Jueces 6 - New Testament with Old Testament portions

Yuus Gedeónkan wina takartusta tusa timau

¹ Turasha israelita ainaka Yuus nakitamun tunaun takajakaruiti. Tumaina asarmatai Madiánnumia aina siete uwí takamtikiak waitkasti, tusa Yuus tsagkamkauwaiti.

² Turamu asamtai senchi takamtikainaku waitkainamu asar sapijmainak, nina jeen ikuinak nainnum wear, muchig wa amaunam yupichu wainmainchaunam umkar pujujaku ainawai.

³ Nitaka nui pujuinai madianita aina, amalecita aina, tura etsa watainmani shuar puju aina israelita aina arakrin kasaraina.

⁴ Tumainak Israel shuar ainan nugkeen aakan aakmarar pujusar, árak arakmau ainanka ashi ijitaina, nuiyasha oveja ainancha, vaca ainancha tura burro ainancha ashi yarutaina. Turuina asar israelita aina yumainnaka pegkesha ikurainachu.

⁵ Nita aakri ainan yaruakar israelita ainan nugkeen aakmarar pujuinak, tura tagkuri ainancha nui ikanmakar árak aina nui irununka ashi ijitawaru. Tumaina asar manchi aina arakan amuwa numamtuk nita camellori ainan shir nukap ikanaina.

^6-7 Imatika Madiánnumia aina waitkainamu asar tsukai senchi waitaina. Tumaina asar, israelita aina Yuusan yainkata tusar aujsaru ainawai.

⁸ Tusa tuinakai Yuus nitan wait anentar chichaman etsernun etegka akuptukuiti. Turam Israel shuar aina pujuinamunam jeawaiti. Tuma Yuus atumin chichartamuk: “Egiptonmaya aina takamtikam waitu pujuinan wii nitanka jiiruitjai”.

⁹ Egiptonam pujarmin jiiran agkanmamtikawaitjarme nunakka turachuitjarme. Chikich shuar aina atumin waitkarmainancha atum wainmaunam jiira utsagkan nita nugke ainan atumin susamiajrume.

¹⁰ Tura asan atumin chicharkun: “Wiyaitjai Yuus Tuke Puju atum ememattainka, tuma asamtai amorreo aina nugken pujakrumsha nita najana yuusrimtairi aina nuka eme anentsarum iistin airpa tusa tinaitjarme. Tusa timau ainayatrum winaka umirtukchau ainarme”, tusa atumin Yuusri tawai tinaiti.

Nayaimpinmaya shuar Gedeónkan wantintukmau

¹¹ Shuar Gedeón naartin trigon juuk, madiánnumia aina waitkarai tusa uva ijuraa juutainam uumak trigon akak pujaun,

¹² nayaimpinmaya shuar jeari chicharuk: “¡Shuar wári senchirtina Yuus amijai pujawai!”, tusa tinaiti.

¹³ Tama Gedeón ayak: “Yuusru, wait aneasam tsagkurturta. Yuus wijai pujaisha ¿urukamtai ima waitusha matsatjia? Yuus inka nita shuari waitkam matsamarti tusa inaitamsau asamtai, madiánnumia aina waitkam matsateaji”, tusa tinaiti.

¹⁴ Tama nayaimpinmaya shuar chicharuk: “Amina senchirmijai Israel shuar aina ayamrukarta tusan wii akupeajme”, tusa tinaiti.

¹⁵ Tama Gedeón ayak: “Yuusru, wait aneasam tsagkurturta. ¿Israel shuar ainancha uruk ayamrukartatja? Wina pataar ainaka kuitrinchau ainawai. Nuiyasha ika nukapchauwaitji tuma asan turumaitsujai”, tusa tinaiti.

¹⁶ Tusa takai Yuus chicharuk: “Wii amijai pujau asamtai, Madiánnumia aina nepetkattame”, tusa tinaiti.

¹⁷ Tama Gedeón chichaak: “Ameash akupkauwaitam tusan shir nekaattsan wakerajai.

¹⁸ Wait aneasam juig nakarsata, amina amastinan tagkun utitjai, tusa tinaiti. Tama Yuus ayak: Nakastajme”, tusa tinaiti.

¹⁹ Tama Gedeón jeen waketki, cabran uchirin maa painak inarkauwaiti. Tura pannasha levadurajai pachimtsuk inarkauwaiti. Turasha cabran namagken chagkinnum egkea yumirinka ollanam yarak juki wuwaiti. Tuma nayaimpinmaya shuar pujamunam jeawaiti.

²⁰ Tumamtai nayaimpinmaya shuar chicharuk: Cabran namagke, panjai itam nu muchignum apujsata. Antsu yumirigka muchig wakenam ukarta, tusa tinaiti. Tama turusag umikuiti.

²¹ Turamtai nayaimpinmaya shuar cabra namagken, tura pannasha ushukrutairijai antigkuiti. Turakai jiya numamtin muchignumia keek namagken, tura pannasha aesawaiti. Tura ikuak megkaakauwaiti.

²² Tumamtai Gedeón Yuus akupkamun nayaimpinmaya shuarna wainkaja tu enentaimas yamaika jakattajai, tusa tinaiti. Tusa Yuusan aujeak: Wina Yuusru, ame akupkamun nayaimpinmaya shuaran wainkajai, tusa tinaiti.

²³ Takai Yuus Gedeónkan chicharuk: ¡Ashamkartukaipa jakashtatme,! tusa tinaiti.

²⁴ Tama Gedeón Yuusan eme anentas iiyak tagku patasa epeatnun najanawaiti. Nuna tura “Yuus ina ayamrutmaktatji” tu anaikauwaiti.

²⁵ Yuus nuu kashitinig Gedeónkan chicharuk: “Amina apanu vaca siete uwí aramu jukim wetá. Tumam apa yuusrimtairi Baal tutai a nuna tagku ainan maa epenak emematji tusar tinu aina nu yumpugta. Tura númi pegker tutai nuig ayaamas waja nusha ajakta.

²⁶ Turam wii Yuus tuke pujuwaitaj nu eme anentrusam iirkum tagku aina maam patasa epeatin ju nainta jui najanata. Turam númi pegker tutai ajaktatam nu pataram, tura vaca jukittam nu wina eme anentrusam iirkum maam epeata”, tusa tinaiti.

²⁷ Tama Gedeón nina inatairi ainan diez shuaran juki wuwaiti. Tuma Yuus timaun turusag umikuiti. Turasha aparin, tura nuiya shuar ainancha ashama asa, nunaka káshi turawaiti.

²⁸ Tsawaarmatai Canaánnumia aina, Baalan ememattasa jeaa iiyajkama yumpuuntraun, tura númi pegker tutaisha ajakar, tagku aina maa epeatin nuig najanar tagku maar epeakur Yuus emematmaun wainkaruiti.

²⁹ Turawar yáki junasha aitka tusar tuina. Tusar nitak chichainak: Junaka Joásan uchiri Gedeón aitkayi tusar tuina. Tuina asar Joásan jeariar chicharainak:

³⁰ Baal ememattasar jear iiyajkamar, tagku aina maa patasa epetai yumpugmau au, tura númi pegker tutai wajauwa nusha ajakmau wainkaji. Uchiram jiita maami, tusar tuina.

³¹ Tuinakai Joás nitan chicharuk: “¿Yuus Baal tutai ayamrakrumek shuar maamainaittrum? Baal, yuusaitkugka ni emematku tagku aina maa patasa epetain yumpunkara nuna nigki ayamrumak shuarnaka maati”, tusa tinaiti.

³² Nu tsawantin yuusrimtain Gedeón yumpuaru asamtai, israelita aina Jerobaal anaikaru ainawai. Nunaka Baal yuusaitkugka yumpuuntra auna nigki ayamrumakti taku tawai.

³³ Takai shuar aina kajekar shiakar Jordán entsanam katiar nugka Jezreel tutai pakarin matsamsaruiti. Tuma nukap tsawan pujusar madiánnumia aina, tura amalecita ainajaimak, israelita ainajai maaniami tusar kautawaruiti.

Gedeón nina suntaari ainan etegkamu

³⁴ Turasha Gedeón Yuusa Wakaní yayámu asa Israelan uchiri doce ajakarua nuu weantu kanararu aina nuiya kaunkarti tusa kachun umpuaruiti.

³⁵ Turamtai cuatro apu aina, nita suntaarijai kaunkaruiti.

³⁶ Tumawarmatai Gedeón Yuusan aujeak: “Apuru, Israel shuar aina ame ayamrukarta tusa turutam nuna shir nekaattsan wakerajai.

³⁷ Tuma asan trigo juukar akatainam oveja nuapen nugka aepsattajai. Turamun sana nugkan inijatsuk nuapen inijaarmaun kashin káshik wainkanka, Yuus Israel shuar aina ayamrukta turutna nunaka nekaspapi turutnaita tusan nekaattajai”, tusa tinaiti.

³⁸ Tinu asa Gedeón tsawaar káshik nantaki nuapen iiyajkama sana inijaarmaun wainak, chikichik tazónnum sanan ijuraa jusauwaiti.

³⁹ Turayat ataksha Yuusan aujeak: “Wait aneasam kajertukaipa. Ame turamun ataksha shir nekaattsan wakerajai. Yamaika sana nugkan inijaarti, antsu nuapnaka inijaarchati”, tusa tinaiti.

⁴⁰ Takai Yuus imatiksag umikuiti. Tinu asa Gedeón káshik nantaki iiyajkama sana nuapnaka inijatsuk nugkan inijaar aun wainkauwaiti.