Jueces 5 - New Testament with Old Testament portions

Débora Baracjai kantamamu

¹ Nu tsawantin Débora Baracjai kantamainak:

² “Israel shuar ainarum nuiya maaniktasa wakerincha irunui, tura nuiyasha nita apuri aina maaniatarma tusa tama nakittsuk ayu tusa tinusha irunui, tuma asamtai Yuus ememattarma.

³ ¡Apu ainata, wika Yuusan kantamruattajai. Israel shuar ainan Yuusri nekasa nuna pachisan wii kantamkai antuktarma!

⁴ Wina Yuusru, Edom nugkanam Seír ajakua nui ame kuitamkartusakmin yujayaj nuigka urmiayi, tura yumisha senchi yutimiayi.

⁵ Yuusa emtin nain aina urkaru ainawai. Sinaí naintri Israel shuar ainan Yuusriya nuna emtin senchi urkauwaiti.

⁶ Anata uchiri Samgar, tura Jael pujujakarua nu tsawantinka ashammain asamtai, jinta ainanmagka wekatsuk menaantar jintachunmani yuja jakaru ainawai.

⁷ Tumaina asar Israel shuar ainaka kanarar chiki chikichik pujuina asar kajinmatkimu apurtinchau pujuinan chikichik nuwa Débora naartin nina uchirin yaimaina numamtuk yaigtasa werinaiti.

⁸ Ashi israelita ainaka yuusrimtai najanamu ainan emematiaruiti. Tumaina asarmatai nitajai maaniawarti tusam nita shuari aina ishitkauwaiti. Turasha nitaka cuarenta mil shuar nagkirtin, tura ayamrumatairi ainasha aruinamaitiat ashamkartuina asar maanimain nekapcharmayi.

⁹ Ujumak shuar wári aina maaniawaru asamtai, Israel shuar aina apurin shir anentainajai, tura Yuusru amincha maaketi tajame.

¹⁰ Shuar wiakach burro nuwa pujunam ekeemsarum yujau ainatiram, tura shuar kuitrinchau nawek wekain ainatirmesha nepetmakarti tusa Yuus yainmaku asamtai, ni kantamruatarma.

¹¹ ¡Tagku kuitamin ainatirmesha, pegke atsurmau ainatirmesha yaaktanam pujuchu ainatirmesha, Yuus Israel shuar ainan ayamruk agkanmamtika asamtai, platillo aina awateakrum Yuus pachisrum etserkatarma!

¹² ¡Débora mijaakaipa! ¡Kakaram jasta! Tumakum kantamata. ¡Barac Abinoaman uchiriya, amesha mijamtsuk, maaniaku achirmau aina nu yaruakam egkeawarta!” tu kantamu.

¹³ Tu kantama inagnakmatai israelita apuri ainaka wearu ainawai: Yuusnau ainaka nita shuari kakaram ainajai maaniawartasa nijai wearu ainawai.

¹⁴ Efraín weantu aina Amalec shuar ainan nugken pujuina nitasha shiakaru ainawai. Tura Benjamín weantu ainasha nuna ukurin nitasha shiakaru ainawai. Tura Maquir weantu ainanmayasha apu aina shiakaru ainawai. Tura Zabulón weantu ainanmayasha apu aina shiakaru ainawai.

¹⁵ Nuiyasha Isacar weantu apu aina Débora weakai uyuntsaru ainawai. Tura Isacar weantu aina Barac weakai uyuntsaru ainawai. Antsu Rubén weantu ainaka,

¹⁶ nita ovejari ainan senchi uyumaina asar wecharu ainawai.

¹⁷ Galaad weantu ainaka entsa Jordán amain juakaru ainawai. Antsu Dan weantu ainaka, Aser weantu ainajai nayantsa pakarin nita lanchari ainan kuitamuk juakaru ainawai.

¹⁸ Antsu Zabulón weantu aina, Neftalí weantu ainajai maaninak ashammainnum yujasaru ainawai.

¹⁹ Tura Canaánnumia apu aina yaakat Taanac kaunawar yaakat Mequido entsanam jeastatuk a nui maaniawaru ainawai. Turasha nepetmakcharu asar chikichik warínkisha jutsuk wakettraru ainawai.

²⁰ Israelita aina Sísarajai maaninakka nayaimpinam ya iruna nujaimaktsuk iruunar maaniatai tumain maaniawaru ainawai.

²¹ Nita shuari ainanka entsa Quisónnum katinan, yumi yutuk nujagkrak ejekkauwaiti. ¡Débora, amina shuarum aina nu nepetkam ikmakchamnau amajsattame!

²² Sísara caballori ainaka ashamkartukar tsekenak senchi tuturtuina.

²³ Nayaimpinmaya shuar chichaak: “Yaakat Meroz tura shuar nui pujuinajaimak waittsarti tajai”. Nitaka kakaram ainayat israelita aina nita shuari kakaram ainajai maaninakai Yuus yaigkua nui wecharu asarmatai tinaiti.

²⁴ Nuwa Jael naartinan quenita shuar Heber nuatkamua nuka chikich nuwa ainan nagkasau pegkernum chichartai atinaiti. Nuiyasha ni pujamunam nuwa aina pujuina nuna nagkasau shir anentam atinaiti.

²⁵ Sísara kitamak entsa surusta umartajai tinaiti. Tusa takai Jael leche kutan pinignum yara juki susauwaiti.

²⁶ Tura nuna umar tepes kanaruiti. Tumamtai númi atsakamun juki martillojai mishanam iju nugkajai irumar achiawaiti.

²⁷ Turamu asa Sísara kaka kakakua nuig jakauwaiti.

²⁸ Sísara nukuri uchiri tatsuk megkakamtai kuntuts enentaimuk, iimsatin jeanam chigkaimu amaunam winatsuash tusa iiya, tuma atsakai chichaak: “¿Wina uchirsha urukamtaig ima taatsua? ¿Wina uchiru carretari maaniaku wekatai arma nusha urukamtai ima megkaaraya?” tusa tinaiti.

²⁹ Tusa takai Sísara inatairi nuwa yacha ainasha chichaina, tumainakai Sísara nukurisha nunak awena chichaak:

³⁰ “Maaniawar nepetmakartsuk, suntar aina nuwan achirar chiki chikichik nuna turuinachkusha jimar jimarkesha nuwan akankar juinaktsuk megkararati, tura jaanch pegker aatkamu ainan, chikichik jaanchin, nuiya jimar jaanchin aatka aparmau ainan shuar maaniamunam nepetmaku suwenam anugtai ainan yarumainaktsuk megkararati”, tusa tuina.

³¹ Débora Baracjai kantamainak: “Yuusa, amina shuarum aina nuka ame ashi ijinata. Antsu amina anenmaina nuka etsa tutupnir etsanna iman atii”, tu kantamawaru ainawai. Nu maanikaru aina nui nagkamsagka israelita aina maanitsuk cuarenta uwí agkan shir pujusaru ainawai.