Números 23 - New Testament with Old Testament portions

Balaam israelita ainan pegkernum chicharkamu

¹ Tura Balaam Balackan chicharuk: Yuus emematkur siete vaca aina, tura siete cabra aina maar patasa epeatin, sieteya imajin najanata, tusa tinaiti.

² Tusa tama turusag umikuiti. Turamtai Yuusan eme anentas iiyainak tagku ainan maawaruiti. Turawar tagku maa patasa epeatin aina najankamunam tagku ainan chiki chikichik epeawaru ainawai.

³ Tura Balaam Balackan chicharuk: Yuus wina wari turuttin nuna nekaan ujaktajme. Ameka tagku aina maa epetai aina juig nakarsata tusa nigka nainnum wuwaiti.

⁴ Nui wakamtai Yuus wantintukuiti. Turam Balaam Yuusan chicharuk: Amina emematkun tagku aina maar patasa epeatin ainan siete najanan nui tagku ainan maan chiki chikichik tagku ainan patasan epeawarmajai, tusa tinaiti.

⁵ Tusa tama Yuus Balaaman chicharuk: Balac pujamunam waketkim, wii tajam turusmek ujakta, tusa tinaiti.

⁶ Tama Balaam waketki tagku aina maar patasa epeamunmag, Balackan tura nijai yujainajaimak pujaun jearnaiti.

⁷ Tuma Yuus titá tusa timaun turusag chichaak: Aram nugkanam pujai, ame jui taam Israel shuar aina pegkerchau chicharkata tusa Moabnumia apu Balac untsurkamtai tajai.

⁸ Yuus pegkerchauka chicharkaipa turutui. Tusa turuta aisha ¿urukamtaig wisha pegkerchausha chicharkattaja?

⁹ Ju nainta jui pujusnak, au shuar ainaka chikich shuar ainan pujutijai metekchau aina auna wainjai, nitaka chikich shuar ainajaigka iruunar pujuchu ainawai, chikich shuar ainajaigka metekchau ainawai.

¹⁰ Nitaka yaikim nekapmamainchauwa imanuiti. ¿Israelita ainancha ya nekapmamainait? ¿Ya israelita ainancha nekapmarsha ejémainaita? ¡Nitaka pegker asar, jainaksha shir aneasar jau aina imanisan wisha jakattsan wakerajai! tusa tinaiti.

¹¹ Tama Balac Balaaman chicharuk: “Israelita aina pegkerchau chicharkata tusa itamaitiatmesha ¿urukamtai pegkernumsha chicharainame?” tusa tinaiti.

¹² Tama Balaam Balackan chicharuk: “Yuus turutmaunak ujaktatjame tusan timajme”, tusa tinaiti.

¹³ Turasha Balaam Balacan chicharuk: “Chikich nainnum wemii, tura nuigka israelita aina kanaki pujuina tiijuch wainkattame. Turam nu pegkerchau chicharkata”, tusa tinaiti.

¹⁴ Nuna tusa Balac Pisgá naintrin Sofim tutainam Balaaman juki wuwaiti. Tuma nui jeaa Yuus emematku tagku aina maar patasa epeatin ainan siete najanawaiti.

¹⁵ Tuma nui jeaa Balaam Balackan chicharuk: Yuus wina wari turuttig nuna nekaan ujaktajme, ameka tagku maar epeaj juig pujusam nakarsata tusa nigka wuwaiti.

¹⁶ Tumamtai Yuus Balaaman chicharuk: “Wii tajam turusmek waketkim Balac ujakta”, tusa tinaiti.

¹⁷ Tama Balaam waketki Balac pujamunam jeawaiti. Tumamtai Balac chicharuk: Yuuscha wari turama tusa iniasuiti.

¹⁸ Tama Balaam Yuus timaun turusag chichaak: Balac, Siporan uchiriya, wii titatjam nu shir anturtukta.

¹⁹ Yuuska ii shuarti waitrin ainaj tumauchauwaiti. Ni timaurinka nigka metek uminaiti.

²⁰ Iman asa israelita aina pegkernum chicharkarta tusa turutu asamtai, nakittsuk nitan pegkernum chicharainajai.

²¹ Nita waitrutairin tura nita tunau takatairin nekauka chikichik shuarkesha pegke atsawai. Tura nitajaigka Yuus pujawai. Tuma asamtai nitaka Yuusan juwaiti ina apurigka tusar emematainawai.

²² Vaca aishmagkri nina kachurijai ayamrumauwa numamtuk, Yuus ninu ainan nina senchirijai Egipto nugkanam pujuinan jiiruiti.

²³ Turamu asarmatai Jacob weantu ainanka iwishnuka wawemain ainatsui, Tura Israelan uchiri ainanka wisha pegkerchauka chicharmaitsujai. Israel weantu aina nuna pachisan: “¡Israelita ainan yayák, Yuus nina senchirijai wainchatai ainan nukap iwainaruiti! tusan tajai.

²⁴ León untsuri asa, kuntinan patatukar maina numamtuk, israelita ainasha, nita shuari ainajai maaninakka inagnatsuk maa maaniakua ashi ijina inain artinaiti”, tusa tinaiti.

²⁵ Tama Balac Balaaman chicharuk: “Pegkerchau chicharmainchau akumka pegkernumsha chicharkaipa”, tusa tinaiti.

²⁶ Tama Balaam chichaak: Wii amina chicharku wiki enentaimsankeka tichattajme tusan timajme, tusa tinaiti.

²⁷ Tama Balac Balaaman chicharuk: Ataksha chikich nainnum wemii, nu nainnum pegkerchaun Israel shuar ainan chicharkati, tusa Yuus turamchaintash tinaiti.

²⁸ Nuna tusa Balac Balaaman juki Peor tutai nainntrin iwakuiti. Nu nainnum waka iiyamka aya nugkak irunuka ashi wainnau.

²⁹ Nu nainnum Balac Balaaman chicharuk: “Yuus emematkur tagku aina maa epeatin aina siete najanata, nu turam siete vaca aishmag tsakat aina tura siete cabra aishmag aina maata”, tusa tinaiti.

³⁰ Tusa timau asa, Balaam metek umikuiti. Turamtai nui Balac chiki chikichik tagku ainan epeawaiti.