Jueces 16 - New Testament with Old Testament portions

Sansónkan kakarmari pachisa etserkamu

¹ Chikichik tsawantin Sansón yaakat Gazanam wuwaiti. Tuma nui jeaa nuwa akika takatai pujaun wainak nuna jeen wayaa nijai kanaruiti.

² Yaakat Gazanmaya aina Sansón taa pujawai tusa tamaun antukaru ainawai. Tumawar tsawarmatai maami tusar Sansón pujamun tentakar tura yaakta waitiri ainancha kuitamainak chichatsuk káshi wajaina.

³ Turasha Sansón kanar tepau ajampek jasa ai nantaknaiti. Tuma waiti ainan numirijai teakuiti, tura jiru wiyantamuncha ukuinar ashi yanaki juki yaakat Hebrónjai iinias nain amaunam imanai iwakuiti.

⁴ Tuma pujus chikich nuwan Dalila naartinan chichas nuatkauwaiti.

⁵ Turamtai filisteo apuri aina, nuwan jeari chicharainak: Sansón uruk achikrik emetmainait nu iniasam nekaam ujakratkata. Turukratawakmin achikrika, ii ainati chiki chikichik shuarti kuit mil cien amastatji tusar tiaruiti.

⁶ Timau asa nuwa Sansónkan chicharuk: ¿Amesha uruku asamea ima kakarmaitam? Warijai jigkatmawarmatai nepetmamaitsum nu wait aneasam ujatkata, tusa tinaiti.

⁷ Tama Sansón nuwen ayak: “Siete neak kaarchau ainajai jigkatawarmataigka kakamaitsujai”, tusa tinaiti.

⁸ Timatai filisteo ainan untsuk Sansón timaun ujakuiti. Takai filisteo aina, Sansónkan jigkaati tusar siete neak kaarchau ainan susaruiti.

⁹ Sansón kanarmatai jigkaa Sansónkan untsuak: ¡Sansónka filisteo aina achirmakartasa winittramainawai! tusa tinaiti. Tama Sansón nantak, uruch japikir tsurimaina numamtuk naekan tsuriaruiti.

¹⁰ Turamtai Dalila chicharuk: Tsanurame wait aneasam nekasa nu turutta. ¿Warijai jigkatmawarmatai nepetmamaitsum? tusa tinaiti.

¹¹ Tama Sansón ayak: Naek shir katsurmajai jigkatawarmataigka kakamaitsujai. Tumamtaigka achirmain ainawai, tusa tinaiti.

¹² Takai Dalila Sansón kanarmatai, naek katsurmajai jigkaa Sansónkan untsuak: ¡Sansónka filisteo aina achirmakartasa winittramainawai! tusa tinaiti. Tama Sansón nantak, uruch japikir tsurimaina numamtuk naekan ataksha tsuriaruiti.

¹³ Turamtai Dalila chicharuk: ¿Urukamtai ima tsanureame? Uruk achirmamaina aina nu ujatkata, tusa tinaiti. Tama Sansón ayak: Wina wichur siete chapikmarmauwa nujai jaanch najankur awantaiya numamtuk awantata. Turam númi nugkanam shir ajiam nui jigkaata. Turakminka wina kakarmarka megkaakattawai, tusa tinaiti.

¹⁴ Tama Dalila Sansón timaun turusag umikuiti. Tura Sansónkan untsuak: ¡Sansónka filisteo aina achirmakartasa winittramainawai! tusa tinaiti. Tama Sansón nantak númi ajiamun ukuinkauwaiti.

¹⁵ Turamtai Dalila chicharuk: Tresa imajnia tsanurme, ¿urukamtai waitrinaitiatmesha aneajme tusamsha turutme? Amina kakarmarmesha pachisam ujattsume, tusa tinaiti.

¹⁶ Imattramu asa jakamnau nekapuk, Sansón Dalilan chicharuk:

¹⁷ Wika akiintsaig, Yuus pegkernum chichartuku asamtai wina wichrunka chikichkiksha tsupirtukcharu ainawai. Antsu wichrun tsupirtukarmataigka wina kakarmarka megkaamainaiti, tusa tinaiti.

¹⁸ Tama nekaspapi tawa tusa filisteo apuri ainan untsuk chicharuk: Yamaika Sansónkan kakarmari uruk megkaamainkit nuna nekarajai, tusa tinaiti. Timatai filisteo apuri aina kuitan jukiar jeawaruiti. Tumawar anuumak wajasaruiti.

¹⁹ Tumawarmatai Dalila Sansón kanarmatai, chikichik shuaran Sansónkan wichin tsupirkati tusa untsukuiti. Turam Sansónkan wichin tsupirkauwaiti.

²⁰ Turamtai Dalila Sansónkan untsuak: ¡Sansónka filisteo aina achirmakartasa winittramainawai! tusa tinaiti. Tama shintaar, nina kakarmarijai nepetma jakua tumataj tukama nepetmakchauwaiti. Yuus ikukmaun nekamachuiti.

²¹ Tuma asamtai filisteo aina achikar jiin ukuitkar cárcelnum egkeawar trigon neken atii tusa apujsaruiti.

²² Turam pujus ataksha wichruruiti.

Sansón jakamu

²³ Sansónkan nepetkaru asar, filisteo eme anentsa iitai aina nukap tsawan pujusar ina yuusri Dagón, eme anentsa iiyakur tagku aina maa epeawarmi tusa iruuntraruiti. Tumainak Sansónnasha cárcelnum egketun jiikiaruiti.

²⁴ Turawar filisteo chikich ainasha nuna wainkar, nita yuusrin eme anentas iiyainak kantamainak: “Ina yuusri yainmasmatai ina shuari Sansón ina arake ainan tura ii shuar ainancha nukap ijinama nu nepetkaji”, tusa tuina.

²⁵ Turasha Sansón nigki wekamainchau asamtai, ina yuusri ememattasa iruuntai jeanam itati tusar chikichik uchin akuptukaruiti.

²⁶ Turam uchi Sansónkan uwejnum egkes nita yuusri ememattasa iruuntai jeanam ejénaiti. Turam Sansón uchin chicharuk: “Jea achimtikra jeamkamunam achimtikrukam awajtusta”, tusa tinaiti. Tama Sansónkan juki, jea achimtikra jeamkamunam achimtik awajsauwaiti.

²⁷ Nu jeanam filisteo apuri aina, aishmag aina, tura nuwa ainajaimak ashi irumram tres mil shuar iruuntrar Sansónkan ii iruntuina.

²⁸ Turam Sansón Yuusan aujeak: “Apuru, filisteo aina wina jiirun mai ukuitrukarua nuna yapajmaktajai, wait aneasam senchiram surusta”, tusa tinaiti.

²⁹ Nuna tusa jea jeamkur jimar ajiamu ajapeen wajaun mai achikuiti.

³⁰ Tuma shitawaiti, turam jea yumpunuk apu ainan, tura jea jimaraa ekeni jeamkamunam yaki iruuntsar Sansónkan ii iruntuinancha ashi ijinuk, Sansónnasha maawaiti. Turasha Sansón iwáku pujus, shuaran maa jakua nuna nagkas, ni jak filisteo ainan ima nukap maawaiti.

³¹ Sansónkan iyashin juki ikusartasa nina yachi aina, tura nina patai ainasha taruawaruiti. Tura Sansónkan iyashin jukiar apari ikusmaunmag Soránam ikusaruiti. Sansón jatsuk pujus israelita ainan yayák veinte uwí pujujakuiti.