Oseas 6 - New Testament with Old Testament portions

Israel shuar ainan tunau takatan inaiyainak Yuus umirtan nagkamamu

¹ Nuna antukar israelita aina chichainak: “Tunau takat inaiyainakur Yuus umirkarmi. Ni ina kajertamkau asa león asakratmaina numamtuk amajtamkau akusha nigki wait anentramar shuar tsuakratna numamtuk tsuarmartatji.

² Jakauwa numamtuk pujaj nuna jimar tsawan nui esetamattaji. Tura tres tsawanta jui inagtamkittaji, nuna turutmamtai nijai irutkau pujuttaji.

³ ¡Yuus umirtanam kakanmamsarmi! Nekas etsa kashi kashinig jinna numamtuk, nekas yumi yutak nugkan uchupna numamtuk, ina yainmaktasa tarutramattaji”, tusar israelita aina tiaru ainawai.

Israelita aina Yuus yaigmau

⁴ Tusa tuinakai Yuus israelita ainan chicharuk: Efraín nugkanam pujuinatirmincha iturkatjarmek nunaka nekatsjai. Judá nugkanam pujuinatirmincha iturkatjarme nunaka nekatsjai. Atum aneajme tusarum wina turutrum nuka ishichik tsawan anentu asarum, káshikmas yuragkim utsaanar au, tura sana tsawarai kakek au tsawaar megkaina numamtuk ainarme.

⁵ Tumau asaakrumin, wii timaun juki etserin aina yujasar nita wina chichamrun etserainamu charip jiniak magkartina numamtuk ijitmawaitrume.

⁶ Atum ainatiram Yuusnau atii tusarum surarum nunaka wika wakeratsjai. Antsu wina anentiarti, tumainak ina Yuusriyaiti tusa turutiarti tusan nuna wika wakerajai, tusa Yuus Israel shuar ainan tinaiti.

⁷ Turasha winau ainatirmeka, Adánjai metek enentaimkachua numamtuk ainarme, atum chicham umiktina nu umikchaurme.

⁸ Yaakat Galaadnum pegkerchau aina, magkartin aina nuke matsatainawai.

⁹ Sacerdote ainaka jinta Siquemnum wetainam kasajai metek uma yujainawai, shuar aina nunii wenan maawar warí ainan atankiartasa.

¹⁰ Tura Israel shuar ainaka nuna nagkasau, Yuusan umirchau, enentaimkachua numamtin ainawai

¹¹ Tura Judá weantu ainatirmesha pegkerka ainatsrume, Tuma asarum atumsha waitat jukittarme tusan tajarme.