Jueces 14 - New Testament with Old Testament portions

Sansón filisteo nuwan nuatkamu

¹ Chikich tsawantin, Sansón yaakat Timná tutainam filisteo aina matsatmaunam wuwaiti. Tura nuiya nuwan wainak wakerukuiti.

² Tuma waketki taa aparin nukurijai chicharuk: Filisteo nuwan nuatkattsan wakerajai, tusa tinaiti.

³ Tama apari chicharuk: “¿Urukamtai filisteo nuwa nuatkattsamsha wakerame? Filisteo ainaka Yuusan umirchau asar, tunaun takau ainawai”, tusa tinaiti. Tutaisha Sansón aparin chicharuk: “Nuwan nuatkattsan senchi wakerajai sumartuktarum”, tusa tinaiti.

⁴ Takai apari tura nukurisha ayu tusar tiaruiti. Turasha apari tura nukurisha, Sansón filisteo nuwan nuatak israelita aina waitkam pujuina nuna ayamrukti tusa Yuus enentaimtamunka nekacharuiti.

⁵ Sansón nina aparijai, tura nukurijaimak filisteo aina matsatmaunam yaakat Timnátnum wuwaiti. Tumainai Sansónkan uun yawa igkuawaiti.

⁶ Turam ni ayamrumamainan achiakchayat, Yuusa Wakaní pujurmau asa, uwejejai uun yawaan awati maawaiti. Turasha aparin, tura nukurinkisha ujakchauwaiti.

⁷ Tuma ni nuwa wakerukmaurin jeari chichas waketkinaiti.

⁸ Tuma ishichik tsawan pujus, nuwenatjai tusa filisteo aina matsatmaunam wuwaiti. Tuma chikich tsawantin uun yawa maamurin weri iiyajkama, yawa ukunchiin napan egketun wainak

⁹ ashinaiti. Tura juki umaruiti, turak aparin tura nukurincha ajamsauwaiti. Turasha uun yawa ukunchiinian napan ashijai tusagsha tichauwaiti.

^10-11 Sansón filisteo nuwan nuateak jiistan takaak: Filisteo shuar aina treinta natsa kaunkarti, tusa tinaiti.

^12-14 Timau asar kaunkarmatai chicharuk: Wii chikichik inimmaun takai nekaatarma, tusa tinaiti. Tama nitasha ayu tusar tiaruiti. Tuinakai ni inimuk: Uun yawanumia yutai najaanaruiti, tura ni kakarmarinia yumin najaanaruiti. ¿Nusha warimpaita,? tusa tinaiti. Nu nekawakrumnaka nugkutai pegker ainan susattajrume. Antsu nu nekachrumka, nugkutai pegker aina wina surustatrume, tusa tinaiti. Timau asar tres tsawan pujuinaksha pegkesha nekacharuiti.

¹⁵ Tuma asar Sansónkan nuwen jeari chicharainak: Amina aishrum ina turammaj nu ujakratkata. Turachkuminka amina, tura jeemsha ekeemaktatji. ¿Urukamtai jiisat takayatrumsha ina nugkutairi jukittsarmesha wakerarme? tusar tiaruiti.

¹⁶ Tama útki aishrin Sansónkan jeari chicharuk: Winaka anentsume. Tuma asam wii shuar aina chikichik inimmau timam nusha ujattsume, tusa tinaiti. Tama Sansón ayak: Wina aparun, tura nukurnaksha ujakchauwaitjai. Tuma asan amincha ujakchattajme, tusa tinaiti.

¹⁷ Timau asa tsawan nukapek nuwa útu pujau. Tumakai Sansón siete tsawan jeaamtai, nuna takun timajai tusa nuwen ujakuiti. Turam nuwa ni shuar ipaamu treinta natsa aina pujuinan, Sansónka nuna taku timayi tusa ujakuiti.

¹⁸ Tama nuu tsawantinig etsa akaatsaig Sansónkan jeari chicharainak: Ame timam nuka napaiti, tura uun yawa kakarma nu tinaitme, tusar tiaruiti. Tama Sansón chichaak: Wina nuwar atumin ujatmaku asamtai nekarme, tusa tinaiti.

¹⁹ Yuusa Wakaní pujursauwaiti, turam Sansón jinki yaakat Ascalónnum wuwaiti. Tuma filisteo ainan treinta shuaran maawaiti. Tura nuna nugkutairi ainan yaruak natsa ainan surauwaiti. Tuma kajek apari pujamunam waketkinaiti.

²⁰ Tumamtai Sansónka nuwenka, nuwenmaunam ipaamu aina nuiya chikichik shuar nuatkauwaiti.