Jueces 7 - New Testament with Old Testament portions

Israelita Madiánnumia shuar ainajai maaniak nepetkamu

¹ Tura kashin tsawak káshik nantaki shuar ainan untsuk irumar wuwaiti. Tuma ashints amaunam jeawar matsamsaru ainawai.

² Nui matsatun Yuus Gedeónkan chicharuk: “Amijai shuar matsata ju ashi shiakar madiánnumia ainan nepetkarti tusanka tichattajai. Ashi shiak nita shuari ainan nepetkarka israelita aina chichainak: Ina shuari ainaka ik nepetkarji tusar tumain ainawai.

³ Tumain asarmatai nitan shuari ainan ashamainaka jeen wakettrarti”, tusa tinaiti. Takai Gedeón ni shuar ainan chicharuk: Madiánnumia ainan ashamainaka jeen wakettrarti, tusa tinaiti. Takai veintidos mil shuar wakettraruiti. Tumamtai diez mil shuar juakaruiti.

⁴ Tumawarmatai Yuus Gedeónkan ataksha chicharuk: “Shuar shir nukap ainawai. Entsan umararti tusam yaruakarta. Turawakmin yáki maanitnum amijai wearat nuna nekamtikattajme, tusa tinaiti.

⁵ Tama entsan umararti tusa yaruakuiti. Turamtai Yuus Gedeónkan chicharuk: Uwejejai entsan shikikar umarartata nu, tura tikishmarar umarartata nushaa akantrata”, tusa tinaiti.

⁶ Uwejejai entsan shikikar umararua nunaka trescientos shuaran akantrauwaiti.

⁷ Turamtai Yuus Gedeónkan chicharuk: Trescientos shuar uwejejai entsan shikikar umarara jujai madiánnumia aina nepetkattame. Antsu chikich ainaka jeen wakettrarti, tusa tinaiti.

⁸ Tusa takai jeen wakettratin ainan, Gedeón chicharuk: “Trescientos shuar nita shuari ainajai maaniattsa shima nu atum takakmau aina susatarma”, tusa tinaiti.

Gedeón madiánnumia ainan maaniak nepetkamu

⁹ Yuus Gedeónkan káshi chicharuk: Nantakim weme Madiánnumia ainajai maaniakum nepetkata.

¹⁰ Antsu ashamakmeka inatairam Furajai wetá.

¹¹ Tumam Madiánnumia aina waritak chichaina uumkam antuta. Turam ashamtsuk maaniakum amina shuarum nepetkata, tusa tinaiti. Tama Gedeón Madiánnumia aina waritak chichaina tusa antuktasa nina inatairi Furajai wuwaiti.

¹² Tura madianita aina, amalecita aina tura chikich shuar etsa watainmani matsamin ainajaimak iruunar manchi pampag árak ainan ijinattsa urukmainait imanina. Tura nita camellori ainasha yaikim nekapmamainchauwa iman nukap pampagkaruiti.

¹³ Yuus tumata tusa timau asa, Gedeón nina suntarin juki we jeawaiti. Tuma uumak pujai, chikichik suntar ni karanam wainkamurin chikich suntaran ujak: “Karanam pan nainnumia kagkeeki taa, ii matsatmaun yumpuan wainjai”, tusa tinaiti.

¹⁴ Tusa takai chikich ayak: Ame karanam wainkaum nuka Joásan uchiri israelita ainajai, Yuus akupkam taa ina ijitmatin asamtai tu kanarume tusar chichainan antukuiti.

¹⁵ Tuma Gedeón Yuusan emematnaiti. Tuma ni shuar aina matsatmaunam waketki chichaak: “Madiánnumia ainan nepetkarti tusa Yuus yainmaktatji”, tusa tinaiti.

¹⁶ Tusa trescientos shuar ainan tresa imajin akanar kachun, tura ekeemartin ainancha agkan agkan atakrauwaiti.

¹⁷ Tura chichaak: “Madiánnumia aina matsatun wii tentakmatai, atumsha turusrumek tentaktarma.

¹⁸ Tura kachun wii umpuakaisha, atumsha turusrumek umpuitarma. Tuma untsumkurum Yuus yayámu asa, Gedeón atumin nepettamkattarme tusarum titarma”, tusa tinaiti.

¹⁹ Tusa Gedeón cien shuaran yaruak we, madiánnumia ainan tentakuiti. Turamtai chikich ainasha turusag tentakaruiti. Tura káshi ajampek jasa ai Gedeón, nina suntaarijaimak kachun umpuinaiti. Turuinakai chikich ainasha kachun umpuiniaruiti. Turuinak egkea ekeemaktintrin achiakmaurin intakraruiti.

²⁰ Antsu mena uwejejai ekeemak takusar, tura untsur uwejejai kachun takuiniar, madiánnumia ainan chicharainak: “Yuus yayámu asa, Gedeón atumin nepettamkattarme”, tusar tuina.

²¹ Imatainakai ashamaina asar untsumki tsekena.

²² Yuus enentaimkachu amajsamu asar, nitak maanina. Antsu chikich ainaka tsekeararuiti.

²³ Tumawarmatai Neftalí weantu ainan, Aser weantu ainan, tura Manasés weantu ainancha Gedeón untsukuiti.

²⁴ Nuiyasha Efraín weantu ajakarua nuna nugken matsamin ainancha chichaman ashi akuptak: “Madiánita aina tsekearara nuna nainnumani, tura entsa katiimainnumanisha wininakaigka nakakar maawarti”, tusa tinaiti. Timau asar Efraín weantu ajakarua nuna nugken matsamin aina nakakaruiti.

²⁵ Tumawar madianita ainan apuri Oreb, tura Zeeb nu aina wininan achikaruiti. Turawar Orebnaka kaya Oreb tutai yamai a nui maawaruiti. Antsu Zeebnaka uva yumiri jukittsa chumpia ijurtai ajakua nuna Zeeb yamai tuina nui maawaruiti. Nuna turawar madianita ainanka pata patatuinakua entsa Jordán amain Gedeón pujamunam waketainak apu muuke ainanka mai tsupik jukiaru ainawai.