Jueces 9 - New Testament with Old Testament portions

Abimelec apu jasmau

¹ Jerobaalan uchiri Abimelec nina nukuri weantu aina Siquemnum pujuina asamtai, nitajai chichastasa wuwaiti. Tuma jeaa nitan chicharuk:

² “Wika atumin pataiyaitjai, tumau asan tajarme. Jerobaalan uchiri setenta ainaj nutika ashi apuka amaitsuji, antsu apuka chikichik amainaiti. Tuma asamtai juiya shuar aina pujuina nujai nu pachisrum shir chichasrum wakemamtikatarma”, tusa tinaiti.

³ Tusa takai Abimeleckan nukuri umai aina Siquemnumia shuar ainajai Abimeleckan pachisar chichasaruiti. Turam nuna antukar Abimelecka ina pataiyaiti tusar atukartasa wakekaruiti.

⁴ Nuiyasha yuusrimtai Baal-berit ememattasa iruuntai jeanam jiru plata tutaijai kuit najankamu atatmaun setenta jukiar Abimeleckan susaruiti. Turam Abimelec nu kuitjai shuar magkartin ainan akik yaruakuiti.

⁵ Yaakat Ofránam nina apari Jerobaal pujujakmaunam jeawaiti. Tuma nina apari akigmaun nina yachi ainan chikichik kaya uun pujamunam nui setenta maawaiti. Turasha nina apari Jerobaalan uchiri ekeu Jotam ajakua nu uumkauwaiti, tuma asa uwemrauwaiti.

⁶ Tura ijinamtai yaakat Siquemnumia shuar aina, nuna yantamen Bet-milónam matsamin ainajai Siquemnum númi encina tutai wajamunam kaya pegker tutai pujamunam nui iruuntraruiti. Tumawar Abimeleckan apu atii tusar anaikaruiti.

⁷ Abimelec apu jasu tusa tuinamun Jotam antukuiti. Tuma nain Gerizimnum wakauwaiti, nui wajas senchi chichaak: “¡Siquemnumia shuar ainata, wii titataj nu shir antuktarma! ¡Yuuscha atumnasha tumasag anturtamkachaintrumeash!”

⁸ Chikichik tsawantin númi aina chichainak, ina apuri atin etegkami tusar tiaru ainawai. Tuina asar olivon chicharainak, ame ina apuri atá tusar tiaruiti.

⁹ Turasha olivo nitan chicharuk: “Atsa, chikich numi aina nuna apuri atasan wakeraknaka shuar aina Yuusan emematainak wina aceiterun juki takau aina nuna, tura nitanu atinnasha wina aceiterun juki takau aina nuna inaiyakun atumi apurigka amainaitjai”, tusa tinaiti.

¹⁰ Tusa takai higueran chicharainak: “Antsu ame ina apuri atá”, tusar tiaru ainawai.

¹¹ Turasha higuera nitan chicharuk: “Chikich númi aina nuna apuri atasan wakeraknaka, wii yuminan pegkeran nerenaitaj nuna inaimainaitjai”, tusa tinaiti.

¹² Tusa takai númi aina uvan chicharuk: “Antsu ame ina apuri atá”, tusa tiaruiti.

¹³ Turasha uva nitan chicharuk: “Wika númi aina nuna apuri atasan wakeraknaka, Yuusan emematainak tura shuar ainasha winiyan vinon najanamun umuinak shir anen aina nuna inaiyakun apu amainaitjai”, tusa nakitrauwaiti.

¹⁴ Nu nakitramtai ashi númi aina zarzan chicharainak: “Ame ina apuri atá”, tusa tiaruiti.

¹⁵ Tusa tuinakai zarza númi ainan chicharuk: “Nekas ina apuri atii tusarum wina wakerutakrumka, wini tarum wina mikinturuin weamkatarma. Antsu atum nu nakitakrumnaka winiya ji keek nain Líbano tutainam cedro uun aina iruna nuna aesak ijinattawai”, tusa tinaiti.

¹⁶ Tura yamai, wii atumin tajarme: “Abimelec apu atii tusarum ¡atum anaikaurme nuka shuar pegker enentaimkaujai metekka iwainmamkachurme! ¡Tura wina apar Gedeón atumin pegkernum yainmakua turarmeka nina patai ainaka pegkerka amajkachurme!

¹⁷ Wina aparka atumin agkan shir pujusarti tusa, Madiánnumia ainajai maaniak ashammainnum wekasauwaiti.

¹⁸ Nu turamu ayatrum, atumka wina aparu uchiri aina chikichik kaya uun pujamunam nui ijinarme. Nu turakrum wina apar nina inatairin nuwan nuatak akiamu Abimelec yaakat Siquemnumia shuar ainan apuri amajsaurme”.

¹⁹ Turasha yamai wii tajarme: “Atum ainatiram wina apar Jerobaal ajakua nu, nina patai ainajai pegker tura akurmeka, Abimelecjai shir aneasrum pujustarma. Tura nisha atumjai shir aneas pujusti.

²⁰ Antsu atum nu turachu akurminka, Abimelecnumia ji keek yaakat Siquemnumian tura Bet-milónmayajaimak aesak ijinattawai. Tumachkusha yaakat Siquemnumia tura Bet-milónmaya ji keek Abimeleckan maati”, tusa tinaiti.

²¹ Jotam yachi Abimeleckan ashamak tsekegki wuwaiti, tuma yaakat Beer tutainam jeaa nui pujusuiti.

²² Abimelec apu jas israelita ainanam tres uwí inamrauwaiti.

^23-57 (-)