Oseas 13 - New Testament with Old Testament portions

^1-3 (-)

Yuus Israel shuar ainan waittan susatnaiti tusa timau

⁴ Yuus ni etegkamuri israelita ainan chicharuk: “Atum Egipto nugkanam pujarmin jiiruitjarum imanai nagkamsan yamaiya juisha wika atumin Yuusriyaitjai. Atumin uwemtiknunka wiyaitjai”.

⁵ Wii atumnaka aya nugkanmag entsa atsamunam yujakrumnasha kuitamkauwaitjarme.

⁶ Turasha atumka yutai nukap arutramu asamtai, ememakrum wina chichamur umitka inaisau ainarme.

⁷ Nu tuma asaakrumin, uun yawa kuntinan asaittsa jinta yantam nakak tepes asauwa numamtuk amajkattajrume.

⁸ Chai nuwari nina uchiri aina megkaramtai wainkattsa eak wekas shuaran igkug asai maina numamtuk, amajkatnaitjarme. Tura león kuntinan asai maa nuig yuwa numamtuk atumnasha amajkatnaitjarme.

⁹ Israel shuar ainatirminka wii atumnaka kuitamnaitjarme, turasha yamai wii ijinattajrume. Wii atumin ijinkai, ijinawaipa tusa wina turutmainka pegkesha atsawai.

¹⁰ Ina apurigka atsawai, tuma asamtai ika uwemrashtatji. “Ina apuri atin chikichik sukartusta tura chikich apu chichaman iwarin ainasha sukartusta”, tusarum yaunchuk tinaitrume.

¹¹ Nu tusarum turutkurmin atumin kajerkan atumi apuri atinan susauwaitjarme. Tura atumin kajerkau asan atumi apurin juruknaitjarme.

¹² ¡Efraín weantu aina tunau takasmauri ainaka papiinum aarmau awai!

¹³ Israel shuar ainatirmeka enentaimkachu ainarme. Tumau asarum uchi akinatnuri tsawantri jeau aig shir egkemtsuk tunir egkemna numamtin ainarme.

¹⁴ Wika atum jaka ikuntsakrumnaka agkanmamtikashtinaitjarme. Wika atumnaka jakarai tusanka ayamrukchattajrume. ¡Jata, ameka magkartumaitsume! ¡Ikumataiya, ameka pegkerchauka amajkartumaitsume!

¹⁵ Israel shuar ainata nupa yagkuruk pegker jas awa numamtuk, shir aneasrum pujautirmin, nase etsa watainmaya nasentak aya nugkanam senchi umpuak entsa pukuni jinin ainan ukuyua muku amajna numamtuk, atumnaka wii ijinattajrume. Wii atumin turamtai atumi waríri ainanka chikich shuar aina jukiar nitanu amajsartatui.

¹⁶ Samarianmaya shuar ainanka wina chichamrun umirtukcharu asarmatai, waittan susartinaitjai. Shuar ainaka maniamunam jinawartinaiti, uchi aishmag aina, tura uchi nuwa ainancha nugkanam ajiarar maawartin ainawai. Antsu nuwa ajamtin ainanka ajapeniar maawartin ainawai.