Oseas 11 - New Testament with Old Testament portions

Yuus israelita ainan aneamu

¹ Israelita ainanka uchi anemaina numamtuk ane jakuitjai, tura asan Egipto nugkanam pujuinan wina uchirua numamtuk jiiruitjai.

² Nuna tura asan wini taatarma tusa tamasha wina chichamrun umitan nakitaina asar yaja tsekegkiaru ainawai. Tumaina asar nita yuusrimtai ainan eme anentas iiyainak tagku ainan maa epenak, tura incienso ainancha epejakaruiti.

³ Nuna tumau ainakaisha chikichik uun nina uchirin wekatan jintinna numamtuk, wina chichamur umiktarma tusan jintintawaruitjai. Turasha wii nitan yayájakuitaj nunaka nekaracharu ainawai.

⁴ Israelita ainanka anea asan, wini itawaruitjai. Nuwa uchiri muntsun umuntsuattsa jearna numamtuk, nitan wait anenta asan yutain susaruitjai.

⁵ Turasha wina umirtutnaka nakitraru ainawai. Nuna tumaina asarmatai, egiptonmaya aina inainak yaunchuk waitkajakarua nunaka yamaika Asirianmaya shuar aina nitanka inainak waitkasartatui.

⁶ Nita yaaktari shir pegmara umikmau ainan yumpuntrartin ainawai. Nuna turuinak jea pegkesha umuchmainchau ainancha ni yumpuamunka yumpuarartin ainawai. Nu turamu asar nita turattsa chicham umikmau ainanka umitsuk inaisartin ainawai.

⁷ Winau ainaka, nita yuusrimtai ainan ememataina asar, wina chichamrun umitnaka nakitainawai. Yainkata tusar senchi untsumainawai, turasha nitan yayáka atsawai.

⁸ Israel shuar ainata, ¡wika atumnaka inaimaitsujrume! ¡Nunaka pegkesha turumaitsujrume! Atumnaka shir senchi anea asan, yaakat Admánmaya shuar ainan, tura Seboímnumia shuar ainancha pegkerchau asarmatai ijinawaitaj, turanka ijinashtatjarme.

⁹ Wika Israel shuar ainan senchi kajerkaru akuncha shuarchau asan, nitanka waittanka susachartatjai. Efraín weantu ainanka atak awenanka ijinashtinaitjai. Wika Yuus pegkeraitjai, wika atumjai irutkau pujajai. Atumin ijinattsanka wika taachuitjai, tusa tinaiti.

^10-12 (-)