Oseas 4 - New Testament with Old Testament portions

Israelita aina tunaun takasarmatai Yuus waittan susamu

¹ Israelita ainata Yuus turamrum nu antuktarma, Yuus atum tunau takasu asaakrumin waittan suramsattsa umirtamkaurme. Winaka nekarainachu asar, wina chichamrun umirtauka pegke atsawai.

² Tumaina asar waitrutan, magkartutan, tura kasamtan, aishmag aina nina nuwechujai takanaitan, tura nuwa aina nina aishrichujai takanaitan, magkartutan, nu aina nunak pujurainawai.

³ Tumaina asar, ashi israelita ainaka útainak kakamainchau nekapenawai. Kuntin aina, nanamtin aina tura entsanam namak aina pujuinasha jinawartatui.

Yuus sacerdote ainan ashi israelita ainajai nita pegkerchau takamuri ainan pachisa timau

⁴ Yuus chichaak: Chikich shuar ainan waittan susattsanka wakeratsjai. Antsu wika sacerdote aina nunak waittanka susartatjai.

⁵ Atumka tsawai tura káshisha, pegkerchau aina nu tuke takarme, tura wina chichamrun etserin ainasha, pegkerchau ainan takainawai. Nu tuma asaakrumin atumi nukuri ainanka ijinattajai.

⁶ Wii etegkamu ainaka winaka, ina Yuusriyaiti tusa turutainachu asarmatai, nitanka ijinawaitjai. Tura sacerdote ainasha wina Yuusruiti tusa turutainachu asarmatai, nitanka wina emematrutai jeanam takartusarti tusanka tichartatjai. Wina chichamrun umirtukcharu asarmatai, nita weantu ainancha kajinmatkiartatjai.

⁷ Sacerdote aina nukap akaigka, tunau aina nukap awai. Tumaina asarmatai sacerdote ainanka eme anentsa iitai ainakaisha, eme anentsa iishtai amajsartatjai.

⁸ Tura winau aina nita tunauri tsagkurnartinan, tagku ainan itainakai nuna namagken atsumtsuk yuina asar shuar aina tunaun takainakaisha taká pujuarti tusa pachinatsui.

⁹ Sacerdote ainanka wii etegkamu ainajaimak tunaun takaina asarmatai, nita takasmaurin iirsan turusnak waittan susartatjai.

¹⁰ Wina umirtutan inaisaru asar nukap yuinaksha shir aneasar pujuschartinaiti. Uchi akiami tusar wakerusar takanainaksha uchinka akiachartin ainawai, tusa Yuus Israel shuar ainan tinaiti.

Israelita aina nita yuusrimamu ainan emematmau

¹¹ Nuiyasha Yuus chichaak: “Israelita ainaka nuwa ainan takainak, vinon umuinak nampena asar, shir enentaimkachu ainawai.

¹² Atakea nuisha urukatnukitaj nuna pachis ujatmaktaji, tusar nita yuusrimamuri ainan numin jeariar inin ainawai. Tsanirmata nunak pujurainak inaimainchau nekapena asar, nuna yujarainak wina umirtutnaka inaisaru ainawai”.

¹³ Nainnum wakar, númi irunmaunam nuna wakenmarin mikintunam pegker asamtai, nui pujusar tagku ainan maa epenak, tura kugkuin incienso tutai ainancha nita yuusrimtairi ainan eme anentas iiyainak epenawai. Nuna turuina asar, nita nawantri ainaka, tura nita uchiri nuwe ainasha, nuwa akika takataiya numamtuk ainawai.

¹⁴ Atumka nuwa nita yuusrimtairi ainan emematin aina takaina asarum atumek makumarme. Nawantri akika takatai ainakaisha, tura nita uchiri nuwe chikich shuar ainajai tsanirmau ainakaisha waittanka susachartatjai. Shuar shir enentaimas pujuwaitak nuna inaiyakka, tuke pegkerchau weak tumawai.

¹⁵ Israel shuar ainan, nekas yuuschau ainan emematainakaisha, Judá nugkanam pujuinaka israelita ainajai mai tunaun takaina nuka pegkerchauwaiti. ¡Gilgalnum, nuiya Bet-avénnum yuusrimtai aina nuka emematirpa! ¡Nuiyasha umikchatnaitkurmeka wina naar pachisrumka chichakairpa!

¹⁶ Israel shuar ainaka pegke enentaimkachu chichamnasha umichu, burro nuwari unuimakchauwa numamtin ainawai. Tumau asarmatai nitanka oveja uchiri aina pasto pegkernum apujsar kuitammaina numamtukka kuitamashtinaitjai.

¹⁷ Efraín weantu ainaka nita yuusrimtairi ainan emematainawai, tumaina asar nunak emematu pujuarti.

¹⁸ Umutai nampemain aina nuna umarar nampenakka nuwa akika takatai aina nuna inaitsuk yujarainawai. Apu aina nusha natsanmain pegkerchau aina nunak takainawai.

¹⁹ Tumaina asarmatai nita yuusrimtairi ainan ememataina nu ashi tsairka utsankam natsaarartatui