear ikuktatji,

13 turar nita kuitri, waríri aina, tura nitanu ainaka ashi yarurkar inu amajsattaji.

14 Jutijai iruuntratarma” tumawakrumin kasamkar akanka jukimi tusar turamainakaisha,

15 nitajaigka pegkesha tsanigkairpa. Tura nita tuinamusha umirkairpa.

16 Shuar tumau ainaka magkartuattsa wakeruina asar, waurkamnau nekapin ainawai.

17 Enentaimsarum iistarma: Kuntin wainai nemakti tusar yarag netuamka nemamaitsui.

18 Turasha nu shuar ainaka nekainayat magkartuina asar nitak makumainawai.

19 Shuar aina, tunau takata nunak wakerin ainaka waittan jukiartin ainawai.


Pegker enentaimsar pujuta nu wakerumainaiti timau

20-21 Pegker enentaimsar pujuta nu nekas wakerumainaiti. Yaaktan waitirin shuar wajas, shuar aina nagkamainakai untsuwa numamtuk, Yuuscha shuar ainan chicharuk:

22 Natsa imanis enentaimkachu ainata ¿urutaimpa iwarsa chichatcha inaisattarme? Wishikkartin ainatirmesha ¿urutaimpa chikich shuar aina wishiktsuksha pujustatrume?

23 Wii taja nuka metek umiktarma. Tumakrumnaka yachamatan susatnaitjarme. Tura wii wakeramurnasha nekamtikatnaitjarme.

24 Wii atumin wina nemartuktarma tusan untsuamaitiatrum, nakitrauwaittrume.

25 Tura jintinkartamursha umirtukchauwaitrume, tura chicharkartamursha nakitrauwaittrume.

26-27 Wina umirtukchau asaakrumin, wii atumin waittan susatnaitjarum nu tsawan jeamtaigka, wait anentrashtinaitjarme. Tura nase senchi nasenkai ashamakrumnasha wishikratnaitjarme.

28-29 Nu tsawantin untsurkartinaiti, turutainakaisha umirkachartinaitjai. Sapijmainak wina nemartukartasa wakeriartinaiti. Tumainaksha wina umirtutan nakitraru asar waitkachartin ainawai.

30 Wii jintinkartamuncha nakittraru asar,

31 pegkerchaun takasaru asar, tura pegkerchaun enentaimin asar, waittan jukiartin ainawai.

32 Enentaimkachu ainaka nita tunau takatairinig jakartin ainawai.

33 Antsu wina chichamrun uminaka ashamkartutsuk shir agkan pusartin ainawai.

© 2010, Wycliffe Bible Translators, Inc. All rights reserved.

Wycliffe Bible Translators, Inc.
Lean sinn:



Sanasan