Oseas 2 - New Testament with Old Testament portions

¹ Tumainak nita yachi ainan chicharainak: “Yamaika ii ainatika Yuusnau ainaji, tusar tiartinaiti. Tura nuwa ainasha kai ainan chicharainak: Ika Yuus wait anentramu ainaji”, tusar tiartin ainawai.

Israelita aina Yuusa chichamen umirkachmau

² Yuus chichaak: ¡Oseas nina uchiri ainan “atumi nukuri pegkerchau chicharkatarma”, tusa tina numamtuk, wisha israelita ainan chicharkun: “Atumi uuntri aina pachisrum pegkerchau chicharkatarma. Yamaika wina nuwarchau ainawai, nitasha winaka aishru turutchartatui! Nuwa chikich shuarjai takanaina numamtuk puja nuna inaisati tusan wakerajai. Nuwa nina tsanirijai anenias pujau inaimaina numamtuk, pegkerchau takatnaka inaisati”, tusan wakerajai.

³ Wii taja nuna umiachkaigka, nuwa misu inaimaina numamtuk, israelita ainan nugkenka shuar atsau amajsattajai. Yama nagkamchakun najanawaitaj turusnak atsau amajsattajai. Aya nugkak amajsattajai, shuar kitakjai jamaina numamtuk, nu nugkanka shir muku amajsattajai.

⁴ Israelita ainanka wina chichamrum umirtukcharu asarmatai, wait anentrachartinaitjai. Nitaka nuwa nina aishrijaig pujutsuk chikich shuarjai pujumaina numamtuk, wina chichamrun umirtukcharu ainawai.

⁵ Nuwa chikich shuarjai takanain natsamatsuk chichaak: “Wii anetai ainan eaktajai, wii yuatnun, tura umartinnasha, jaanch lanajai najanamun, jaanch linojai najanamun, aceiten tura umutaincha vinon surusarti”, tu chichauwaiti.

⁶ Tuma asamtai israelita jintinka jagki aina tsapak yutuattawai Tura nita pujutairinka jagki aina tsapakar tenteattawai, turamu asa jinta atsau asamtai wekasachartin ainawai.

⁷ Nuwa nina tsanirin umirna numamtuk, israelita ainaka antra yuusrimtai ainan emematiartin ainawai. Tumainaksha nita wakeramunka ejéchartin ainawai. Eakartin ainawai, turasha wainkachartin ainawai. Tumaina asar chichaak: “Yama nagkamchak wina aishur aya nujai ima shir pujuyajai, nekas ninii waketkitjai titinaiti”.

⁸ Turasha nuwa chikich shuarjai tsanirmau asa, nina aishri pegker aina suamsha juwapita nekas wina aishruka tusa tichauwa numamtuk, israelita ainaka, trigo ainan, vino ainan tura aceite ainan, tura oro ainan, jiru plata tutai ainancha nukap amajtusaruitjai, turamsha nekas Yuusapi suramjia tusar turuttsuk, wii susamu ainajai nitak najanawar yuusrimawar emematu jakaruiti.

⁹ Nuna tumawaru asarmatai, tsawan jeamtai nita arake, trigo ainan tura vino ainan wii susaru asan jurukiartinaitjai. Tura nugkurarti tusan jaanch lanajai najanamu ainan tura linojai najanamu ainancha wii susaru asan nunasha jurukiartinaitjai.

¹⁰ Shuar nina nuwen chikich shuarjai tsanirmau asamtai waittan suak, nina tsaniri ainasha wainmaunam jaanch nugkuarmaurin awitak juruki misu inaimaina numamtuk, wisha israelita ainan nita yuusrimtairi ainan emematin aina nuna emtin turattajai. Wii nuna turakai israelita ainan ayamrumainka atsawai.

¹¹ Shir aneasa pujutnasha, nantu yamaram takamtaisha, tura ayamtai tsawantincha jiistamachartin ainawai. Tumaina asar pegkesha iruuntrachartin ainawai.

¹² Nuwa chikich shuarjai tsanirma pujus nu suam juwa numamtuk, israelita ainasha nekas yuuschau ainan emematainak pujusar uva ainan, tura higuera ainan ina yuusri aina suramji tusa tuinawai. Tuina asarmatai nita arake ainanka wii ijitawartatjai. Nita ajari ainaka nupakar ikam jasartinaiti. Nitanka kuntin ikamia aina yuawartinaiti.

¹³ Nita yuusrimtairi ainan emematainak incienson epejakaru asarmatai, tura anillo ainan patakemawar, collar ainan nugkurar shir iwarnarar, nita yuusrimtai ainan emematu jakaru asarmatai, wii Yuus asan waittan susartajai, tusa tinaiti.

Israelita ainanka winau asarmatai aneajai tusa Yuus timau

¹⁴ Israelita ainanka wijai pujusarti tusan wii wakerumtikartatjai. Turawaran yaruakan aya nugkanmag antra yuusrimtai aina atsamunam ejeawartatjai. Turan ataksha wina umirtuktarma tusan shir chichastatjai.

¹⁵ Yaunchuk israelita ainan Egipto nugkanam pujuinan jiiruitaj nuigka winau ajakaruiti, tura wii nita Yuusri ajakuitjai. Tura ataksha tumasnak nita Yuusri atinaitjai. Wii ataksha nita nugken uva aina atii tusan titinaitjai, tura nugka “Iturchat” tutain susartinaitjai.

¹⁶ Nu turamu asar “Baala” tusa turuttsuk, Wina “anetair aishru” tusa turutiartin ainawai. Wii Yuus asan nuka tumatnaiti tusan tajai.

¹⁷ Baal ainan pachisa chichatnaka inaimamtiksartinaitjai. Tura nuna naari ainanka atakka awenawarka anaikachartin ainawai.

¹⁸ Tumainakai wii Israel shuar ainajai chichaman umiakun: Kuntin ikamia aina, nanamtin aina tura nápi ainasha winau ainan pegkerchau amajkacharti tusan titinaitjai. Winau aina maanitsuk agkan shir pujusarti tusan titinaitjai.

¹⁹ Israel shuar ainatirminka shir senchi aneajrume, tuma asan atumi aishriya numamtin atasan wakerajai. Chicham umiktinnum nuwenmau pachisa aarmauwa turusnak, wina shir nuwarua numamtuk asaakrumin atumnaka shir senchi aneajrume.

²⁰ Israel shuar ainatirminka wina nuwarua numamtin amajsatnaitjarme, tura wii taja nunaka metek umiktinaitjai. Nu turamu asarum wii Yuusaitaj nu nekarattarme.

^21-22 Nu tsawantin atum Israel shuar ainatiram yainkata tusarum wina seatkurminka, wii yaigtinaitjarme. Jezreel anaikatnaitjai, nuka “Yuus arakan arakmauwaiti” taku tawai. Wii etegkamur israelita yuatnuri trigo aina, pan aina, olivo aina tura aceite ainasha ariti tusan, nita nugken yumin yutumtikatnaitjai.

²³ Winau amajsaran wina umirtukarti tusan, Shuar ajanam arakan arauwa numamtuk, Israela nugken atum israelita ainatirminka apujsatnaitjarme. Israelita ainan wait anentrashtinaitjai tusan “Lo-ruhama” tusan tinaitjai. Israelita ainatirmeka winauka ainatsrume tusan “Lo-ammí” tinu akuncha wii takai atum wina chichartakrum: “Ameka ina ‘Yuusriyaitme’ tusarum turuttinaitrume”, tusa Yuus tinaiti.