Levítico 19 - New Testament with Old Testament portions

Uruk pujakrik Yuusa chichamesha umirmainait nu pachisa timau

¹ Yuus Moisésan chicharuk:

² “Israelita aina chicharkum, wii Pegker asamtai, nitasha pegker arti tusa Yuus, turamrume tusam ujakarta”, tusa tinaiti.

³ Chiki chikichik atum ainatirmeka atumin apari, tura atumin nukurisha arantusrum iiyakrum umirkatarma. Wika atumi Yuusri asan tajarme, ayamtai tsawan tsawaarmataigka takasairpa.

⁴ Chikich aina yuusrimtai aina nu, tura atumek najanarum ina yuusriyaiti tusarmeksha emematirpa. Wika atumi Yuusri asan nunaka tajarme.

⁵ Wii tajarum turusrumek atumi tunauri tsagkurnartin wina eme anentrusrum iirkurum tagku maarum epeakrumnaka shir anentsattajrume.

⁶ Tagku wina anajmatruarum maakrumka nu tsawantinig yuatarma. Tura kashin tsawakrumsha yumainaitrume. Turasha tres tsawanta nuigka ampintrau ainaka ekemaktarma.

⁷ Antsu nuna umitsuk tres tsawan tsawara ai yuagka pegkerchau jasu asa, winauchu atatui

⁸ Tura nuna yuaka tunau jasu asamtai jiikrum ajapatarma.

⁹ Tsawan árak juuktin jeamtai juuwakrumsha ashika jukairpa, tura kakekaru ainasha yaruakairpa.

¹⁰ Atum uva arakmau juuwakrumsha kakekaru ainaka shuar kuitrinchau aina, tura chikich shuar ainasha juukar yuawarti tusarum juutsuk inaisatarma, nunaka wika atumi Yuusri asan tajarme.

¹¹ Kasamkairpa. Waitruawairpa, chikich ainajaisha tsanumrunairairpa.

¹² Wina naar pachisrum umikchatiatrumka chichakairpa. Wii taja nu metek umiachkurmeka winaka shir enentaimtikrurchatin ainarme. Wika Yuus, asan nunaka tajarme.

¹³ Chikich shuar ainasha kasarkairpa, tura pegkerchausha amajsairpa. Tura atumin takartamin ainaka akimain aigkika kashin akiktajme tutsuk akiktarma.

¹⁴ Shuar empeku ainasha pegkerchau chicharkairpa. Wainmachu ainasha tukumak iyarti tusarum jintanam númi aeprusairpa. Antsu nuka turutsuk wika Yuus asamtai, wina arantusrum iirkurum wii tajarum nu metek umiktarma.

¹⁵ Shuar kuitrintin aina, shuar kuitrinchau aina, tura apu ainaksha tunaun takaa wainkurmeka waittaka metek susatarma.

¹⁶ Chikich shuar aina nu chicham tsanumruram waitkasairpa, chikich aina maawarti tusarmeka tsanumrura surukairpa. Nunaka wii, Yuus atum umirtai asan tajarme.

¹⁷ Atumi yachi pegkerchaun takasmataisha enentaimtusrum kajerkairpa. Ame pegkerchau taká nekayatkumek chicharaichkumka amesha pegkerchau takasua nujai metek jame. Antsu chicharaimsha pegkerchau takatan inaiyashkaigka jiiktarma.

¹⁸ Shuar aina atumin pegkerchau amajtamainakaisha, atumka pegkerchaunmagka iikkairpa. Chikich ainasha atumek enentaimtumasrum eme enentaimtusrum iistarma. Nunaka wii, Yuus asan tajarme.

¹⁹ Wii tajarum nuka metek umiktarma. Atumi vacari ainaka chikich kuntin ainajaigka patamtikirpa. Arak arakrumsha chikich árak aina jigkaijai pachimkarmeka arawairpa. Hilo pachim ainajai jaanch aparmau ainaka nugkurairpa.

²⁰ Nuwa inatai aishrinattsa chichas pujaun, chikich shuar takasmataigka nu nuwaka suruka agkanmamtikachmau asamtai, maatsuk mai waitat susatarma.

²¹ Shuar nuwan takasuka nina tunauri tsagkurnartinan chikichik ovejan aishmagkun juki wina emematrutai jeanam ejéti.

²² Turamtai sacerdote nuna maa epeak, ju shuara tunauri tsagkurata tusa wina aujtusti. Turutkai wii nu shuara tunaurinka tsagkurattajai.

²³ Wii atumin nugkan anajmatawaitjarum nui pujusrum árak ararmesha jutsuk tura yutsuk tres uwí inaisatarma.

²⁴ Cuatro uwíya nui araka nere aina pegker jasartata nuka winau artatui. Tuma asamtai wina shir anentrakrum jiistamkurum suritarma.

²⁵ Cinco uwíya nui araka nere yuattarme. Atum nu metek umiakrumnaka atumi arakri ainaka nu nukap nerekartinati. Wika atumi Yuusri asan tajarme.

²⁶ “Kuntina numpe ajapruachmauka yuawairpa. Nekamin atasrumsha wakeritin airpa, tura iwishnumatsarmesha wakeritin airpa”.

²⁷ “Awamakrumsha tentearmeka awamarairpa, tura susurmi tsakarisha tsupikairpa.

²⁸ Atumi patai jakamtai wake mesemar nekapeakrumsha atumin iyashigka akagkairpa. Atumi iyashincha nakumkairpa. Wika atumi Yuusri asan tajarme”.

²⁹ “Atumi nawantri chikich shuarjai takaniasti tusa utsuakrumka nuwa akika takatia nunin amajsattarme. Nu turakrumka atumi nugke pegkerchau amajsattarme”.

³⁰ Ayamtai tsawantinka takasairpa. Wina emematrittsa iruuntai jeanam wayaarum, wina arantusrum iirkurum emematritarma. “Wii atumin Yuusri asan tajarme”.

³¹ Shuar nekamin aina nu nekartuati tusarmeka weritin airpa. Nu tumakrumka atumka tunau takákrum tumattarme. “Wii atumin Yuusri, asan tajarme”.

³² Atumka wina arantusrum iiru asarum, shuar untach ainasha araantusrum iistarma. “Wii atumin Yuusri asan tajarme”.

³³ “Chikich shuar aina atumin nugken pujuinasha waitkasairpa.

³⁴ Nuka turutsuk atum weantu kuitammainaitrum turusrumek kuitamkurum atum enentaimtumasrum anetarma. Atumsha chikich nugkanmaya ainayatrum Egipto nugkanam pujujakuitrume. Wii atumin Yuusri asan tajarme.

³⁵ Antrarmeka waittaka susairpa. Nugka suakrumsha shir nekapmarum susatarma.

³⁶ Egipto nugkanam pujarmin jiikin asan tajarme. Kijin ainasha balanzanam shir nenarum surin ataarma. Wii atumi Yuusri asan tajarme.

³⁷ Chicham umiktinan atumin tajarum juka metek umiktin ataarma. Wika atumin Yuusri asan tajarme”.