Números 20 - New Testament with Old Testament portions

Entsa muchignumia jiinkimu

¹ Aya nugkanmag yuja yujakua cuarenta uwí ejéniar, Zin nugkanam jeawaruiti. Tumawar Cadésnum matsamsaruiti. Tura matsatmaunam María jakamtai ikusaruiti

² Entsa umumain atsau asamtai shuar aina kajekar Moisésan, Aarónjai

³ chicharainak: Ii shuar ainan Yuus ijinamia nuig jina akurka imajnikrika waitu yujamaitsuji.

^4-5 ¿Urukamtai kitakai jinati tusarmesha uchirtuk, tura tagkurtuksha Egiptonmayasha jiikratkimarme? Juigka nugkasha árak araa juumainkisha, tura umumainkisha pegke atsawai, tusa tiaruiti.

⁶ Tuinakai Moisés Aarónjai, Yuus ememattasa iruuntai aaknum jeawar Yuusan aujaina. Tumainai Yuusan senchiri tsaaptin wantintukaruiti.

⁷ Tura Yuus Moisésan chicharuk:

⁸ Shuar ainan Aarón irumrati. Turamtai ushukrutai jukim muchig a nui jeaam, entsa jinta tusam titá. Tama entsa jiinmatai shuar aina, tura tagku ainasha ashi umararti, tusa tinaiti.

⁹ Tutai Moisés Yuus tina turusag umiak ushukrutain juki,

¹⁰ Moisés, Aarónjai shuar ainan irumar muchig amaunam chicharuk: Chichaman umichu ainata antuktarma: Atum umartin entsa muchignumia jiimaintika ii ainatsji, tusa tinaiti.

¹¹ Nuna tusa ushukrutaijai muchigkin jimaraa awatnaiti. Turamtai entsa muchignumia nukap jinnaiti. Tumamtai shuar aina, tura tagku ainasha ashi umararuiti.

¹² Turasha Yuus Moisésan Aarónjai chicharuk: Atumka wina nekaspapita tusa turutchau asarum, israelita emtincha winaka umirtukchau asarum, wii nitan nugkan anajmatawaitaj nuigka, ju shuar ainajaigka atumka jeashtattrume. Antsu nita wii nugkan susartataj nuigka jeawartinaiti, tusa tinaiti.

¹³ Nu entsaka Meribá tutai ajakuiti, Meribá ta nunaka chichamrukmau taku tawai, israelita aina Yuusan umirtsuk pegkerchau chicharujakaruiti. Tu chichakaru ainakaisha Yuus nina pegkerin iwaintukuiti.

Edomnumia aina Israel shuar ainan inagkatan nakitramu

¹⁴ Moisés Cadésnum pujus, chichaman etserin ainan akupeak, Edomnumia apu chicharkurum: Amina yatsum israelita aina waittanam matsataina nuka nekainame.

¹⁵ Ina uuntri ajakarua nu Egiptonam shiakar nukap tsawan matsamajakaruiti. Nui matsatun egiptonmaya aina waitkajakarua numamtuk incha waitkarmainaji.

¹⁶ Yuus ii seammaun anturtamak chikichik nayaimpinmaya shuaran akupturmakmatai nu yainmasmatai Egiptonam matsatuti jiintrarji. Tumar yamaika yaakat Cadésnum amina nugkem tesamua nui matsatji.

¹⁷ Wait aneasam nagkamaktarma tusam tukartita, amina nugkemini nagkamaktatji. Tumakrisha árak arakmaunumka nagkamatsuk, tura yumirmataisha umutsuk jintanmag wea weakuar amina nugkem nagkaikittsar taji tusar tuina.

¹⁸ Turasha Edomnumia apu ayak: Wina nugkaruigka nagkamakirpa. Tamaitiatrum umiachkurminka wina suntaarujai maaniattaji, tusa tinaiti.

¹⁹ Tusa takaisha akupkarmau aina apun ayainak: Jinta weamunmag nagkamaktasa taji. Antsu ii ainati, tura ina tagkurigsha kitamainak entsan yumirmatainmayan umuinakaigka, urutam akikkit turusrik akikmaktatji, tusar tiaruiti.

²⁰ Turasha Edonnumia apu ayak: Takurmesha nagkamakchattarme tusa nina suntaari ainajai shir umintsar israelita ainan jinturuiti.

²¹ Tura nagkamamainchau amajsamu asa, israelita ainaka chikich jintanam weartasa eakaruiti.

Aarón jakamu

²² Tumawar Cadésnum matsatu jiinkiar we wenakua Hor nugkanam jeawaruiti.

²³ Tuma nui matsatun Moisésan, Aarónjai Yuus chicharuk:

²⁴ “Entsa Meribánam wina nekaspapita tusa umirtukchau aina asaakrumin, israelita ainan nugkan susatjarme tusan anajmatawaitaj nuigka, Aarónka jeatsuk jakattawai.

²⁵ Tumatin asamtai, Aarón nina uchiri Eleazarjai jukim Hora naintrin iwakta.

²⁶ Turam Aarón sacerdote asa nugkuara nu awiikam nina uchiri Eleazar anugkrata”, tusa tinaiti.

²⁷ Yuus timaun turusag Moisés umiak, shuar ashi wainainamunam Aarónkan nina uchirijai juki, Hora naintrin iwakuiti.

²⁸ Tura nui Moisés Aarónkan sacerdote asa jaanch nugkuarmaurin jurus Eleazaran anugkrauwaiti. Turamtai Aarón jakauwaiti. Tumamtai nuig ikusar Moisés Eleazarjai nainnumia waketkiaruiti.

²⁹ Tuma israelita ainan ujainak, Aarónka jakayi tusa tiaruiti. Nuna antukar chikichik nantu útuk matsamsaruiti.