Números 11 - New Testament with Old Testament portions

Shuar aina pegkerchau chichainakai Yuus kajerkamu

¹ Israelita aina waitu pujuina asar pegkerchau chichaina. Tumaina asarmatai Yuus nuna nekaa kajerak nita pujuinamunam jin akuptuk ekemak ujumak shuaran ijinawaiti.

² Yuus turakai israelita aina Moisésan Yuusjai chichasti, tusa ujakaruiti. Turam Moisés ji kea nu nagkankati, tusa Yuusan aujsauwaiti. Turamtai ji keamun nagkankauwaiti.

³ Tuma asamtai nu nugkan Tabera anaikaruiti, Tabera ta nunaka Yuus jina akuptuk ekemakmau taku tawai.

⁴ Israelita ainajai chikich shuar ainasha nitajai iruuntrar yujaina asar senchi tsukamainak, yutain pachisar chichamruina. Tumaina asarmatai israelita ainasha chichainak: “¡Yáki ii yuatnuncha amastaj!”, tusa tuina.

^5-6 Yuus manán akupkamun aya nunak yuina asar, yawettrar chichainak: Namagken ina surammainka atsawai, Egipto nugkanam pujusrika pepino aina, araka nere aina, namak, cebolla, tura ajos aina nu yuwaji. Turasha yamaika aya manák yuina asar yawettraji. Juigka tsukai waitainaji, Egipto nugkanmagka shir yuar pujuyaji, tusar tiaruiti.

⁷ Manáka cilantro tutai jigkai shikapchichia nunin ajakuiti. Tura iimigka numi puari yagkutakua numamtin ajakuiti.

⁸ Maná kugkuntigka harina aceitejai pachimra torta najanamun kugkuntijai metek ajakuiti. Tumaina asar nitaka káshikmas aa jiintrar manán jukar kayajai nekearar panka numamtinan najanawar inarujakaruiti.

⁹ Káshika sana kakeakai manásha nui pachitkau nita pujuinamunam kakea jakuiti.

Moisés Quebrotnum pujus pegkerchau chichakmau

¹⁰ “Israelita aina ii wakeramu yuatsji, tusar nita jeen waitiri pujusar útainamun, Yuus nekaa nitan kajerkauwaiti. Tura Moiséscha tumasag nita tuinamun nakitrauwaiti.

¹¹ Yuusan aujeak, wii amina inatairam aisha ju shuar aina jukim umata tusam wina inaitursamsha urukamtai waitkaram.

¹² Wika nita aparinchuitjai, tura nita nukurinchuitjai, tumau asan nita yaruaknaka ame nita uuntri aina nugka anajmatawaitam nuigka ejémaitsujai.

¹³ Ju shuar aina namag sukartusta, tusar útainawai. Turasha namag atsau asamtai wika nitanka namagnaka sumaitsujai.

¹⁴ Wika ju shuar aina junaka, wikika yaruakan wemaitsujai, ¡nu turataj tamauka winigka shir iturchataiti!

¹⁵ Wii tajam nu umirtumainchau akumka waitu pujui tusam jakati turutta. Nu turutawakminka waittanka inaisattajai”, tusa Moisés Yuusan tinaiti.

¹⁶ Takai Yuus Moisésan chicharuk: “Wina emematrutai aaknum israelita apuri araantusa iitai ame nekamu aina setenta itawarta, turam nitajai nakarsata.

¹⁷ Tumawakmin wii nui taan amijai chichastatjai, tura Wakan Pegker amina yainmauwa nuna nitancha susartajai. Turamu asar ame takamaina nuna nitasha yainmakarti. Turutmainakaigka imanikmeka waittsashtatme”, tusa Yuus tinaiti.

¹⁸ Nuiyasha Yuus Moisésan chicharuk: “Israelita aina kashin namagken yuawartin asamtai, pegkermakatarma tusam tiarta. ¡Yáki namagnasha amastaj! ¡Egipto nugkanmagka shir pujuyaji! Tusar nita útmaun antukmajai, tuma asan namagken yuawarti tusan susartatjai, turam yuawartatui.

¹⁹ Nuka chikichik tsawan tumachkusha jimarchik tsawanchau, tumachkusha cinco tsawan tumachkusha diez tsawanchikchau tura veinte tsawankechu.

²⁰ Wii nitajai pujamun nekainayat wina nakitruinak chichainak: ¡Egipto nugkanmayagka jinmainchau jintrauwaitji! Tusar tiaru asarmatai kashin nagkamas namagken yui yuinakua chikichik nantun ejéniartatui, tumawar yawettrar nakitiartatui, tura nuiyasha nujinmasha itakartatui”, tusa Yuus Moisésan tinaiti.

²¹ Takai Moisés Yuusan ayak: “Israelita ainaka nuwaka nekapmatsuk aya aishmag uun aina nuke seiscientos mil shuar ainawai, ima nukap aina nusha namagsha tuiya suakmea chikichik nantusha ejéttam.

²² Vaca aina, tura oveja aina ashi kajegkar ayurkursha ejémaitsui. Tura nayantsanmaya namak aina jukar ayurkursha ejémaitsui, tusa Moisés Yuusan tinaiti.

²³ Tama Yuus, Moisésan chicharuk: Wii tujinmainka atsawai, tuma asamtai wii tajam nu metek uminkattawai”, tusa tinaiti.

²⁴ Tusa timatai Moisés we israelita ainan Yuus timaun ujakuiti. Tura nita apuri ainan setenta irumar Yuus ememattasa iruuntai aaknum Yuusan nakasuiti.

²⁵ Nui pujuinai Yuus yuragminam pachitkau tarauwaiti, tuma Moisésjai chichasuiti. Nuna tura Wakan Pegker Moisésan yayájakua nuna nitancha susauwaiti. Nu turamu asar nitasha Yuusa chichamen etserkaruiti. Turasha nuka atak awenagka tumachuiti.

²⁶ Setenta apu ajakaru nuiya etegkamu ainayat Yuus ememattasa iruuntai aaknumka wetsuk nita pujutairinig juakaru ainawai. Tumawaru ainakaisha Wakan Pegker nitancha pujursaru ainawai, turamu asar nitasha Yuusa chichamen nita pujuinamunam etseraina. Nuka Eldad tura Medad nu ajakaruiti.

²⁷ Tumainakai chikichik uchi tsekegki we Moisésan chicharuk: “Eldad tura Medadjai Yuusa chichamen etserainawai”, tusa ujakuiti.

²⁸ Nun ajakua nuna uchiri Josué uchichik nagkamas Moisésan yayájakua nu pujau asa, Moisésan chicharuk: “¡Wina apuru, Moisésa jimar shuar Yuusa chichamen etseraina nu itatmamtikata”, tusa tinaiti!

²⁹ Turasha Moisés chichaak: Winak kajertakum tame. ¡Wika Yuusnau ainaka Wakan Pegker yayasaram ashi shuar aina Yuusa chichamen etserkarti, tusan wakerajai! tusa tinaiti.

³⁰ Nuna tusa inaiyak Moisés tura Israel shuar ainan apuri ainajai nita pujutainam wakettraru ainawai.

Codorníz ainan Yuus israelita aina pujuinamunam ishiakmau

³¹ Nuna tinu asa kashin tsawak Yuus nasen akupkauwaiti, turam senchi nasentuk codorníz tutain waya numamtin ainan nayantsanmayan shir nukap ikaankauwaiti. Nita pujuinamunam nagkama chikichik tsawan jeamainnum enetkauwaiti, nuiyasha patamtuniar chikichik metro tumain nupar asauwaiti.

³² Tumamtai israelita aina chikichik tsawan, chikichik káshi tura kashin tsawaksha turusag jukaruiti. Turawaru asar dos mil kilo tumainan jukaru asar ashi tinamnaikaru ainawai.

³³ Tura codornízan apawar eke nawainatsaig Yuus nitan kajerkauwaiti. Tura asa jatan akuptuk israelita ainan nukap ijinawaiti.

³⁴ Tuma asamtai nu nugkanka Quibrot-hataava anaikaruiti. Nunaka shuar aina aya yutanak enentaimtin aina nu jinamu taku tawai.

³⁵ Israelita aina nu nugkanam pujuina jiintrar we wenakua Haserotnum jeawar, nui pujusaru ainawai.