Oseas 5 - New Testament with Old Testament portions

Yuus israelita ainan waittan susartatjai tusa timau

^1-2 ¡Sacerdote ainata antuktarma! ¡Israel shuar ainan apuri ainata, antuktarma! Apu ainan patai ainata, shir antuktarma. Atum ainatiram winau aina tsanuru asaakrumin waittan susattajrume. Atum ainatiram israelita ainaka chichaman umichu amajsauwaitrume. Wanam ajumaina numamtuk, yuusrimtai aina ememattarma tusarum nita nakitainakaisha nain Tabornum, tura Mizpánmasha emematmamtikin asaakrumin waittan susattajrume.

³ Efraín weantu ainan, Israel shuar ainancha, nita yuusrimtairi ainan ememataina asar, tunaun takaina nunaka wika shir nekainajai. Atumka nuwa akika takataiya numamtin ainarme.

⁴ Nitaka pegkerchau aina nunak takaina asar, winaka umirtukartasa wakeruinatsui. Nuwa akika takatai aina nunak pujuraina asar, winaka umirtukartasa wakeruinatsui.

⁵ Atumka pegkerchau, tura ememau ainarme, tumau asaakrumin atumnaka ijinattajrume. Tura Judá weantu ainancha turusnak ijinattajai.

⁶ Ju suam Yuus tsagkurtamratji, tusar vaca ainan, oveja ainan jukiar weartin ainawai. Turasha nitaka wii inaisamu asar, winaka waitkachartin ainawai.

⁷ Israelita ainaka nuwa aina chikich shuar ainajai takanaina numamtuk ainawai. Nita uchiri aina nuka wina uchirka ainatsui. Ima winak umirtichu aina nui nita nugke ainanka nitajai irumran chikichik nantua nuig emegkaktatjai.

Yuus Israel shuar ainan tura Judá weantu ainajaimak waittan susamu

⁸ Guibeánam kachu umpuartarma, Ramánam trompeta umpuartarma. ¡Bet-avénnum pujuina aneararti tusarum, umputai umpuartarma! ¡Benjamín weantu aina aneakuk pujusarti tusarum ujaktarma!

⁹ Israel shuar ainan waittan susattajai tusan tinaitaj nuka imanisag uminkattawai. Nuna turakai Efraín weantu aina nugken yaakat aina irunuka tsainkatnaiti.

¹⁰ Judá weantu ainan apuri ainaka shuar chikicha nugken kasarin aina numamtin asar israelita ainan nugken atantainawai. Nuna tumau asarmatai nitan senchi kajerkaru asan waittan susartatjai.

¹¹ Israelita ainaka yuusrimtai aina nunak ima senchi ememataina asarmatai, nitanka arantus iitsuk pegkerchaun tuke chicharainawai.

¹² Turuina asarmatai Efraín weantu ainanka mamuk numin amuwa numamtuk, wii ijinattajai. Judá weantu ainancha kamau numin imamna numamtuk, wii ashi ijinattajai.

¹³ Tura Israel shuar aina, Judá weantu ainajaimak waittan jukiar waitainak, Asirianmaya apu yainmaktaji tusar weriartin ainawai. Turasha nu apuka nitanka yaigchatnaiti.

¹⁴ Israelita ainanka, Judá weantu ainajaimak, león kuntinan asauwa numamtuk, wii ijinattajai. Wii nitan ijinkai nuna ayamrumainka pegkesha atsuttawai.

¹⁵ Nuna turan nita tunau takatairi ainan inaisarti tusan pachitsuk inaisan ujumak tsawan nakasartatjai. Wii turam pujusar nita tunau takatairi ainan enentaimtusar wake mesekar chichartuinak: “Ina tunauri tsagkurkarturta tusar turutiartin ainawai”, tusa Yuus tinaiti.